بقو تۇرعىنىنان كيىكتىڭ 80 ءمۇيىزى تاركىلەندى

اتىراۋ تاس جولىندا 2 قاراشا كۇنى ساعات 03:00 شاماسىندا كيىكتىڭ 80 دانا ءمۇيىزىن اۆتوكولىگىمەن الىپ بارا جاتقان بقو تۇرعىنى ۇستالدى.  بۇل تۋرالى اقپاراتتى قر اشم ورمان شارۋاشىلىعى جانە جانۋارلار دۇنيەسى كوميتەتىنىڭ ءباسپاسوز حاتشىسى ساكەن دىلداحمەت فەيسبۋكتەگى پاراقشاسىندا جاريالادى، دەپ حابارلايدى قازاقپارات.

«2017 جىلدىڭ 2 قاراشاسى كۇنى «وحوتزووپروم ءوب» رمقك ورال ايماقتىق فيليالىنىڭ قازتالوۆ تىرەك پۋنكتىنىڭ ينسپەكتورلارى بقو ءىىد قىزمەتكەرلەرىمەن، سقو ءىىد تابيعات قورعاۋ جونىندەگى پوليتسيا قىزمەتكەرلەرىمەن بىرگە رەيد جۇرگىزگەن.

رەيد بارىسىندا ساعات تۇنگى 03:00 شاماسىندا ورال – اتىراۋ تاس جولىندا «لادا كالينا» ماركالى اۆتوكولىك توقتاتىلعان. وندا وتىرعان ورال قالاسىنىڭ تۇرعىنىنىڭ اۆتوكولىگىن تەكسەرۋ بارىسىندا قاپقا سالىنعان كيىكتىڭ 80 ءمۇيىزى تابىلدى»، – دەلىنگەن حابارلامادا.

اتالعان ءىس بويىنشا ماتەريالدار بقو ءىىد-نە تەرگەۋ جۇرگىزۋ ءۇشىن تاپسىرىلدى. «قوسىمشا اقپارات كەيىن حابارلاناتىن بولادى»، – دەيدى ساكەن دىلداحمەت فەيسبۋك پاراقشاسىندا.

 

ۇقساس جاڭالىقتار

Back to top button