«قانداي عاجاپ بۇل الەم»

وتكەن اپتادا قازاقستان مەملەكەتتىك ورتالىق مۋزەيىندە بەلگىلى ساياحاتشى-فوتوسۋرەتشى تايماس نۇرتاەۆتىڭ «جەر شارى: قانداي عاجاپ بۇل الەم!» اتتى جەكە فوتوكورمەسى ءوتتى.

الەمنىڭ تالاي ەلىن ارالاپ، تابيعاتتىڭ تالاي عاجايىپ بەينەسىن فوتوكامەرانىڭ وبەكتيۆىنە ءىلىپ، جەر بەتىندەگى نەبىر تاماشا مەكەندەردىڭ سۋرەتتەرىنەن اسەمدىك گالەرەياسىن جاساعان تايماس قۋانىش ۇلىنىڭ ەڭبەگى، شىنىندا دا، اتاپ وتۋگە تۇرارلىق. العاش فوتوىزدەنىستەرىن «زەنيتتەن» باستاپ، بۇگىنگى ساندىق جۇيەمەن جۇمىس ىستەيتىن كاسىبي اپپاراتتارعا دەيىنگى ارالىقتا سان ءتۇرلى كاسىبي فوتواپپاراتتارمەن جۇمىس ىستەگەن فوتوسۋرەتشىنىڭ قولتاڭباسى كورمەدەن انىق بايقالادى.

ت.نۇرتاەۆتىڭ بۇل سالاداعى العاشقى جۇمىسى 2006 جىلدان باستالادى. سول جىلى ول العاش رەت حان-ءتاڭىرى تاۋ شاتقالىنا بارىپ، تابيعاتتىڭ اسەم كورىنىسىنە تاڭ قالىپ، سول كەزدەن-اق فوتوونەرىنە دەن قويدى. سولايشا بۇل جۇمىسىن جالعاستىرىپ، قازاق جەرىنىڭ اسەم تابيعاتىن الەمگە پاش ەتۋدى كوزدەگەن فوتوگراف ىلە الاتاۋىنىڭ اسەم جەرلەرىن، الماتى مەن الماتى وبلىسى اۋماعىن، كولساي، حان-ءتاڭىرى، شارىن كولى مەن شارىن شاتقالىن، «التىنەمەل» ۇلتتىق قورىعى، «باياناۋىل» ۇلتتىق ساياباعى، جاسىباي، مارقاكول، بۋراباي، زايسان، قاراسۋ، قاراكول، قايىڭدى، ۇلكەن الماتى وزەنى، بۇقتىرما سۋقويماسى، كاسپي تەڭىزى، اق-تاۋ، شاكەلمەس، ايعايقۇم، ماڭعىستاۋ، ءۇستىرت شاتقالى، شاقپاقپاي ساي شاتقالى، ۇشقوڭىر جايلاۋى، اقكەرگەشىن، اقتولاعاي قىرقاسى جانە ت.ب. كوپتەگەن كورىكتى مەكەندەردى ارالاپ، قايتالانباس فوتوسۋرەتتەر جاسادى. «جەر شارى: قانداي عاجاپ بۇل الەم!» كورمەسىنىڭ نەگىزگى بولىگىن قۇرايتىن «قازاقستان تابيعاتىنىڭ مارجاندارى» اتتى فوتوجۇمىس جوعارىدا ايتىپ وتكەن ەلىمىزدىڭ تابيعاتى جايىندا سىر شەرتەدى.

تايماس نۇرتاەۆتىڭ قازاقستاننان باستالعان جۇمىسى كەيىن الىس-جاقىن شەتەل ساياحاتتارىنا جالعاسىپ، زور شابىتپەن الەمنىڭ قايتالانباس تابيعي عاجاپتارىن بەينەلەدى. رەسەي، بىرىككەن اراب امىرلىگى، نەپال سياقتى ەلدەردە بولىپ، ۇمىتىلماس اسەر العان فوتوسۋرەتشىنىڭ تۋىندىلارى جەر بەتىندەگى ەڭ ءىرى ءشول دالا – ساحارانى، ادەمى ارالداردىڭ ءبىرى – گرەنلانديانى، تاريحي يتاليا مەن «مۇزدى ەل» يسلانديانىڭ اسەرلى جەرلەرىندە ءىزى قالدى. قىتايدا ءجۇرىپ تۇسىرگەن سۋرەتتەرى – ۇلتتىق تسزيۋچجايگوۋ پاركىندەگى جاسىل-سارى لي وزەنى، حۋانلۋنگتىڭ كوگىلدىر كولى، «ۇشقىش» تاۋلار اۆاتاردى اينىتپاي كوز الدىڭىزعا اكەلىپ، ەرەكشە اسەرگە بولەيدى.

وتكەن جىلى ت.نۇرتاەۆ سولتۇستىك القاپتاعى شپيتسبەرگەن ارالى اۋماعىن ارالاپ، ونىڭ تابيعاتى مەن جانۋارلار الەمىنە ساياحات جاساپ، اق ايۋلار مەن يتبالىقتاردى، مورجدار مەن كيتتەردى سۋرەتكە ءتۇسىردى. سونداي-اق، نورۆەگياداعى لوفوتەن ارالىنىڭ، ارگەنتينا مەن برازيليانىڭ تابيعاتىن، جەردىڭ وڭتۇستىك ايماعى – چيليدەگى گاۋچو سالت اتتىلارىن، تورەس ۇلتتىق ساياباعىن، گرەي كولى مەن پاين جەرىن فوتوعا ءتۇسىرىپ، ولاردىڭ ەرەكشەلىكتەرىن كورسەتتى. سونىمەن بىرگە كەنياعا بارىپ، دۇنيەجۇزىنە بەلگىلى ماساي مارا ۇلتتىق قورىعىنداعى افريكانىڭ جانۋارلار الەمىن – پىلدەر، جولبارىستاردى، بارىستار مەن كەرىكتەردى، بەگەموتتار مەن قولتىراۋىنداردى، زەبرالاردى جانە ناكۋرا كولىنىڭ ادەمى كۇلگىن قوقيقازدارىن سۋرەتكە ءتۇسىرىپ، كوپشىلىككە ۇسىندى.

سونىمەن قاتار فوتوسۋرەت شەبەرى جىلدار بويى الەمنىڭ الىس شالعايلارىنداعى ەڭ ادەمى جەرلەرىن ۇشاقپەن ارالاپ، كامچاتكانى: اتاقتى كورياك، اۆاچين، كوزەل جانارتاۋلارىن; تىنىق مۇحيتىنداعى قورىم جانە اۆاچين شىعاناعىن; سولوۆەتس ارالدارىن; كيجي جانە ت.ب. جەرلەردى جوعارىدان تۇسىرسە، بىرىككەن اراب امىرلىگىندە ارابيا ءشولىنىڭ تاڭعى، كەشكى مەزگىلدەرىن اۋە شارىنان فوتوعا تۇسىرگەن. جاياۋ ءجۇرىپ گيمالايدى (نەپال)، دەلتاپلاننان، بيىكتىگى جونىنەن الەمدە جەتىنشى ورىندا تۇراتىن 8167 مەترلىك دحاۋلاگيري، ونىنشى ورىندا تۇراتىن 8091 مەترلىك اناپۋرنۋ تاۋلارىن جانە فەۆا كولىن فوتوعا ءتۇسىرىپ، ەرەكشە سۋرەتتەر جاساعان.

وسىلايشا كورمەگە 150-دەن اسا فوتوسۋرەتتەرىن ۇسىنعان جيھانكەز-فوتوگرافتىڭ ەڭبەكتەرى – الماتىلىقتار ءۇشىن الەمنىڭ كورىكتى جەرلەرىنىڭ تابيعاتىن كورۋگە مۇمكىندىك بەرىپ، شىن مانىندە الەمنىڭ عاجاپ كورىنىسكە تولى ەكەنىنە رياسىز سەندىردى

 

 

ۇقساس جاڭالىقتار

Back to top button