"كۇرەتامىردىڭ" "جاس قاناتقا" سىيلىعى

18-20 ءساۋiر كۇندەرi استاناداعى كونگرەسس-حولل سارايىندا جاس ورىنداۋشىلاردىڭ XVII رەسپۋبليكالىق "جاس قانات-2008" بايقاۋى ءوتتi. وعان ۇزدiك قاتىسۋشىلارعا جۇلدە تاعايىنداعان دەمەۋشiلەردiڭ قاتارىندا "كۇرەتامىر" قوعامدىق قورى دا اتسالىستى.

قازاقستاننىڭ قازiرگi زاماندىق مۋزىكا كەڭiستiگiنەن ءوز ورنىن ويىپ الاتىن "جاس قانات" بايقاۋى 1991 جىلى الماتى قالاسىندا تۇساۋ كەستi. تاۋەلسiزدiكتiڭ ءتول قۇرداسى – "جاس قانات" بايقاۋى بۇل جولى ۇستiمiزدەگi جىلى كامەلەتتiك 17 جاسىنا تولعان وزiندiك مەرەيتويىن استانا قالاسىنىڭ 10 جىلدىعى قارساڭىندا اتاپ ءوتتi. ءۇش كۇنگە سوزىلىپ، ەلەكتروندىق داۋىس بەرۋ ارقىلى باعالانىپ، "وليمپيادالىق جۇيە" بويىنشا وتكەن تارتىستى باسەكەنiڭ قورىتىندىسىندا باس جۇلدەنi – 1 ورىندى، ياعني التىن قاناتتى ورالدىق داۋرەنبەك مەرعاليەۆ جەڭiپ الدى. ول استانا قالاسىنىڭ جاڭا اكiمi يمانعالي تاسماعامبەتوۆتiڭ ارناۋلى سىيلىعىنا دا يە بولىپ، قر مادەنيەت جانە اقپارات مينيسترi ەرمۇحامەت ەرتiسباەۆتىڭ قولىنان كەز كەلگەن حالىقارالىق بايقاۋعا قاتىسۋعا قۇقىق بەرەتiن مەملەكەتتiك گرانت الدى. كۇمiس قانات – 2 ورىن يەگەرi دياس نۇسiپوۆپەن بiرگە تالدىقورعانعا اتتاندى. قولا قاناتتى 3 ورىن العان قوستانايلىق اناستاسيا پيكۋلەۆا ەنشiلەدi. جاس ورىنداۋشىلار ونەرiنە كەڭەس دۇيسەكەەۆ، نۇرجامال ۇسەنباەۆا، جانات باقتاەۆا، ت.ب. كورنەكتi ونەر قايراتكەرلەرi، تانىمال مۋزىكانتتار مەن انشiلەر ءادiل قازىلىق ەتتi. "جاس قانات" بايقاۋىنىڭ ديرەكتورى جانە پروديۋسەرi – قازاقستاننىڭ ەڭبەك سiڭiرگەن قايراتكەرi مۇرات ەرعاليەۆ، رەجيسسەرi – الەكساندر پونومارەۆ. "كۇرەتامىر" قو¬عامدىق قورى دا جاس تالانتتاردى قولداۋ ماقساتىندا ارنايى قۇتتىقتاۋ پاراقشالارىن شىعارىپ، 14 ۇمiتكەرگە جانە ءادiل قازىلارعا تابىستادى. ول قۇتتىقتاۋ پاراقشالارىندا "كۇرەتامىر" قورىنىڭ نىساناعا الىپ وتىرعان جالپى ماقسات-مۇراتتارىنان، اتقارىلۋعا تيiستi جۇمىس جوسپارلارىنان، سونداي-اق، جاستار ماسەلەسiنە قاتىستى الداعى ۋاقىتتا قولعا الىنۋعا تيiستi سان الۋان iس-شارالاردان قىسقاشا ماعلۇمات بەرiلگەن.

"كۇرەتامىر" قورى تاعايىنداعان ءۇش قوماقتى سىيلىق ءوز يەلەرiن – الماتىلىق ەركەبۇلان دۋداباەۆتى، سارىاعاشتىق گلافيرا بوگاتوۆانى جانە باس جۇلدەگەرلەردiڭ بiرەۋi – قوستانايلىق اناستاسيا پيكۋلەۆانى تاپتى. جۇلدەلi سىيلىقتاردى سالتاناتتى تۇردە تابىس ەتكەن بەلگiلi اقىن، كورنەكتi قوعام قايراتكەرi، "كۇرەتامىر" قورىنىڭ پرەزيدەنتi ايسۇلۋ قادىرباەۆا جاس بۋىن ونەرپازدارعا باعىشتاپ ايتقان ءوزiنiڭ جۇرەكجاردى لەبiزiن انالىق اق باتاعا تولى جىر شۋماقتارىمەن اياقتادى. بۇعان دەيiن جەڭiل مۋزىكالىق شوۋ رەتiندە عانا قارالىپ كەلگەن بايقاۋدىڭ ساحنالىق تورiنەن قازاق پوەزياسىنىڭ اسقاق ءۇنiنiڭ ەستiلۋi، قازاقى سالتپەن باتا بەرiلۋi – تۇڭعىش رەت.

جادىرا سەرIكقىزى

ۇقساس جاڭالىقتار

Back to top button