Түркі тілдес елдер тарихында алғаш рет халықаралық балалар ән байқауы бастау алмақ. Ән байқауы «Bala Turkvizyon» деп аталады.
Тұңғыш рет қолға алынып отырған байқауға түркі әлемінің 20-дан астам елінен талантты балдырғандар қатысады. «Bala Turkvizyon» байқауының басты мақсаты – балалардың жан-жақты дамуына қолдау көрсету, жалпыадамзаттық құндылықтарды қалыптастыру, оларды сақтау және нығайту. Халықаралық жобаның тұсауы 30 мамыр күні Алматыда қазақстандық эстрада жұлдыздарының қатысуымен өтетін гала-концертте кесіледі. Осыдан кейін түркі ьілдес елдердің барлығында балалар арасында байқауға іріктеу туры басталады деп күтілуде. Ал Қазақстандағы іріктеу туры 8 маусым мен 1 тамыз аралығында өтпек. Отандық эстрада жұлдыздарынан құралған 16 тәлімгер республиканың 14 облысы мен Алматы және Астана қалаларына барып, 8-13 жас аралығындағы таланттарды іздейтін болады. Осы іріктеуден өткен 16 дарынды бала Алматы қаласына шақырылып, өнер саласындағы ұстаздардан вокалдық және әртістік шеберлікті, сахнадағы қозғалыстар мен хореографияны меңгереді. Ал «Bala Turkvizyon-2015» ұлттық байқауының финалы Астана қаласында өтеді. Сөйтіп, жеңімпаз халықаралық «Bala Turkvizyon-2015» байқауына жолдама алады. Аталмыш байқау «Жандану әлемі» қорының құрылтайшысы Әлия Назарбаеваның қамқорлығымен ұйымдастырылуда. Ал халықаралық байқаудың финалдық кезеңі Түрікменстанның Мары қаласында өтеді деп жоспарланған.