25 Сәуір 2018, 15:49 1678 0 Білім Анар ЛЕПЕСОВА

Бұдан былай ЖОО-лар оқу ақысын өздері белгілейді

Жоғары оқу орындары ақылы оқудың бағасын өздері белгілеуі мүмкін. Жоғары оқу орындарының академиялық және басқару дербестігін кеңейту мәселелері жөніндегі заң жобасында осындай жаңашылдық бар. Бұл туралы Білім және ғылым министрі Ерлан Сағадиев мәлімдеді. 

Ведомство  басшысының айтуынша, жаңа заң жобасында жоғары білімнің бағасы гранттан арзан немесе қымбат болмауы керек деген норманы алып тастау ұсынылып отыр.

"Біз осы норманы алып тастауды жоспарлап отырмыз. Жоғары оқу орындары өздері қажет деп тапқан ақыны бекітетін болады және тиісті есебін ұсынады", — деді министр.

Оның айтуынша, бұл мемлекет бөлетін гранттарға әсер етпейді.

"Біз грант бөлеміз ғой, бағасы өзгермейді. Көп адам біздің білімді тым арзан деп есептейді. Жоғары оқу орындарында білім алу тым қымбат деп ойлайтындар да аз емес. Сондықтан жоғары оқу орындарына ақылы бөлімдердегі оқу құнын өздерінің шешуіне мүмкіндік беру дұрыс деп санаймыз. Өйткені көп адам бәрібір ұлттық жоғары оқу орындарына грантқа түседі", — деді Сағадиев.

Жоғары оқу орындарының академиялық және басқару дербестігін кеңейту мәселелері жөніндегі заң жобасын бүгін мәжіліс депутаттары бірінші оқылымда мақұлдады. Құжатта еңбек кодексі мен үш заңға өзгерістер мен толықтырулар енгізу көзделген.

 

Соңғы жаңалықтар