دوستىقتى نىعايتقان ساپار

وڭتۇستىك قازاقستان وبلىسىنان وزبەكستانعا جول تارتقان «دوستىق كەرۋەنى» جوباسىنا قاتىسۋشىلار بۇگىن ەلگە ورالدى. قۇرامىنا زيالى قاۋىم وكىلدەرى، ەڭبەك ارداگەرلەرى، ەتنو-مادەني بىرلەستىكتەردىڭ توراعالارى مەن باق وكىلدەرى ەنگەن كەرۋەندى وزبەكستانداعى قازاق ۇلتتىق مادەني ورتالىعىنىڭ باسشىلىعى كۇتىپ الىپ، كورشىلەس ەلدىڭ تاريحي-مادەني ورىندارىمەن تانىستىردى.

باۋىرلاس ەلدەر اراسىندا دوستىق قارىم-قاتىناستى نىعايتۋ ماقساتىندا ۇيىمداستىرىلعان ساپار اياسىندا قازاقستاندىقتار الدىمەن  تاشكەنتتەگى تولە بي بابانىڭ كەسەنەسىنە زيارات ەتتى. سامارقانداعى ايگىلى رەگيستان تاريحي-ساۋلەتتىك كەشەنىمەن تانىسىپ، شاحي-زيندا تاريحي كەشەنىندە جەرلەنگەن وزبەكستاننىڭ ەكس-پرەزيدەنتى يسلام كاريموۆتىڭ رۋحىنا قۇران اياتتارىن باعىشتادى. بۇحاراداعى باحاۋاددين ناكشباندي ماۆزولەيىن ارالاپ كوردى.

‒  بۇل ءىسساپار وزبەكستان رەسپۋبليكاسىنىڭ پرەزيدەنتى شاۆكات ميرزيوەۆتىڭ ناۋرىز ايىندا قازاقستانعا جاساعان رەسمي ساپارى كەزىندە قازاقستان حالقى اسسامبلەياسى مەن وزبەكستان ينتەرناتسيونالدى مادەني ورتالىعىنىڭ اراسىندا تۇزىلگەن ىنتىماقتاستىق تۋرالى مەموراندۋم اياسىندا ۇيىمداستىرىلىپ وتىر. مەموراندۋم ەكى ەل اراسىنداعى مادەني ىقپالداستىقتى ارتتىرىپ، قازاقستان حالقى اسسامبلەياسى مەن وزبەكستان ينتەرناتسيونالدى مادەني ورتالىعىنىڭ ارىپتەستىگىن نىعايتۋدى كوزدەيدى. سونىڭ اياسىندا ەتنوسارالىق بىرلىكتى قامتاماسىز ەتىپ وتىرعان ۇيىمداردىڭ قوس ەلگە ەتنوساياحات ۇيىمداستىرۋىنا مۇمكىندىك بەرىپ وتىر. دوستىق كەرۋەنى وقو قازاقستان حالقى اسسامبلەياسىنىڭ ۇيىمداستىرۋىمەن وزبەكستانعا ەكىنشى رەت جول تارتتى. دوستىق نيەتتەگى وزبەكستاندىق دەلەگاتتار دا وڭتۇستىك قازاقستان وبلىسىنىڭ تاريحي ورىندارىنا ساياحاتتار ۇيىمداستىرۋدا، ‒ دەيدى كەرۋەندى باستاپ بارعان وبلىس اكىمى اپپاراتىنىڭ «قوعامدىق كەلىسىم» كمم باسشىسى ەربول بايقوناقوۆ.

رەسمي مالىمەتتەرگە سايكەس، بۇگىندە وزبەكستاندا 800 مىڭنان استام قانداستارىمىز تۇرادى. ال قازاقستانداعى وزبەك ەتنوسى وكىلدەرىنىڭ سانى 550 مىڭعا جۋىقتايدى. الداعى ۋاقىتتا «دوستىق كەرۋەنى» جوباسى ەكى ەل اراسىنا مادەني ىقپالداستىقتى ودان ءارى نىعايتارىنا سەنىم مول.

ۇقساس جاڭالىقتار

Back to top button