نۇرسۇلتان نازارباەۆ: جاڭعىرتۋ ەش ۋاقىتتا وڭاي بولمايدى

تاۋەلسىز قازاق ەلىندە جاڭعىرۋ تەك رۋحاني جۇيەدە عانا ءجۇرىپ جاتقان جوق، بارلىق سالانى قامتىپ وتىر. ەكونوميكادا دا، ساياساتتا دا جاڭعىرۋ باعىتىندا سەرپىندى سەرپىلىس بار. ارينە، جاڭعىرۋ مەن جاڭارۋ جايدان-جاي جۇزەگە اسا سالاتىن جۇمىس ەمەس. بۇل باعىتتا بيلىك تارماقتارىمەن بىرگە ساياسي كۇشتەر دە بەلسەنە، جۇمىلا جۇمىس جاساۋى قاجەت. «جاڭعىرتۋ ەش ۋاقىتتا وڭاي بولمايدى. ول ايتارلىقتاي قارسىلىقتاردى تۋىنداتۋى مۇمكىن. «نۇر وتان» پارتياسىنىڭ ءرولى – ەڭ الدىمەن جاڭعىرتۋ باعدارىن ساياسي قولداۋدىڭ تەتىكتەرىن قۇرۋدا». قازاقستان رەسپۋبليكاسىنىڭ پرەزيدەنتى، «نۇر وتان» پارتياسىنىڭ توراعاسى  نۇرسۇلتان نازارباەۆ «نۇر وتان» پارتياسى ساياسي كەڭەسىنىڭ استانادا وتكەن كەڭەيتىلگەن وتىرىسىندا وسىلاي دەدى.

«نۇر وتان» – ەلمەن ەتەنە

ەلىمىزدەگى ەڭ بەدەلدى ساياسي ۇيىم سانالاتىن «نۇر وتان» پارتياسىنىڭ قۇرىلعانىنا بيىل ون سەگىز جىل تولادى. از ۋاقىت ەمەس، ارينە. وسى مەرزىم ىشىندە «نۇر وتان» پارتياسىنىڭ قاناتى قاتايىپ، ەلىمىزدەگى ەڭ بەدەلدى، ەڭ ۇلكەن ساياسي كۇشكە اينالا ءبىلدى. «حالىقپەن تىكەلەي جۇمىس ىستەپ، كەزەك كۇتتىرمەي شەشىلۋگە ءتيىستى ماسەلەلەردى ۇنەمى نازاردا ۇستاپ، ناعىز ەلدىك پارتيا اتاندى. وعان وتكەن سايلاۋلارداعى ەلدىڭ زور سەنىمى ايقىن دالەل. سول سايلاۋلارعا بەلسەنە قاتىسقان ءبىزدىڭ پارتيا مۇشەلەرىنىڭ ىستەگەن شارۋاسى، جەرگىلىكتى ۇيىمداردىڭ ىستەگەن شارۋاسى ناتيجەسىندە حالىقتىڭ جۇرگىزىپ وتىرعان ساياساتىمىزعا سەنىپ، بىرىڭعاي داۋىس بەرگەنىن كورىپ وتىرمىز. پارتيا بولاشاقتا دا ەلمەن ەتەنە بولىپ، حالىققا قالتقىسىز قىزمەت ەتۋدى جالعاستىرا بەرەدى دەپ سەنەمىن»، – دەدى نۇرسۇلتان نازارباەۆ.

«نۇر وتان» پارتياسى بەلسەندى تۇردە بەل بۋىپ كىرىسۋگە ءتيىستى جۇمىستار از ەمەستىگىن تىلگە تيەك ەتكەن مەملەكەت باسشىسى: «قاجەتتى باعدارلامانىڭ بارلىعى قابىلداندى، ونى وزدەرىڭىز دە بىلەسىزدەر. دەگەنمەن قازىرگى جاعدايدا، دۇنيەدەگى عىلىمي-تەحنيكالىق دامۋدىڭ جاڭا سالاسىنا بۇكىل الەم ءتۇسىپ وتىرعان كەزدە ءبىزدىڭ العا قويعان ماقساتتارىمىز از ەمەس. سوندىقتان وسىنىڭ بارلىعىنا پارتيا باسشى بولىپ، جەرگىلىكتى جەرلەردە ساياساتتى ءتۇسىندىرۋى قاجەت»، – دەدى.

«رۋحاني جاڭعىرۋ» –  يدەولوگيالىق تۇعىرناما

ەلىمىزدىڭ جەتەكشى ساياسي ۇيىمى – «نۇر وتان» پارتياسى بيلىك پەن حالىق اراسىنداعى تىعىز بايلانىستىڭ التىن كوپىرى بولۋى ءتيىس. مەملەكەت باسشىسى ساياسي كەڭەستىڭ كەڭەيتىلگەن وتىرىسىندا بۇل تۋرالى دا پىكىرىن جاسىرىپ قالا المادى. «ءسوز «نۇر وتان» پارتياسىنىڭ ءوزىن جاڭعىرتۋمەن بايلانىستى بولىپ وتىر. ويتكەنى ەل، ەكونوميكا جاڭعىرىپ، ساياسي كۇشتەر دە سوعان سايكەس بولۋى ءتيىس»، – دەي كەلىپ، وسى رەتتە «رۋحاني جاڭعىرۋ» «نۇر وتان» پارتياسىنىڭ اعىمداعى يدەولوگيالىق جۇمىستارىنىڭ تۇعىرناماسى ەكەندىگىن ايتتى. بۇل باعىتتا جەتەكشى ساياسي ۇيىم ەل اراسىندا كەڭ تۇسىنىك جۇمىستارىن جۇرگىزۋدىڭ تەتىكتەرىن تابا ءبىلۋى ءتيىس.

«رۋحاني جاڭعىرۋ» باعدارلاماسىنا ەل حالقىنىڭ ىقىلاس-پەيىلى ەرەكشە. بۇل وركەنيەتتى ەلدەر قاتارىنا قوسىلۋعا ۇمتىلىپ وتىرعان قازاقستاندى جاڭا بەلەسكە كوتەرەتىنى ءسوزسىز.

«نۇر وتان» پارتياسى ويدى ءتۇسىندىرۋدىڭ اشەيىن عانا مىنبەرى بولىپ قويماي، سونىمەن بىرگە ونى بارلىق دەڭگەيدە بەلسەندى ىلگەرىلەتۋى ءتيىس. «رۋحاني جاڭعىرۋ» باعدارلاماسى – بۇل پارتيانىڭ اعىمداعى يدەولوگيالىق جۇمىستارى ءۇشىن تۇعىرناما. باعدارلامانى جۇزەگە اسىرۋعا لايىقتى قاتىسۋ ءۇشىن پارتيا ءوز جۇمىسىن ءتيىمدى جولعا قويۋدىڭ ناقتى تەتىكتەرىن تابۋى ءتيىس»، – دەدى نۇرسۇلتان نازارباەۆ.

ساياسي كەڭەستىڭ كەڭەيتىلگەن وتىرىسىندا «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحامەد ءسوز سويلەپ، مەملەكەت باسشىسى ۇسىنعان «رۋحاني جاڭعىرۋ» باعدارلاماسى قازاق قوعامىنىڭ دامۋىنا ايرىقشا سەرپىن بەرىپ، ەرەكشە قيمىل-قوزعالىس اكەلگەنىن اتاپ ءوتتى. «رۋحاني جاڭعىرۋعا» ارنالعان رەسپۋبليكالىق جوبالىق ءوفيسى اشىلىپ، وندا تۇراقتى جۇمىس ىستەۋ ءۇشىن ارنايى پارتيا حاتشىسى بەلگىلەنگەن. الەۋمەتتىك جەلى جانە ءتۇرلى مەسەندجەرلەرمەن ارادا «رۋحاني جاڭعىرۋعا» بايلانىستى جۇمىس جاندانعان. «ساناداعى سەرپىلىستىڭ ىرگەتاسى سانالاتىن قازاق ءالىپبيىن لاتىن قارپىنە كوشىرۋدى حالىق اراسىندا كەڭىنەن ناسيحاتتاۋدى پارتيا دا ءوزىنىڭ كۇندەلىكتى جۇمىسىندا باستى نازاردا ۇستاۋدا»، – دەدى مۇحتار قۇل-مۇحامەد.

جاڭا الەمدەگى جاڭا  قازاقستان

الەمدى شارپىعان ەكونوميكالىق داعدارىسقا قاراماستان، قازىرگى ۋاقىتتا قازاقستاننىڭ الەۋەتى وتە جوعارى. بۇعان «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحامەد ناقتى مىسالدار كەلتىرىپ، قازاقستاننىڭ بۇكىل الەم مويىنداعان وراسان زور جەتىستىكتەرى ەلباسى ستراتەگياسىنىڭ، باعا جەتپەس حالىقارالىق ابىرويى مەن ساياساتىنىڭ زاڭدى ناتيجەسى ەكەنىن جەتكىزدى.

مۇحتار قۇل-مۇحامەد كەلتىرگەن دەرەككە قاراعاندا، باسەكەگە قابىلەتتىلىك بويىنشا جاھاندىق يندەكسىندە، ينۆەستورلاردىڭ قۇقىعىن قورعاۋ رەيتينگىندە قازاقستان بيىلعى جىلى ءۇشىنشى ورىندى يەلەنگەن.

سونداي-اق، بىرىككەن ۇلتتار ۇيىمىنىڭ ادام كاپيتالىنىڭ دامۋى كورسەتكىشى بويىنشا قازاقستاننىڭ رەيتينگى سوڭعى ەكى جىلدا عانا 14 پوزيتسياعا جاقسارا تۇسكەن. قازاقستاننىڭ بيۋدجەتى 17 جىلدىڭ ىشىندە 591 ملرد تەڭگەدەن 12،5 تريلليون تەڭگەگە جەتكەن. ياعني، 21 ەسەگە ارتقان. ءححى عاسىردا الەمنىڭ باسقا بىردە-ءبىر ەلىندە وسىنداي ءوسىپ-وركەندەۋ بايقالىپ وتىرعان جوق.

مۇحتار قۇل-مۇحامەد كەلتىرگەن تاعى ءبىر دەرەك مىناداي: ەلباسىنىڭ تىكەلەي باستاماسىمەن قولعا الىنعان، حالىقتىڭ ءال-اۋقاتىن جاقسارتۋعا باعىتتالعان «نۇرلى جول» باعدارلاماسىنا 2015 جىلى 770 ملرد، 2016 جىلى 739 ملرد تەڭگە بولىنگەن بولسا، بيىل 647 ملرد تەڭگەگە جەتكەن.

بۇل عانا ەمەس، باسقا دا باعدارلامالار بويىنشا ەل يگىلىگىنە باعىتتالعان قارجىنىڭ حالىققا جەتۋىن «نۇر وتان» ءاردايىم ءجىتى باقىلاۋدا ۇستايتىنىن ايتتى پارتيا توراعاسىنىڭ ورىنباسارى. قازىر پارلامەنت ماجىلىسىندەگى نۇروتاندىق دەپۋتاتتاردىڭ زاڭ شىعارۋشىلىق باستاماسى ارتىپ، پارتياارالىق ءتارتىپ نىعايا تۇسكەن. «100 ناقتى قادام» ۇلت جوسپارى، «نۇرلى جەر»، «نۇرلى جول» جانە باسقا دا شاپاعاتى مەن يگىلىگى مول باعدارلامالارعا بايلانىستى ءتۇسىندىرۋ جۇمىستارىمەن بىرگە باقىلاۋ مەن ءتارتىپ تە كۇشەيتىلگەن.

ءوتىنىش قاراۋسىز  قالمايدى

قازىر «نۇر وتان» پارتياسىنىڭ ميلليوننان استام مۇشەسى بار. بۇل – ۇلكەن ساياسي كۇش ەكەنى ءسوزسىز. «نۇر وتان» 16 وبلىستىق جانە استانا مەن الماتى قالالىق، 227 اۋداندىق ءارى تەرريتوريالىق، 5 824 باستاۋىش ۇيىمنان تۇراتىن ەلىمىزدەگى ەڭ ۇلكەن پارتيا.

پارتيا توراعاسىنىڭ ءبىرىنشى ورىنباسارى مۇحتار قۇل-مۇحامەدتىڭ ايتۋىنا قاراعاندا، ورتالىق جانە جەرگىلىكتى دەڭگەيدە 3052 پارتيا مۇشەسىنەن تۇراتىن پارتيالىق رەزەرۆ جاساقتالعان. ءتۇرلى جاعدايلارمەن جۇمىسسىز قالعان پارتيا مۇشەلەرى دە نازاردان تىس قالمايتىن بولىپ شىقتى. ولاردىڭ قاتارى ءبىر جىلدىڭ ىشىندە ءتورت ەسەگە دەيىن قىسقارعان. «پارتيانىڭ ورتالىق جانە وڭىرلەردەگى قوعامدىق قابىلداۋ جۇمىستارى جاڭا فورماتقا كوشىرىلىپ، وتىنىشتەر سكايپ، ۆاتساپ، ەلەكتروندى پوشتا ارقىلى دا قابىلدانا باستادى. ەلىمىزدىڭ كەز كەلگەن وڭىرىنەن ينتەرنەت – كوممۋنيكاتسيا ارقىلى پارتياعا شىعۋ مۇمكىندىگى تۋدى. بۇعان «تسيفرلىق قازاقستان» باعدارلاماسىنىڭ ويداعىداي جۇزەگە اسۋى كوپ مۇمكىندىك تۋعىزىپ وتىر»، – دەدى ول.

بيىلعى جىلدىڭ 10 ايى ىشىندە پارتيانىڭ اتىنا 190 مىڭ ادامنان ءوتىنىش تۇسكەن. ولاردىڭ ماسەلەسىن شەشۋ ءۇشىن قوعامدىق قابىلداۋلارعا دەپۋتاتتار، مينيسترلىكتەردىڭ وكىلدەرى كەلىپ، قاراپايىم حالىقتىڭ سۇراقتارىنا جاۋاپ بەرگەن. ەڭ باستىسى، وتىنىشتەر قاراۋسىز قالماي، 96 پايىزى شەشىمىن تاپقان.

عالىم ورىنباسار ۇلى

ۇقساس جاڭالىقتار

Back to top button