ۇيىمداستىرۋ ۇتىمدى جۇرگىزىلمەك

قر ۇكىمەت باسشىسى باقىتجان ساعىنتاەۆتىڭ توراعالىق ەتۋىمەن كەزەكتى ۇكىمەت وتىرىسى ءوتتى. جيىندا مەملەكەتتىك-جەكەمەنشىك ارىپتەستىگى ماسەلەلەرى مەن سۋ تاسقىنى قاتەرىنىڭ الدىن الۋ شارالارى، «جالپىعا بىردەي تەگىن كاسىپتىك-تەحنيكالىق ءبىلىم» جوباسىن جۇزەگە اسىرۋ جايى ءسوز بولدى. 

ۇكىمەت وتىرىسىنىڭ باسىندا پارلامەنت سەناتىنىڭ قاراۋىنا جونەلتىلگەن مەملەكەتتىك-جەكەمەنشىك ارىپتەستىگى تەتىكتەرىن جەتىلدىرۋ مەن جەڭىلدەتۋ بويىنشا ازىرلەنگەن زاڭ جوباسى تالقىلاندى. جاڭا زاڭ جوباسى راسىمدەردى وڭتايلاندىرىپ، جوبالاردى بەكىتۋگە ارنالعان. قۇجات بويىنشا، مەملەكەتتىك-جەكەمەنشىك ارىپتەستىگى جوبالارىن بەكىتۋ جانە ساراپتاما مەرزىمدەرىن 7 ايدان 3 ايعا دەيىن قىسقارتۋعا مۇمكىندىك بار. سونىمەن بىرگە، زاڭ جوباسى تۇتىنۋ كەپىلدىگىن 3 جانە ودان كوپ جىلعا بەرۋدى كوزدەيدى.

وسى ماسەلە بويىنشا ءسوز العان ۇلتتىق ەكونوميكا ءمينيسترى تيمۋر سۇلەيمەنوۆ قازىرگى ۋاقىتتا 139،5 ميلليارد تەڭگە بولاتىن 116 مەملەكەتتىك-جەكەمەنشىك ارىپتەستىگى كەلىسىمشارتى جاسالعانىنا توقتالدى. «70 ملرد تەڭگە سوماعا 53 نىسان پايدالانۋعا بەرىلدى، 69،5 ملرد تەڭگە سوماعا تاعى 63 نىسان سالىنىپ جاتىر. ولاردىڭ ىشىندە 45 ءبىلىم بەرۋ نىسانى، 27 دەنساۋلىق ساقتاۋ، 17 مادەنيەت جانە سپورت نىسانى، 7 سەرۆيستىك-دايىنداۋ ورتالىعى، «اقىلدى قالا»، ەنەرگەتيكا جانە جولاۋشىلار تاسىمالدارى سالاسىنداعى 3 رەسپۋبليكالىق جوبا بار»، – دەپ اتاپ ءوتتى مينيستر تيمۋر سۇلەيمەنوۆ.

تالقىلاۋ بارىسىندا ءسوز العان ينۆەستيتسيالار جانە دامۋ ءمينيسترى جەڭىس قاسىمبەك الماتىنىڭ ۇلكەن اينالما جولىنىڭ قۇرىلىسى قاشان باستالاتىنىن مالىمدەدى. ونىڭ ايتۋىنشا، قازىر مينيسترلىك جەتەكشىلىك ەتەتىن سالالار بويىنشا 6 مەملەكەتتىك-جەكەمەنشىك ارىپتەستىك جوباسى پىسىقتاۋ جانە ىسكە اسىرۋ ساتىسىندا تۇر. «ۇلكەن الماتى اينالما اۆتوموبيل جولىن سالۋ جانە پايدالانۋ» جوباسى بويىنشا 2015 جىلدىڭ قاڭتارىندا كونكۋرستىق راسىمدەر باستالدى. بۇگىندە تاراپتار كەلىسىمنىڭ بارلىق نەگىزگى شارتتارى بويىنشا ءوزارا مامىلەگە قول جەتكىزدى جانە كەلىسسوزدەر اياقتالۋ كەزەڭىندە. كونتسەسسيا شارتىن 5 جەلتوقساندا بەكىتۋ جوسپارلانۋدا»، – دەدى مينيستر.

مينيستر كەلتىرگەن دەرەكتەرگە سۇيەنسەك، كەلىسىمشارتتار سانى جونىنەن قاراعاندى، قوستاناي جانە وڭتۇستىك قازاقستان وبلىستارى كوش باستاپ تۇر. ال ينۆەستيتسيالار كولەمى بويىنشا اقتوبە وبلىسى مەن استانا قالاسى العاشقى ورىندا. تيمۋر سۇلەيمەنوۆتەن وزگە دە ۇكىمەت مۇشەلەرىنىڭ باياندامالارىن تىڭداعان پرەمەر-مينيستر باقىتجان ساعىنتاەۆ ۇلتتىق ەكونوميكا مينيسترلىگىنە جوبالاردى ىرىكتەۋ تەتىكتەرىن پىسىقتاپ، ۇيىمداستىرۋ شارالارىن رەتتەۋدى تاپسىردى.

ۇكىمەت وتىرىسىندا قارالعان ەكىنشى ماسەلە – «جالپىعا بىردەي تەگىن كاسىپتىك-تەحنيكالىق ءبىلىم» جوباسى. اتالمىش جوبا جونىندە ءبىلىم جانە عىلىم ءمينيسترى ەرلان ساعاديەۆ پەن ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا باياندادى. ايتا كەتەيىك، بۇل جوبا بيىلعى جىلدان ىسكە اسىرىلا باستاعان. قازىرگى ۋاقىتتا 817 كوللەدج جۇمىس ىستەيدى. ونىڭ 473-ءى – مەملەكەتتىك بولسا، 344-ءى – جەكەمەنشىك. ءبىلىم جانە عىلىم ءمينيسترىنىڭ ايتۋىنشا، ءبىلىم بەرۋدى جانە عىلىمدى دامىتۋدىڭ 2016-2019 جىلدارعا ارنالعان مەملەكەتتىك باعدارلاماسى شەڭبەرىندە جەرگىلىكتى بيۋدجەتتەن 2900 ورىندىق 4 كوللەدجدىڭ قۇرىلىسى، 520 ورىندىق 3 جاتاقحانانى سالۋ جانە جوندەۋ جۇمىستارى قاراستىرىلىپ وتىر. ەرلان ساعاديەۆتىڭ بايانداماسىنا سۇيەنسەك، باعدارلاما شەڭبەرىندە وقىتۋ قىسقا مەرزىمدى كۋرستار بويىنشا جۇزەگە اسىرىلادى ەكەن. بيىلعى جىلى 71 مىڭ ادامدى وقىتۋ كوزدەلگەن. قازىرگى ۋاقىتتا قىسقا مەرزىمدى وقىتۋعا 61 مىڭ ادام جىبەرىلىپتى.

ال ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا باعدارلاماعا قاتىسۋشىلار ستيپەنديامەن، ءبىر رەتتىك ىستىق تاماقپەن، جولاقىمەن قامتاماسىز ەتىلەتىندىگىن اتاپ ءوتتى. تامىز ايىنان بەرى جۇمىس بەرۋشىلەردىڭ وقۋ ورتالىقتارى بازاسىندا 3 مىڭنان استام ادام وقىپ جاتىر. «باستاۋ-بيزنەس» جوباسى بويىنشا 15 مىڭنان استام ادام وقىتۋمەن قامتىلعان. اعىمداعى جىلى – 26 مىڭ، جوسپار كەزىندە قىسقا مەرزىمدى كۋرستاردا 61 مىڭ ادام وقىدى. «جالپى، 2021 جىلعا دەيىن باعدارلاما بويىنشا 500 مىڭ ادامدى وقىتۋ كوزدەلگەن»، – دەدى تامارا قاسىمقىزى.

سونىمەن قاتار، جيىندا وسى ماسەلە بويىنشا بىرقاتار وبلىس باسشىلارى ەسەپ بەردى. تاقىرىپتى قورىتىندىلاۋ كەزىندە باقىتجان ءابدىر ۇلى «جالپىعا بىردەي تەگىن كاسىپتىك-تەحنيكالىق ءبىلىم» جوباسىن جۇزەگە اسىرۋ كەزىندەگى باستى ماسەلە جۇمىسپەن قامتۋ ەكەندىگىن اتاپ ءوتتى. ودان كەيىن بولىنەتىن كرەديتتەر سوماسىن ارتتىرۋ ماسەلەسىنە توقتالدى. ال اتالمىش جوبا جۇمىسىن باقىلاۋ پرەمەر-ءمينيستردىڭ ورىنباسارى ەربولات دوساەۆقا تاپسىرىلدى.

كۇن تارتىبىندەگى كەلەسى ماسەلە – سۋ تاسقىنى قاۋپىنىڭ الدىن الۋ بويىنشا قولعا الىنعان شارالار. بۇل ماسەلە جونىندە ىشكى ىستەر ءمينيسترى قالمۇحانبەت قاسىموۆ پەن اۋىل شارۋاشىلىعى ءبىرىنشى ۆيتسە-ءمينيسترى قايرات ايتۋعانوۆ ءسوز الدى. ۇكىمەت وتىرىسىندا بەلگىلى بولعانداي، ىشكى ىستەر مينيسترلىگى «سۋ تاسقىنى قاۋپىنىڭ الدىن الۋ جانە ولاردى جويۋ بويىنشا 2017-2020 جىلدارعا ارنالعان شارالار كەشەنى» جول كارتاسىنىڭ ورىندالۋىنا باقىلاۋ جۇرگىزەدى. اتالعان جول كارتاسىندا 826 ءىس-شارا قاراستىرىلعان. ونىڭ ىشىندە اۋماقتار مەن ەلدى مەكەندەردى تاسقىن سۋلاردىڭ كەسىرىنەن قورعاۋدى قامتاماسىز ەتۋ، گيدروتەحنيكالىق قۇرىلىستاردى جوندەۋ بويىنشا، سونداي-اق، ۇلتتىق گيدرومەتەورولوگيالىق قىزمەتتى دامىتۋ مەن جاڭعىرتۋ ماسەلەلەرى قاراستىرىلعان. «قازىرگى ۋاقىتتا جوسپاردى قارجىلاندىرۋ شەڭبەرىندە 2017 جىلعى 10 قىركۇيەكتەن ۇزىندىعى 2،5 شاقىرىم بوگەننىڭ ەكى ۋچاسكەسىندە قوندىرعىلار قۇرۋ بويىنشا جۇمىستار باستالدى، ورىندالعان جۇمىستاردىڭ كولەمى 80 پايىزدان استى»، – دەپ اتاپ ءوتتى قالمۇحانبەت قاسىموۆ.

ال اۋىل شارۋاشىلىعى ءبىرىنشى ۆيتسە-ءمينيسترى قايرات ايتۋعانوۆ سۋ تاسقىنى قاۋپىنىڭ الدىن الۋ ماقساتىندا مينيسترلىك جانىنان سۋ تاسقىنىنا قارسى كوميسسيا قۇرىلعاندىعىن، بارلىق رەسپۋبليكالىق سۋ قويمالارىندا كەزەكشىلىك كەستەسى بەكىتىلىپ، باسسەين ينسپەكتسيالارىنا بيىل قاراشا ايىنىڭ سوڭىنا دەيىن رەسپۋبليكالىق مەنشىكتەگى گيدروتەحنيكالىق نىسانداردى ىقتيمال سۋ تاسقىنى قاۋپىنە قاتىستى تەكسەرۋدى اياقتاۋ تاپسىرىلعاندىعىن اتاپ ايتتى.

اتالمىش ماسەلە بويىنشا جيىندا اقمولا، سولتۇستىك قازاقستان، شىعىس قازاقستان، قاراعاندى، الماتى، وڭتۇستىك قازاقستان، قىزىلوردا، جامبىل وبلىستارىنىڭ اكىمدەرى ەسەپ بەردى. مينيسترلەردىڭ بايانداماسىن، اكىمدەردىڭ ەسەبىن تىڭداعان ۇكىمەت باسشىسى قورىتىندى سوزىندە پرەمەر-ءمينيستردىڭ ءبىرىنشى ورىنباسارى اسقار مامينگە بارلىق ماسەلەلەردى وڭىرلەردىڭ باسشىلارىمەن سەلەكتورلىق كەڭەستە كەڭىنەن تالقىلاۋ تۋرالى تاپسىرما بەردى. ال قارجى مينيسترلىگىنە جول كارتاسى بويىنشا اقشالاي قاراجاتتى ۋاقىتىلى ءبولۋ ماسەلەلەرى تاپسىرىلدى. سۋ تاسقىنى قاۋپىنىڭ الدىن الۋ بويىنشا جول كارتاسىنىڭ ورىندالۋ بارىسىن باقىلاۋ مىندەتى پرەمەر-ءمينيستردىڭ ءبىرىنشى ورىنباسارى اسقار مامينگە جۇكتەلدى.

 

 

ۇقساس جاڭالىقتار

Back to top button