اقىشەۆ: تەڭگە رۋبلگە بايلانىپ قالعان جوق

تەڭگە باعامىنىڭ كۇرت قۇلدىراۋىنا ەلىمىزدىڭ ساۋدا سەرىكتەسى – رەسەيگە قارسى سانكتسيالار اسەر ەتكەن. بۇل تۋرالى  ۇلتتىق بانك توراعاسى دانيار اقىشەۆ مالىمدەدى.

«تەڭگە باعامى سىرتقى جانە ىشكى نارىقتارعا تاۋەلدى.  سوڭعى بىرنەشە كۇنگە دەيىن بارلىق ماكروەكونوميكالىق پارامەتر تۇراقتى بولدى. ەڭ الدىمەن ول – مۇنايدىڭ جوعارى باعاسى جانە ساۋدا سەرىكتەستەرى ۆاليۋتاسىنىڭ تۇراقتىلىعى. وكىنىشكە قاراي، اقش-تىڭ رەسەيگە قارسى سانكتسيالارى رەسەيدىڭ قور نارىعى مەن ۆاليۋتا نارىعىن قۇبىلتتى.  رەسەي ءبىزدىڭ ساۋدا سەرىكتەسىمىز، ەاەو-عا مۇشە ەلدەرمىز. ارينە، ءبىز ءبىر-بىرىمىزگە ىقپال ەتەمىز. سوندىقتان وسى جاعدايدا رەسەيدە بولىپ جاتقان وقيعالار قازاقستانعا اسەرىن تيگىزەدى»، — دەدى اقىشەۆ.

ۇلتتىق بانك توراعاسى تەڭگە رۋبلگە بايلانىپ قالماعانىن اتاپ ءوتتى.

«ء;بىز ءبىر-بىرىمىزگە تاۋەلدى بولعانىمىزبەن، تەڭگە رۋبلگە بايلانىپ قالعان جوق. نەگە رۋبل قاتتى وزگەرىپ، تەڭگە از قۇبىلدى؟ ءبىرىنشى سەبەپ، قازاقستان قانداي جاعداي بولماسىن سانكتسيالارعا تىكەلەي دە، جاناما دا ىلىكپەيدى. سەبەبى ءبىزدىڭ مەملەكەت بارلىق ەلمەن جاقسى قارىم-قاتىناستا»، — دەدى ول.

اقىشەۆ ۇلتتىق بانك ۇكىمەتپەن بىرلەسىپ ۆاليۋتا نارىعىنداعى جاعدايدى زەرتتەپ جاتقانىن ايتتى.

«ۇلتتىق بانك تەڭگە باعامىنا قاتىستى بولجام جاسامايدى. حالىققا اسىعىس شەشىم قابىلداماۋعا كەڭەس بەرەمىن. نارىقتا قازىر سۇرانىس پەن ۇسىنىس بالانسى ءجۇرىپ جاتىر. مۇنىڭ ءبارى سىرتقى شوكپەن، ياعني رەسەيدەگى جاعدايمەن بايلانىستى. ال قازاقستاندا ونداي وزگەرىسكە ەش سەبەپ جوق. تەڭگە كۇشەيۋى دە، السىرەۋى دە مۇمكىن. ايىرباس پۋنكتەرىندە تەڭگە دە، شەتەلدىك ۆاليۋتا دا جەتكىلىكتى. حالىق دۇرلىگىپ جاتقان جوق»، — دەدى اقىشەۆ.

ۇلتتىق بانك توراعاسىنىڭ ايتۋىنشا، ينتەرۆەنتسياعا قاتىستى  اقپارات 7-8 مامىردا جاريالانادى.

 

ۇقساس جاڭالىقتار

Back to top button