Нұрсұлтан Назарбаев: Қазақстан дипломатиясы диалогқа негізделген

Нұрсұлтан Назарбаев: Қазақстан дипломатиясы диалогқа негізделген

Нұрсұлтан Назарбаев:  Қазақстан дипломатиясы  диалогқа негізделген
ашық дереккөзі
Апта басында Елбасы Нұрсұлтан Назарбаев Астана клубының үшінші отырысына қатысты. Мемлекет басшысының айтуынша, Астана клубы –  Еуразия құрлығының болашағы үшін өзекті мәселелерді кең ауқымды сараптамалық деңгейде талқыға салатын бірегей өңірлік басқосу алаңы. Нұрсұлтан Назарбаев Астана клубының жұмысы аясында қазіргі заманның түйткілді мәселелерін шешудің тиімді жолдарын табуға болатынын айтты. – Біз әлемге соңғы уақытта жетіспей жатқан нәрсені бергіміз келеді. Бұл дегеніміз – жаһандық міндеттерді шешу үшін бірігу, ауызбіршілік пен толеранттылық таныту, – деді Қазақстан Президенті. Елбасы халықаралық терроризм мен экстремизмнің күшеюіне әкеп соқтыратын әлемдегі геосаяси және идеологиялық күйреудің белең алып келе жатқанын айтты. – Жаһандық дамудың жаңа беталысы Шығыс – Батыс бағыты бойынша геосаяси, геоэкономикалық және геоидеологиялық күйреудің белең алуы жағдайында жүріп жатыр. Саяси қуғын-сүргін, жоқшылық, білім беру мен денсаулық сақтау деңгейінің төмендігі халықаралық терроризм мен экстремизмнің күшеюіне себепші болып отыр, – деді Нұрсұлтан Назарбаев. Сонымен қатар, Нұрсұлтан Назарбаев өңірлік және халықаралық қауіпсіздіктің қазіргі жүйесінде бірқатар мәселелердің бар екенін атап өтті. Бұл мәселелер әлемнің экономикалық және технологиялық кеңістігін бөле-жарып, қауіп төндіретін санкциялық текетіреспен байланысты болып отыр. Елбасы жаһандық шиеленістің күшеюіне әсер ететін милитаристік пиғылдың таралуын, қарулану үдерісінің артып келе жатқанын, сондай-ақ, ядролық қаруды қолдану қаупінің қайта пайда болғанын айтты. Бұл ретте, халықаралық терроризм мен экстремизм апаттық ауқымға ие болғанын атап өтті. – Үшінші мыңжылдық басталғалы террорлық актілердің де, қаза болғандардың да саны он есе өсті. 104 елде террорлық акт жасалды. Бұл – әлемнің тең жартысынан астамы. Географиясы мен ауқымы жағынан біз, шартты түрде айтқанда, үшінші дүниежүзілік соғыс – террорға қарсы соғыс жағдайындамыз, – деді Нұрсұлтан Назарбаев. Сондай-ақ, Мемлекет басшысы соңғы 25 жылда әлемдегі халықаралық мигранттардың саны екі есе өсіп, бүгінде 250 миллион адамнан асқанын атап өтіп, бақылауға келмейтін жаһандық көші-қон мәселесіне назар аударды. Жаһандық деңгейде халық санының өсуі азық-түлік ресурстары тапшылығын өзекті мәселелер қатарына қосуда. Қазақстан Президенті аталған мәселелерді шешу үшін Еуразия құрлығы қауіпсіздік, экономикалық өсім мен диалог саласында біріктіруші күн тәртібін ұсына алатынын айтты. Нұрсұлтан Назарбаев «Бір белдеу, бір жол», Еуразиялық экономикалық одақ, Шанхай ынтымақтастық ұйымының экономикалық өлшемі бастамаларын, «Нұрлы жол» бағдарламасын және басқа да жобаларды іске асыру Еуразия құрлығының жаңа геоэкономикалық кескіндемесін жасауға мүмкіндік беретінін атап өтті. Жиын соңында Мемлекет басшысы жиында болған пікірталас орнықты жаһандық даму мақсатында әрі қарай нақты шешімдер қабылдау үшін септігін тигізетініне сенім білдірді.