"قوش كەلدىڭ ۇيگە!": تالعان ايان بوستاندىققا شىقتى

وسىدان ەكى جىل بۇرىن اتىراۋدا جەرگە قاتىستى رۇقسات ەتىلمەگەن ميتينگكە شىققانى ءۇشىن بەس جىلعا باس بوستاندىعىنان ايرىلعان ازاماتتىق بەلسەندى تالعات ايان جازانىڭ جەڭىلدەتىلۋىنە بايلانىستى 28 ساۋىردە بوستاندىققا شىقتى.  

ازاتتىق ءتىلشىسىنىڭ حابارلاۋىنشا، اتىراۋدىڭ تەمىرجول ۆوكزالىنا بەلسەندىنى قارسى الۋعا ونىڭ ونداعان تۋىستارى، جاقىندارى جانە بەلسەندىلەر جينالعان. ولار تالعات اياندى قولدارىنا ءتۇرلى-ءتۇستى شارلار جانە «قوش كەلدىڭ ۇيگە»، «تالعات – باتىرىمىز!!!» دەپ جازىلعان پلاكات ۇستاپ قارسى العان.

تالعات ايان اقتوبەدەگى ك-168/2 كولونياسىندا قاماۋدا وتىرعان. 14 ساۋىردە اقتوبە قالالىق سوتى تالعات اياننىڭ تۇرمە جازاسىن باس بوستاندىعىن شەكتەۋ جازاسىنا اۋىستىرعان. سوت شەشىمىنە پروكۋرور قارسى بولماعان.

تالعات ايان ازاتتىق ءتىلشىسىنىڭ سۇراقتارىنا جاۋاپ بەرە كەلە ءوزىنىڭ «ەكىۇشتى» كوڭىل-كۇيدە ەكەندىگىن ايتقان. ونىڭ سەبەبىن ول ءوزى بوستاندىققا شىققانىمەن، كەزىندە وزىمەن بىرگە سوتتالعان بەلسەندى ماكس بوقاەۆتىڭ ءالى دە تۇرمەدە وتىرعاندىعىمەن تۇسىندىرگەن.

– بوساپ شىققالى مەنى «كەشىرىم سۇراپتى» دەگەن الىپ-قاشتى سوزدەردى دە ەستىپ قالدىم. بىراق مەن ەشكىمنەن كەشىرىم سۇراعان جوقپىن، – دەدى ول.

بەلسەندى ءوزى تۇرمەدە وتىرعان كەزدە قولداۋ كورسەتكەندەر مەن حات جازعاندارعا دا ءوز العىسىن ءبىلدىردى.

تالعات اياندى قارسى الۋشىلار دا وزدەرىنىڭ قۋانىشتى ەكەندىكتەرىن، الداعى ۋاقىتتا ماكس بوقاەۆتىڭ دا بوساپ شىعۋى كەرەكتىگىن ايتتى. بۇعان دەيىن حالىقارالىق ۇيىمدار ايان مەن بوقاەۆتىڭ بوساتىلۋىن تالاپ ەتكەن ەدى.

ۇقساس جاڭالىقتار

Back to top button