پاۆلوداردا ءۇش ايدا 55 جەمقور جاۋاپقا تارتىلدى

پاۆلودار وبلىسىندا 2017 جىلى 146 جەمقورلىق جونىندە قىلمىستىق ءىستى تەرگەلسە، 2018 جىلى ءۇش ايدا 55 ءىس اشىلعان. بۇل تۋرالى وڭىرلىك كوممۋنيكاتسيالار قىزمەتىندە وتكەن ءباسپاسوز جيىنىندا سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ پاۆلودار وبلىسى بويىنشا دەپارتامەنتى باسشىسى دەنيس شاكەنوۆ ءمالىم ەتتى، دەپ حابارلايدى pavlodarnews.kz.

دەپارتامەنت باسشىسىنىڭ ايتۋىنشا، وسى جىلدىڭ ءبىرىنشى توقسانىندا تىركەلگەن قىلمىستاردىڭ سانى وتكەن جىلعىمەن سالىستىرعاندا 77 پايىزعا ارتقان. جەمقورلىق بويىنشا بۇرىنعىداي پاۆلودار مەن ەكىباستۇز كوش باستاپ تۇر. اۋداندار اراسىندا باياناۋىل الدىڭعى قاتاردا. مونيتورينگ قورىتىندىسى بويىنشا ەڭ جەمقورلىق جايلاعان سالالار جەر قاتىناستارى مەن اۋىل شارۋاشىلىعى بولىپ شىقتى. دەنيس شاكەنوۆ ەرەكشە رەزونانستى ىستەردى جۋرناليستەردىڭ ەسىنە سالدى.

اگەنتتىك بۇرىندارى ەكىباستۇز تۇكش ءبولىمىنىڭ مامانى عابدوللا شورمانوۆ ءوزىنىڭ سىبايلاسى باقىت داكەنايمەن بىرگە سەگىز جىل ىشىندە مونعوليادان 31 قونىس اۋدارۋشىلاردى الداپ كەلگەندىگى جونىندە حابارلاعان بولاتىن. شەنەۋنىك جەر تەلىمدەرىن بەرۋ جونىندە اكىمدىكتەگى لاۋازىمدى تۇلعالاردىڭ قولىن كوشىرىپ، جالعان قۇجات دايىنداپ كەلگەن. ودان كەيىن، ءوزى «گورۆودوكانال» مەن «گورەلەكتروسەت» ۇيىمدارىنا بارىپ اكىم اتىنان جاڭادان قونىستانۋشىلارعا تەز ارادا سۋ مەن جارىق تارتۋىن وتىنگەن. بۇل ءىسى ءۇشىن ول ورالمانداردان 150 مىڭنان 500 مىڭ تەڭگەگە دەيىن سىياقى الىپ وتىرعان. «بيىل شورمانوۆ پەن داكەنايدىڭ ارەكەتتەرىمەن بايلانىستى تاعى 20-دان استام قىلمىس تىركەلدى»، – دەدى دەنيس شاكەنوۆ. – بۇل مەملەكەتتىك جەر قورىنا جەكە تۇرعىن ءۇي قۇرىلىسى سالىنعان 20-دان استام جەر تەلىمى. تەرگەۋ بارىسىندا جوعارىدا اتالعان جەرلەر مەملەكەتكە قايتارىلىپ، ناتيجەسىندە زاڭدى تۇرعىدا قۇقىقتارى بۇزىلعان ازاماتتارعا بەرىلدى».

سپيكەر وعان قوسا، «فيتوسانيتاريا» رمك جەتەكشىسى نىعمەت بەلگىباەۆتىڭ سوتقا دەيىنگى تەرگەۋى اياقتالعانىن اتاپ ءوتتى. تەرگەۋ بويىنشا شەنەۋنىك عيماراتتى جىلىتۋ ماۋسىمىنا دايىنداۋ جونىندە مەملەكەتتىك ساتىپ الۋدىڭ جالعان كەلىسىمشارتىن جاساعانى، قازىنالىق ارنايى تەحنيكانى قولدانعانى ءۇشىن كاسىپكەرلەر بەرگەن بيۋدجەتتىك اقشانى يەمدەنىپ العانى انىقتالدى. نىعمەت بەلگىباەۆ كەلتىرىلگەن 500 مىڭ تەڭگە شىعىندى مەملەكەتكە تولىق قايتاردى.

دەنيس شاكەنوۆتىڭ ايتۋىنشا، شەنەۋنىكتەردىڭ ۇستالۋىنان كەيىن جەمقورلىققا قارسى كۇش قۇقىقبۇزۋشىلىق جاعدايىن مۇقيات سارالاپ، بۇدان بىلاي مۇنداي جاعدايلارعا جول بەرمەۋ ءۇشىن شارا قولدانادى. مىسالى، پاۆلودار وبلىسىنىڭ اۋىل شارۋاشىلىعى باسقارماسىندا دۇزدەمباەۆ ءىسىن تەرگەۋدەن كەيىن جەمقورلىققا قارسى قىزمەتتىڭ ۇسىنۋىمەن سۋبسيديا الۋ ءۇشىن قايتالانىپ بەرىلگەن ءوتىنىشتى قاراۋ ءتارتىبى قاراستىرىلعان.

 

ۇقساس جاڭالىقتار

Back to top button