قوستاناي وبلىسى ءىرى اگرارلى-ونەركاسىپتىك وڭىرگە اينالۋى كەرەك

قوستاناي وبلىسى ءىرى اگرارلى-ونەركاسىپتىك وڭىرگە اينالۋى كەرەك. قوستاناي وبلىسىنا جۇمىس ساپارىمەن بارعان مەملەكەت باسشىسى نۇرسۇلتان نازارباەۆ شەتەلدىك ينۆەستورلارمەن كەزدەسۋ وتكىزدى، دەپ حابارلايدى «قازاقپارات» حاا ءتىلشىسى.

«قوستاناي وبلىسى – ەلىمىزدىڭ ەڭ ءىرى اگرارلىق وڭىرلەرىنىڭ ءبىرى. ازىق-ت ۇلىك ونىمدەرىن ءوندىرۋ بويىنشا ەڭ ۇلكەن ايماق. بيىل قيىن جىل بولعاننىڭ وزىندە دە مۇندا 5 ميلليون توننادان استام ءونىم جينالدى. ءبىز بۇل ءوڭىردى اگرارلى-ونەركاسىپتىك ايماققا اينالدىرۋدى جالعاستىرا بەرەتىن بولامىز. سوندىقتان ايماقتىڭ ونەركاسىبىن كوتەرۋ باعىتىندا جۇمىس اتقارامىز»، – دەدى مەملەكەت باسشىسى. ەلباسى وسىعان بايلانىستى قوستاناي وبلىسىندا اۆتوكولىك ءوندىرىسىن دامىتۋ جۇمىسى قارقىندى تۇردە جۇرگىزىلىپ جاتقانىن ايتتى. «بۇل ەكى زاۋىت (قوستاناي جانە وسكەمەندەگى ەكى اۆتوكولىك زاۋىتى – اۆت.) وتە ءتيىمدى جۇمىستار جاساۋدا. ءبىز ينۆەستورلاردى تارتامىز. قىتاي كورپوراتسياسىنىڭ وسىندا جۇمىسقا كىرىسكەنى (CNC كومپانياسىنىڭ «الليۋر» اكتسيالارىن ساتىپ الۋى) – قىتاي باسشىسى سي تسزينپينمەن جاسالعان كەلىسىمدەرىمىزدىڭ جۇزەگە اسىرىلۋى بولىپ تابىلادى »، – دەپ اتاپ ءوتتى پرەزيدەنت. وسىلايشا، «ءبىر بەلدەۋ – ءبىر جول» جوباسى نەگىزىندەگى كەلىسىم اياسىندا قازاقستاندا قۇنى 27 ملرد اقش دوللارلىق 52 كاسىپورىن سالىناتىن بولادى. «ءبىز ءوز تاراپىمىزدان وسى باعدارلاماعا تولىعىمەن قوسىلدىق. قازاقستان-قىتاي شەكاراسىنان كاسپي تەڭىزىنە دەيىنگى 1200 شاقىرىمدىق تىكەلەي تەمىرجولدى 18 ايدى سالىپ بىتىردىك. تۇركىمەنستان ارقىلى جول سالدىق. جاقىندا عانا قازاقستان – ازەربايجان – گرۋزيا جانە ەۋروپا باعىتىنداعى تەمىرجولدىڭ قۇرىلىسى اياقتالدى»، – دەدى مەملەكەت باسشىسى. ايتا كەتۋ كەرەك، قوستاناي وبلىسىنىڭ اكىمى ارحيمەد مۇحامبەتوۆ مەملەكەت باسشىسىمەن كەزدەسۋ بارىسىندا ايماقتاعى ينۆەستيتسيالىق جوبالاردىڭ جۇزەگە اسىرىلۋى تۋرالى ايتىپ بەردى. اۆتوكولىك ونەركاسىبىندەگى قىتاي جانە وزبەك سەرىكتەستەرىمەن بىرلەسكەن جۇمىس بارىسى تۋراسىندا نۇرسۇلتان نازارباەۆقا «Global Gas Group» جشس ديرەكتورى ولەگ گونچاروۆ حاباردار ەتتى.

ۇقساس جاڭالىقتار

Back to top button