كاسىپكەردى تىعىرىققا تىرەگەن ەلەكتروندى ساۋدا

الەمدە ونلاين ساۋدا-ساتتىق جاساۋ قارقىن العانى بارشاعا ءمالىم. بۇگىندە ەلەكتروندى ساۋدا جاساۋدىڭ تيىمدىلىگىن بىلگەن جۇرت ۇيالى تەلەفوننىڭ كومەگىمەن-اق الەمنىڭ كەز كەلگەن تۇكپىرىنەن تاۋار ساتىپ الۋعا كوشە باستادى. بۇل قازىر يتاليا كاسىپكەرلەرى ءۇشىن تۇيتكىلدى ماسەلەگە اينالىپ وتىر.

يتاليا كاسىپكەرلەرى سوڭعى ۋاقىتتا بولشەك ساۋدانىڭ ءسانى كەتتى دەپ دابىل قاعۋدا. ولاردىڭ ايتۋىنشا، ساۋدا ورىندارىنىڭ تاياۋ بولاشاقتا جابىلىپ قالاتىن ءتۇرى بار. قازىردىڭ وزىندە ساۋدا جەلىلەرى ساتۋشىلارىنىڭ سانىن ازايتىپ، جالاقى مولشەرىن دە ايتارلىقتاي تومەندەتىپتى. ولاي ەتپەسە، ونلاين ساۋدا-ساتتىق دامىعان بۇل ەلدە ادەتتەگى ساۋدا نۇكتەلەرىنىڭ يەلەرى شىعىنعا باتاتىنى انىق. ويتكەنى يتاليانداردىڭ ءبارى قاجەتتى تاۋارلارىن ەلەكتروندى تاپسىرىس بەرۋ ارقىلى ونلاين دۇكەندەردەن ساتىپ الاتىن بولعان.

بولشەك ساۋدانىڭ ءباسى تومەندەگەنىن يتاليانىڭ ستاتيستيكا ينستيتۋتى دا راستاپ وتىر. ستاتيستيكا ينستيتۋتى تاراتقان حابارلاماعا سەنسەك، 43 دۇكەننەن تۇراتىن «تروني» تۇرمىستىق تەحنيكا ساتاتىن جەلى جابىلىپ، 500-گە جۋىق ادام جۇمىسسىزدار قاتارىن تولىقتىرىپتى. ساۋدا جەلىسىنىڭ قىزمەتكەرلەرى بۇگىندە شاڭسورعىش، شاينەك، ۇتىك سەكىلدى تۇرمىستىق تەحنيكالاردى دا تۇتىنۋشىلار ۇيدەن شىقپاستان تومەن باعاعا ساتىپ الا الادى ەكەن. كاسىپوداق ۇيىمدارى ەلدىڭ ەكونوميكالىق دامۋ مينيسترلىگىنە قيىن جاعدايدان شىعۋعا قول ۇشىن سوزىپ، جۇمىس ورىندارىن ساقتاپ قالۋعا كومەكتەسۋىن سۇراپ، ءوتىنىش حات جولدادى. ال ساۋداگەرلەر ونلاين ساۋدانىڭ ۇلعايۋىنا الاڭداۋلى. تۇتىنۋشىلار سانى بۇلايشا ازايا بەرەتىن بولسا، جاعدايدىڭ تۇپكىلىكتى قيىندايتىنى ءسوزسىز.

قازىر يتاليا ونلاين ساۋدا جاساۋ بويىنشا گەرمانيا مەن فرانتسيا سىندى ەۋروپانىڭ ءىرى ەلدەرىنەن كەيىنگى ورىندا. ميلان پوليتەحنيكالىق ۋنيۆەرسيتەتى جۇرگىزگەن سوڭعى زەرتتەۋلەردىڭ قورىتىندىسىنا ساي، بىلتىرعى جىلى تاۋاردىڭ 6 پايىزى ونلاين تۇردە ساتىلعان. بۇل 2016 جىلعى كورسەتكىشپەن سالىستىرعاندا 30 پايىزعا ارتىق. ينتەرنەت دۇكەندەرىنىڭ قىزمەتىنە جۇگىنەتىن تۇتىنۋشىلار سانى 22 ميلليونعا جەتىپتى. ونلاين ساۋدالانعان تاۋارلار تىزىمىندە ەلەكتروندى زاتتار، كيىم-كەشەك، ۇيگە ارنالعان تاۋارلار بار.

ايتا كەتەيىك، يتالياداعى جەكە دۇكەندەردىڭ ساۋدا كولەمى 6 جىل ىشىندە 8 ملرد ەۋروعا ازايعان. وسىلايشا، ساۋدا نارىعىندا قادامدارىن نىق باسا الماي وتىرعان شاعىن بيزنەس وكىلدەرى ءىرى ونلاين ساۋدا نۇكتەلەرىمەن اراداعى باسەكەدە ءالسىز ەكەندىگىن اڭعارتىپ الدى. ال ساۋداگەرلەر بۇل ماسەلەنىڭ شەشىمى تابىلماسا، ساۋدا-ساتتىقپەن اينالىسىپ جۇرگەن شاعىن كاسىپكەرلەردىڭ الەۋمەتتىك احۋالى كۇردەلەنە تۇسەتىندىگىن ايتۋدا.

ۇقساس جاڭالىقتار

Back to top button