تۇركسوي – تۇركىستاندا

 

تۇركىستان قالاسىندا تۇركسوي حالىق­ارالىق ۇيىمى تۇراقتى كەڭە­سىنىڭ 35-وتىرىسى ءوتتى.  تۇركى الە­مىنىڭ 2017 جىلعى مادەني استاناسى اتانعان كيەلى شاھاردا حالىقارالىق تۇركى مادەنيەتى ۇيىمىنىڭ باس حاتشىسى دۇيسەن قاسەيىنوۆ، وڭتۇستىك قازاقستان وبلىسىنىڭ اكىمى جانسەيىت تۇيمەباەۆ، قر مادەنيەت جانە سپورت ءمينيسترى ارىستانبەك مۇحامەدي ۇلى، تۇركيا رەسپۋبليكاسىنىڭ مادەنيەت جانە تۋريزم ءمينيسترى نۋمان كۋرتۋلمۋش، قىرعىز رەسپۋبليكاسىنىڭ مادەنيەت، اقپارات جانە تۋريزم ءمينيسترى سۇلتانبەك جۇماعۇلوۆ جانە تۇركسوي-عا مۇشە ەلدەردىڭ مادەنيەت مينيسترلىكتەرىنىڭ وكىلدەرى، مادەنيەت قايراتكەرلەرى مەن تۇركى كەڭەسى، تۇركىتىلدەس مەملەكەتتەرىنىڭ پارلامەنتتىك اسسامبلەياسى، حالىقارالىق تۇركى اكادەمياسى، تۇركى مادەني ميراس قورى سەكىلدى حالىقارالىق ۇيىمداردىڭ وكىلدەرى باس قوستى.

كەڭەس وتىرىسىن اشىپ، جۇرگىزىپ وتىرعان قر مادەنيەت جانە سپورت ءمينيسترى ارىستانبەك مۇحامەدي ۇلى ءتۇبى ءبىر تۇركى حالىقتارىنىڭ بىرلىگى مەن ىنتىماعى ودان ءارى نىعايا بەرەتىنىن ايتىپ، تۇركىستان تۇركى الەمىنىڭ استاناسى اياسىندا وتكەن شارالارعا اتسالىسقان بارشا تۇركى حالقىنا العىس ايتتى. ال، حالىقارالىق تۇركى مادەنيەتى ۇيىمىنىڭ باس حاتشىسى دۇيسەن قاسەيىنوۆ تۇركىستاندا جىل اياسىندا وتكەن ءىس-شارالاردى جوعارى دەڭگەيدە ۇيىمداستىرىپ، وتكىزگەنى ءۇشىن وبلىس اكىمىنە العىسىن ءبىلدىردى.

باسقوسۋدا تۇركى ەلدەرىنىڭ مادەنيەت مينيسترلەرى ءتۇبى ءبىر باۋىرلاردىڭ مادەني-رۋحاني بايلانىسىن نىعايتۋ جولىندا يگىلىكتى ىستەردىڭ كوپتەپ وتۋىنە باسىمدىق بەرىلۋ قاجەتتىگىن كوتەرىپ، رۋحاني قالادا وتكەن مادەني شارالار بويىنشا ءوز پىكىرلەرىن ءبىلدىردى.

جيىندا ءسوز العان وبلىس اكىمى ج.تۇيمەباەۆ تۇركى مادەنيەتىن الەمگە تانىتاتىن حالىقارالىق دەڭگەيدەگى تۇراقتى كەڭەستىڭ ماڭىزدىلىعىنا توقتالىپ، تۇركى الەمىنىڭ استاناسى مارتەبەسى بۇيىرعان – ەجەلگى تۇركىستان قالاسىنا قوش كەلدىڭىزدەر، – دەدى.

«تۇركى حالىقتارى جاھاندانۋ زامانىندا الپاۋىت ەلدەرگە جۇتىلىپ كەتپەي، ۇلتتىق كودىن، وزىندىك ەرەكشەلىكتەرىن، مادەنيەتى، رۋحانياتى مەن مەملەكەتتىلىگىن ساقتاپ قالۋ ءۇشىن ءوزارا ىنتىماقتاستىعىن نىعايتىپ، بىرلىگىن بەكەمدەي ءتۇسۋى كەرەك. وسىنى ەسكەرسەك، «تۇركىستان – تۇركى الەمىنىڭ مادەني استاناسى» جىلى ەلباسىنىڭ رۋحاني جاڭعىرۋ جونىندەگى باستاماسىمەن ۇيلەسىپ، ماڭگىلىك ەل مۇراتتارىمەن ۇندەسىپ جاتىر. ءبىز وسىناۋ ماڭىزدى شارانى بارىنشا جوعارى دەڭگەيدە وتكىزۋگە بار كۇش-جىگەرىمىز بەن ىنتا-ىقىلاسىمىزدى سالدىق. وسى مارتەبەلى مىندەتتى جوعارى دەڭگەيدە اتقارۋ ماقساتىندا تۇركسوي حالىقارالىق ۇيىمى، قازاقستان رەسپۋبليكاسىنىڭ مادەنيەت جانە سپورت مينيسترلىگى، وڭتۇستىك قازاقستان وبلىسىنىڭ اكىمدىگى تاراپىنان جوسپارلى دا جۇيەلى جۇمىستار جۇرگىزىلدى»، ‒ دەدى وبلىس اكىمى.

سونداي-اق، ايماق باسشىسى تۇركى الەمىنىڭ 2017 جىلعى مادەني استاناسى اياسىندا تۇركىستان مەن شىمكەنت قالالارىندا ۇلى دالانى دۇبىرگە بولەگەن، تۇركى تۇتاستىعىن تەرەڭدەتە تۇسەتىن ءمانى مەن مازمۇنى استاسقان اۋقىمدى 40-تان استام شارا ۇيىمداستىرىلعانىن اتاپ ءوتتى. بۇعان قوسا، جانسەيىت تۇيمەباەۆ 2020 جىلى شىمكەنت قالاسى تمد ەلدەرىنىڭ مادەني استاناسى بولىپ جاريالانعانىن ايتىپ، بارشا تۇركى حالقىن اتالمىش ءىس-شارانىڭ قادىرلى قوناعى بولۋعا شاقىردى.

حالىقارالىق ۇيىمعا مۇشە مادەنيەت مينيسترلەرىنىڭ ءداستۇرلى كەزدەسۋىندە تۇركسوي-دىڭ وتكەن جىلعى اتقارعان ەسەبى تىڭدالىپ، 2017 جىلى تۇركى حالىقتارىنىڭ مادەني-رۋحاني بايلانىستارىن نىعايتۋ جولىندا اتقارىلعان شارالار تالقىلاندى. سونىمەن بىرگە، ۇيىمنىڭ الداعى جىلعا ارنالعان جوسپارى ماقۇلداندى. القالى جيىن ناتيجەسىندە قاتىسۋشىلار تۇركسوي تۇراقتى كەڭەسىنىڭ حححV وتىرىسىنىڭ دەكلاراتسياسى مەن جۇمىس حاتتاماسىن قابىلداپ، قول قويدى.

ۇقساس جاڭالىقتار

Back to top button