اقوردا كورشI اقىسىن ۇمىتپايدى

وسى اپتادا استاناعا رەسمي ساپارمەن تاجiكستان پرەزيدەنتi ەمومالي راحمون كەلدi. جالپى، نازارباەۆ ورتالىق ازيا مەملەكەتتەرi باسشىلارىن ءوز ورداسىندا كەزەك-كەزەك قابىلداپ جاتقانداي كورiنۋi دە مۇمكiن. قىرعىز پرەزيدەنتiمەن اڭگiمە ويداعىداي وتسە دە، وزبەك پرەزيدەنتi كەلiسسوزدەر ناتيجەسiنە ونشا ىرزا بولماعانداي قالىپ تانىتتى. ال تاجiك ەلiنiڭ باسشىسى ەكونوميكالىق ارiپتەستiك تۋرالى اڭگiمەنi قايتا-قايتا پىسىقتاپ كەتتi.

قازاقستان كاسiپكەرلەرi تاجiك ەلiنiڭ تاۋ-كەن، اۋىلشارۋاشىلىق، گيدروەنەرگەتيكا، قۇرىلىس سالاسىنا ينۆەستيتسيا سالۋعا دايىن. تاجiك دەلەگاتسياسى قازاق ينۆەستيتسياسى ءۇشiن قولايلى جاعداي جاساۋعا ۋادە بەرiپ وتىر. 100 ميلليون دوللار كولەمiندە جارعىلىق كاپيتالى بار قازاق-تاجiك ينۆەستيتسيالىق قورىن قۇرۋ باستاماسى دا وسى ماقساتتا قۇرىلماق.

وسى جولى تاعى دا ورتالىق ازيا ايماعىنداعى سۋ-ەنەرگەتيكا كونسورتسيۋمىن قۇرۋ ماسەلەسi قوزعالدى. ەۋرازەق اياسىندا وسى تۇرعىدا ارنايى تۇجىرىمداما قابىلداۋ قاجەتتiگi پىسىقتالدى.

بiراق ازiرشە وسى ايماقتا جۇمىس iستەپ تۇرعان ۇيىمدار – ەۋرازەق، شىۇ، اوسشك، ۇقكۇ اياسىندا ىنتىماقتاستىقتى تەرەڭدەتە بەرۋ ماسەلەلەرi تالقىلاندى.

ايماقتاعى قاۋiپسiزدiك ماسەلەلەرi ايتىلعاندا، اۋعانستان تەرريتورياسىندا تىنىشتىق پەن تۇراقتىلىق ورناتۋ ماسەلەلەرiنە ايرىقشا كوڭiل ءبولiندi. راحمون جۋرناليستەردiڭ سۇراقتارىنا جاۋاپ بەرiپ وتىرىپ، بۇل ماسەلەلەردi نۇرسۇلتان نازارباەۆپەن تالقىلاعانىن، قازاق پرەزيدەنتiنەن شەكاراشىلاردى دايىنداۋ جونiندە كومەك سۇراعانىن ايتىپ قالدى.

اقوردا كورشiلەردi قابىلداۋدا بەلسەندiلiك تانىتۋدا. تاجiك پرەزيدەنتiنەن كەيiن اقوردا كرەمل باسشىسىن قابىلداماق.

رەسەيدiڭ جاڭادان انت قابىلداعان پرەزيدەنتi دميتري مەدۆەدەۆتiڭ قازاقستانعا العاشقى رەسمي ساپارى 15 مامىرعا جوسپارلانعان بولاتىن. بiراق ماسكەۋدەن جەتiپ جاتقان حابارلارعا قاراعاندا، بۇل اپتادا مەدۆەدەۆتiڭ ءوز كومانداسىن جاساقتاۋدان قولى بوساماسا كەرەك. رەسمي ساپار رەسمي تۇردە 22 مامىرعا بەلگiلەنiپ وتىر.

بۇل — مەدۆەدەۆتiڭ تۇڭعىش شەتەلدiك ساپارى. ادەتتە، جاڭادان سايلانعان پرەزيدەنتتiڭ العاشقى ساپارىنا ايرىقشا ءمان بەرiلەدi. ساراپشىلار وسى ساپار بارىسىن جوسپارلاۋدا قازاقستان مەن رەسەيدiڭ قارىم-قاتىناسىنىڭ بۇرىنعىداي تاتۋ كورشiلiك، تەڭ ارiپتەستiك دەڭگەيiندە ساقتالۋىنا ءمان بەرiلiپ وتىر دەيدi.

مەدۆەدەۆ العاشقى ۋاقىتتا پۋتين سالعان سارا جولدان تايا قويماس. سوڭعى ۋاقىتتا استانادا ورتالىق ازيا وداعىن قۇرۋ يدەياسىنىڭ جوعارعى مiنبەردەن قايتادان ايتىلا باستاۋىن كرەمل ەلەۋسiز قالدىرمايدى. بۇل ايماقتىڭ كۇشەيۋiنەن دە كرەمل ءوز مۇددەسiن iزدەيدi. سوندىقتان استانامەن تىعىز قارىم-قاتىناس ۇستاۋدىڭ رەسەي ءۇشiن ماڭىزى جوعارى بولسا كەرەك.

گۇلبيعاش وماروۆا

ۇقساس جاڭالىقتار

Back to top button