قحا توراعاسىنىڭ جاڭا ورىنباسارلارى تاعايىندالدى

قازاقستان حالقى اسسامبلەياسىنىڭ ءXXVى  سەسسياسى بارىسىندا قحا توراعاسىنىڭ جاڭا ورىنباسارلارى تاعايىندالدى، دەپ حابارلايدى قازاقپارات ءتىلشىسى.

«وزدەرىڭىزبەن كەلىسكەندەي، جىلىنا ءبىر رەت اسسامبلەيا سەسسياسىندا ءتۇرلى ءوڭىردىڭ ەتنومادەني بىرلەستىكتەرى ۇسىنعان قحا توراعاسىنىڭ جاڭا ورىنباسارلارى اۋىسۋ ارقىلى تاعايىندالادى. اعىمداعى جىلى دا  اسسامبلەيا كەڭەسى اقىلداسا كەلە ماعان بۇل لاۋازىمدارعا «Lituanica» قوعامدىق بىرلەستىگىنىڭ  توراعاسى تۆاريوناس ۆيتالي يونو مەن قحا مۇشەسى، مەتسانات سالجانوۆ يسلامبەك تولەۋباي ۇلىن ۇسىندى. ءبىز ولاردى جاقسى بىلەمىز. بۇل كانديداتتاردى قولدايسىزدار ما؟ قارسىلىق جوق پا؟ جوق بولسا، وندا مەن ولاردى اسسامبلەيا توراعاسىنىڭ ورىنباسارى لاۋازىمىنا تاعايىنداۋ تۋرالى وكىمگە قول قويامىن»، – دەدى نۇرسۇلتان نازارباەۆ. ايتا كەتەيىك، «بەس الەۋمەتتىك باستاما – قوعامنىڭ الەۋمەتتىك بىرلىگىنىڭ تۇعىرى» دەگەن كۇن تارتىبىمەن باستالعان سەسسيا جۇمىسىنا 1 500-دەن استام ادام قاتىسۋدا. ولاردىڭ قاتارىندا ەلدىڭ بارلىق وڭىرلەرىنەن كەلگەن اسسامبلەيانىڭ ارداگەرلەرى، رەسپۋبليكالىق جانە وڭىرلىك ەتنومادەني  بىرلەستىكتەردىڭ توراعالارى، پارلامەنت دەپۋتاتتارى، ورتالىق اتقارۋشى ورگانداردىڭ، ساياسي پارتيالاردىڭ، ءدىني بىرلەستىكتەردىڭ، ۇكىمەتتىك ەمەس ۇيىمداردىڭ باسشىلارى، جوو رەكتورلارى، شەت مەملەكەتتەردىڭ ديپلوماتيالىق ميسسيالارىنىڭ، عىلىمي، شىعارماشىل زيالى قاۋىمنىڭ جانە باق-تىڭ وكىلدەرى بار. سەسسيا سوڭىندا سالتاناتتى كونتسەرت وتەدى.

ۇقساس جاڭالىقتار

Back to top button