سارىاعاشتا جاعداي تۇزەلىپ كەلەدى

قاڭتارداعى قاتتى داۋىل مەن تاسقىننان كەيىن ەكى بىردەي وبلىستا بىرنەشە اۋداننىڭ زارداپ شەككەندىگى تۋرالى وتكەن نومىرىمىزدە بايانداعان ەدىك. قۇدايعا شۇكىر، جۇرت بولىپ جۇمىلا كىرىسكەن دۇنيەنىڭ ناتيجەسى دە بولادى. جامبىل وبلىسىنداعى تالاس اۋدانى مەن سارىسۋ اۋداندارىنداعى زارداپ شەككەن ايماقتاردا قۇرىلىس قارقىندى جۇرگىزىلۋدە.

دۇلەي داۋىلدان وڭتۇستىك قازاقستان وبلىسى دا زارداپ شەككەنى بەلگىلى. سوزاق اۋدانىنا قاراستى تاۋكەنت ەلدى مەكەنىنىڭ جۇرتشىلىعى كوپ زارداپ شەكتى. سوزاق جانە سارىاعاش اۋداندارىندا بولعان دۇلەي داۋىل مەن توپان سۋدىڭ سالدارىنان ورىن العان اپاتتى جاعداي ەشكىمدى بەي-جاي قالدىرمادى. بۇعان ماقتارالدىق جۇرتشىلىقتىڭ دا قابىرعاسى قايىسىپ وتىر. تەرىسكەيدەگى تاۋكەنت ەلدى مەكەنىندەگى زارداپ شەككەن تۇرعىندارعا ماقتاارال اۋدانىنان قول ۇشىن بەرۋگە 16 جاۋاپكەرشىلىگى شەكتەۋلى سەرىكتەستىكتەر مەن كوممۋنالدىق مەكەمەلەردەن قۇرىلعان 150 ادام ارنايى بەكىتىلگەن اۆتوكولىكتەرىمەن جەتكىزىلىپ، قۇرىلىس جۇمىستارىنا بەل شەشە كىرىسىپ كەتىپتى. «كوپ تۇكىرسە كول بولادى» دەمەكشى، اپاتتىڭ ورنىن قايتا قالپىنا كەلتىرۋ ءۇشىن جەرگىلىكتى تۇرعىندار ايانباي ەڭبەك ەتۋدە. ءبىرى – قۇرىلىس جۇمىستارىنا بەلسەنە ارالاسسا، ەندى ءبىرى – ازىق-ت ۇلىگىن تاسىپ، الەك بولىپ ءجۇر. مۇنىڭ ءبارى «جۇمىلا كوتەرگەن جۇكتىڭ جەڭىل بولاتىنىن» دالەلدەگەندەي. ءارى ماقتارالدىقتار اپاتتىڭ سالدارىن جويۋ ءۇشىن 15 ملن. تەڭگە كولەمىندە قارجىلاي جانە زاتتاي كومەك قولىن سوزىپتى.

سارىاعاش اۋدانىندا توپان سۋ سالدارىنان اسفالت جولدار بويىنداعى 1 كوپىر، 12 وتكەلدى سۋ شايىپ كەتكەن ەدى. سونىمەن بىرگە، قوسىمشا 3 كوپىر، 8 تيۋبينگ، 1 قۇبىر سالۋ قاجەت. قازىر 9 وتكەلگە 127،3 ملن. تەڭگە شىعىن سمەتاسى دايىندالىپ وتىر. ال ءتورت كوپىرگە جسق دايىندالۋدا. بارلىق باعىتقا ۋاقىتشا كولىك قوزعالىسىنا جول اشىلدى. سونداي-اق، وتكەلدەردى قالپىنا كەلتىرۋ جۇمىستارى جۇرگىزىلۋدە. 22 قاڭتارعا دەيىن 1،4 شاقىرىم قاشىرتقى مەحانيكالىق تازالاۋدان وتكىزىلدى. ارنايى قۇرىلعان كوميسسيا ايماقتارعا كەلگەن شىعىن كولەمىن شامامەن انىقتادى – 209 ملن. 114 مىڭ تەڭگەنى قۇراپ وتىر. سونداي-اق، سۋ تاسقىنىنان زارداپ شەككەندەرگە كومەك كورسەتۋ ماقساتىندا اۋداندا ارنايى قور قۇرىلدى. بۇگىنگى تاڭعا قورعا كومەك رەتىندە 5 ملن. تەڭگە قارجى ءتۇستى. سۋ تاسقىنىنان زارداپ شەككەن وتباسىلارعا ارنايى ەسەپ شوت اشىلعان بولاتىن.

وبلىس اكىمىندە وتكەن سەلەكتورلىق جيىندا وبلىس اكىمى اسقار مىرزاحمەتوۆ سوزاق جانە سارىاعاش اۋداندارىندا زارداپ شەككەن تۇرعىن ۇيلەر مەن نىسانداردىڭ قۇرىلىس جۇمىستارىنىڭ قالاي جۇرگىزىلىپ جاتقانىن تىلگە تيەك ەتتى. سوڭعى دەرەكتەرگە سۇيەنسەك، سوزاق اۋدانىنداعى 1949 تۇرعىن ءۇيدىڭ 1171-ءنىڭ قۇرىلىسى تولىق بىتكەن ەكەن. ال قالعان 778 ءۇيدىڭ قۇرىلىس جۇمىستارى اياقتالۋدىڭ الدىندا تۇر. سونداي-اق اۋدانداعى 42 الەۋمەتتىك نىساننىڭ 31-ءنىڭ قۇرىلىسى اياقتالىپ، قالعان 11 نىساننىڭ قۇرىلىسى ەكى-ءۇش كۇندە بىتەتىن بولادى. ال 20 مەكتەپتىڭ 9-نىڭ قۇرىلىسى اياقتالعان. سونىمەن قاتار 8 اۋرۋحانانىڭ 7-ءۋى اياقتالىپ، قالعان 1-ءۋى ەرتەڭ بىتەدى.

سوزاق اۋدانى بويىنشا قۇرىلىس ماتەريالدارى بۇگىندە جەتكىلىكتى. وبلىس اكىمى اسقار مىرزاحمەتوۆ كۇندە سەلەكتورلىق وتىرىس وتكىزىپ، اپات سالدارىن جويۋ جۇمىستارىن ءوز باقىلاۋىندا ۇستاۋدا. بۇگىندە سوزاق اۋدانىنا وبلىستىڭ بارلىق اۋداندارىنان جينالعان 1184 جۇمىسشى كومەك كورسەتىپ، قۇرىلىستىڭ باسى-قاسىندا ءجۇر. اۋداندا جۇرگىزىلىپ جاتقان جۇمىستاردى ارنايى كوميسسيا قاداعالاۋدا.

ەڭ باستىسى، قۇرىلىس جۇمىستارى تولى­عىمەن اياقتالىپ، اپاتتان زارداپ شەككەن تۇرعىندار «ءوز ءۇيى، ولەڭ توسەگىنە» تەزىرەك ورالسا ەكەن. قىستىڭ كۇنى قىراۋدا باسپاناسىز، دالادا ءجۇرۋ كەز كەلگەن وتباسىنا وڭاي تيمەسى انىق. تابيعاتتان كەلگەن اپاتقا ەشكىم قارسى شىعا المايتىنى تاعى بەلگىلى. سوندىقتان تابيعات توسىن مىنەز تانىتپاسىن دەپ تىلەيىك.

گۇلزينا بەكتاسوۆا

ۇقساس جاڭالىقتار

Back to top button