رەسەي كومپانيالارىن قايىستىرعان «قارا دۇيسەنبى»

 

اقش رەسەيگە قاتىستى جاڭا سانكتسيالاردى ەنگىزگەننەن كەيىن ماسكەۋ  نارىعىنداعى  اكتسيالار بىردەن قۇلدىراي باستادى.اقپارات قۇرالدارىنىڭ دەرەگىنشە، نارىقتاعى احۋال «رۋسال»، En+ كومپانيالارىن جانە سبەربانكتى  ۇلكەن  شىعىنعا باتىرعان. ماسكەۋ بيرجاسىنداعى وزگە اكتسيالاردىڭ دا قۇنى ارزانداپ بارادى.

Forbes رەسەيلىك ميللياردەرلەردىڭ ءبىر تاۋلىك ىشىندە – 9 ءساۋىر كۇنى 12 ملرد دوللاردان استام بايلىعىن جوعالتقانىن مالىمدەدى. ىلە-شالا  Bloomberg اگەنتتىگى رەسەي فەدەراتسياسىنىڭ باي-باعلاندارى ءبىر ساتتە 16 ملرد دوللارعا جۋىق قارجىسىن جەلگە ۇشىرىپ العانىن جازدى. كۇن سايىن جاڭارتىلىپ وتىراتىن Bloomberg Billionaires Index رەيتينگىنە ەنگەن رەسەيلىك 27 وليگارحتىڭ 26-سى وراسان زور شىعىنعا ۇشىراعان. ماسكەۋ بيرجاسىنداعى اكتسيالار قۇنىنىڭ تومەندەۋى سالدارىنان «نورنيكەل» كومپانياسىنىڭ باس ديرەكتورى ۆلاديمير ءپوتانيننىڭ قالتاسى 2،25 ملرد دوللارعا جۇقارسا، «لۋكويل» باسشىسى ۆاگيت الەكپەروۆ 1،37 ملرد دوللارىنان ايىرىلدى. «رەنوۆا» كومپانياسىنىڭ يەسى ۆيكتور ۆەكسەلبەرگ 1،28 ملرد دوللارىن جوعالتىپ، En+ جانە «رۋسال» كومپانيالارىنىڭ قوجايىنى ولەگ دەريپاسكا 905 ملن دوللارعا شىعىندالدى. «رۋسال» كومپانياسى اقش قارجى مينيسترلىگى ەنگىزگەن سانكتسيا كومپانيانى تەحنيكالىق دەفولتقا ۇشىراتىپ، كومپانيانىڭ كاسىبىنە كەرى ىقپال ەتەتىندىگىن مالىمدەپ ۇلگەردى.

ايتا كەتەيىك، اقش بيلىگى 6 ءساۋىر كۇنى بىرقاتار رەسەيلىك لاۋازىمدى تۇلعالار، كاسىپكەرلەر مەن كومپانيالارعا قاتىستى سانكتسيا ەنگىزەتىندىگىن حابارلاعان بولاتىن. ۆاشينگتوننىڭ بۇل ارەكەتى رەسەي نارىعىندا «قارا دۇيسەنبىنىڭ» قالىپتاسۋىنا اسەر ەتتى. مۇنايدىڭ بەكىتىلگەن باعاسىنىڭ وسۋىنە قاراماستان، ماسكەۋ بيرجاسىنىڭ يندەكسى 2014 جىلدىڭ ناۋرىز ايىنان بەرى العاش رەت ۇلكەن شىعىنعا ۇشىرادى. ال ءرۋبلدىڭ دوللارعا قاتىستى قۇنى سوڭعى جارتى جىل ىشىندەگى ەڭ تومەنگى كورسەتكىشكە دەيىن ارزاندادى. دوللاردىڭ كۋرسى 2،49 رۋبلگە ءوسىپ، اقش دوللارىنىڭ قۇنى 60،65 ءرۋبلدى قۇراسا، ەۋرو 74،70 رۋبلگە جەتتى. بىراق رەسەي ۆاليۋتاسىنىڭ كۇرت تومەندەگەنىنە قاراماستان Brent ماركالى مۇنايدىڭ باعاسى 1 باررەلىنە 68،56 دوللارعا دەيىن قىمباتتادى.

دەسەك تە، رەسەي پرەمەر-ءمينيسترى دميتري مەدۆەدەۆ سانكتسياعا ىلىككەن كومپانيالارعا قولداۋ كورسەتەتىنىن مالىمدەپ ۇلگەردى. مەملەكەت پەن كاسىپكەرلىكتىڭ كىرىگۋى ەش ەلگە جاقسىلىق اكەلمەگەن ەدى. قالىپتاسقان جاعدايدىڭ قايدا اپارىپ سوعارىن كىم ءبىلسىن…

 

 

ۇقساس جاڭالىقتار

Back to top button