Төрт елдің мамандары сарыағаштық бүлдіршіннің ісін тергеуге кірісті

Төрт елдің мамандары сарыағаштық бүлдіршіннің ісін тергеуге кірісті

Зорлық құрбаны болған сарыағаштық баланың ісін зерттеуге қазақстандық сарапшылардан бөлек шетелдік мамандар жұмылдырылды. Бұл туралы қоғам қайраткері Аружан Сайын әлеуметтік желідегі парақшасында хабарлады.  "Бүгін қазақстандық және үш ел – Грузия, Қырғызстан және Ресейден келген сарапшылардың қатысуымен кезекті тергеу шаралары орындалды. Сарапшылардан ақпаратты таратпау жөнінде қолхат алынған. Әділетті әрі шынайы қорытынды шығады деп үміттенеміз. Сексуалды сипаттағы зорлық-зомбылық бойынша тергеу де, сот процесі де үнемі жабық режимде өтеді, істің мән-жайын жариялауға ешкімнің хақы жоқ", — деп жазды Сайын Facebook желісіндегі жеке парақшасында. Оның айтуынша, келешекте басқа да сараптамалар жүргізіледі, ал түсіндіру жұмысы ҚР Бас прокуратурасының құзыретінде. Қоғам қайраткері осы сәтте бала мен оның анасына моральдық қолдау көрсетіп отырғандардың бәріне алғысын білдірді. "Анасы алғысын айтып жатыр. Әлбетте, моральдық жағынан оған өте қиын, дегенмен ақырына дейін баласын қорғауға бел буды", — деп атап өтті Аружан Сайын.