100 جاڭا ەسىم: ۇمىتكەرلەر ىرىكتەلۋ ۇستىندە

 

اقپارات جانە كوممۋنيكاتسيالار ءمينيسترى داۋرەن اباەۆ قازاقستاندىقتاردى بەلسەندى داۋىس بەرۋگە شاقىردى. ەلىمىزدە ەلباسى جاريالاعان «قازاقستانداعى 100 جاڭا ەسىم» جوباسىنا كانديداتتاردى ۇسىنۋ اياقتالدى. 

«100 جاڭا ەسىم» جوباسىنا ۇمىتكەرلەر تۋرالى دەرەكتى فيلمدەر تسيكلى تۇسىرىلۋدە. «قازاقستاننىڭ 100 جاڭا ەسىمى» جوباسى بويىنشا جۇمىس جانە ساراپشىلار توبىنىڭ كەزەكتى وتىرىسىنا اقپارات جانە كوممۋنيكاتسيالار ءمينيسترى داۋرەن اباەۆ، قازاقستان حالقى اسسامبلەياسىنىڭ توراعاسى دارحان مىڭباي جانە جوبا ۇيىمداستىرۋشىلارى، قوعام بەلسەندىلەرى قاتىستى.

– ەلباسى ۇسىنعان «رۋحاني جاڭعىرۋ» باعدارلاماسىنىڭ اياسىنداعى بۇل جوبا – ونەرى، ءبىلىمى، قوعامعا سىڭىرگەن ەڭبەگى، ەرەكشە قاسيەتىمەن دارالانعان تالانتتى ازاماتتارىمىزعا ۇلكەن مۇمكىندىك ۇسىنىپ وتىر. وسىعان ساي، جاڭا ەسىمدەردى انىقتاۋدا جۇرتشىلىق تا جوعارى بەلسەندىلىك تانىتۋدا، –دەدى داۋرەن اباەۆ. بيىلعى جىلعى 7 ماۋسىمنان باستاپ 15 قىركۇيەكككە دەيىن ەلىمىزدىڭ تۇكپىر-تۇكپىرىنەن جوباعا قاتىسۋشىلاردان وتىنىشتەر قابىلداندى. وسى ۋاقىت ىشىندە El.kz پورتالىندا 2212 كانديدات تىركەلدى. قازىرگى كۇنى ولاردى ىرىكتەۋ جۇمىستارى جۇرگىزىلۋدە. سونىمەن قاتار، قاتىسۋشىلاردى ىرىكتەۋدەن بولەك ولاردىڭ تابىستارىنىڭ تاريحىن اقپارات قۇرالدارىندا جان-جاقتى كورسەتە ءبىلۋ دە اسا ماڭىزدى ەكەنى ايتىلۋدا. بۇل باعىتتى ىسكە اسىرۋ بويىنشا اقپارات جانە كوممۋنيكاتسيالار مينيسترلىگى مەن قازاقستان حالقى اسسامبلەياسى جۇيەلى شارالاردى قولعا الدى.

«قازىرگى ۋاقىتتا ىرىكتەۋ جولىمەن 515 كانديداتتان تۇراتىن ارالىق ءتىزىم ءتۇزىلدى. بىراق ارنايى قۇرىلعان كوميسسيا مۇشەلەرى وسى ىرىكتەلگەندەرمەن شەكتەلمەي، بارلىق كانديداتتار اراسىنان ءوزى لايىقتى دەپ تاپقاندارىن دا ءوز بەتىنشە قوسا الادى. بارلىق وتىنىمدەر 100esim.el.kz سايتىندا ورنالاستىرىلعان»، – دەدى مينيستر «قازاقستانداعى 100 جاڭا ەسىم» جوباسى بويىنشا جۇمىس توبى مەن ساراپشىلىق توپتىڭ كەزەكتى وتىرىسىندا.

ونىڭ تۇسىندىرۋىنشە، ەندى ارناۋلى كوميسسيا 515 كانديداتتىڭ اراسىنان 300 تۇلعانى ىرىكتەپ الادى دا، وسى «ءۇش جۇزدىك» قازاقستان حالقىنىڭ داۋىس بەرۋىنە تۇسەدى. وسىعان بايلانىستى د.اباەۆ كوميسسيا مۇشەلەرىنە قايىرىلدى. «ءبىز سىزدەردەن قوعامدىق ونلاين-داۋىس بەرۋگە قاتىسۋلارى ءۇشىن 300 كانديداتتان تۇراتىن ءتىزىمدى قالىپتاستىرۋعا ۇسىنىستار كۇتەمىز. ينتەرنەتتەگى داۋىس بەرۋ قازان ايىنىڭ باسىنا جوسپارلانىپ وتىر»، – دەدى مينيستر. ول بارشا قازاقستاندىقتارعا ءوز داۋىسىن بەرۋ مۇمكىندىگى ۇسىنىلاتىنىن قاداپ ايتىپ: «ءبىز بارلىعىڭىزدى وسى ۇدەرىسكە بەلسەندى قاتىسۋعا شاقىرامىز. حالىقتىق داۋىس بەرۋدى قازان ايىنىڭ سوڭىنا قاراي اياقتاۋدى كوزدەپ وتىرمىز. سودان كەيىن داۋىس سانى ەسەپتەلىپ، قازاقستاننىڭ 100 جاڭا ەسىمىنىڭ اقىرعى ءتىزىمى جاريالانادى»، –  دەدى ول.

«سونىمەن قاتار ولاردىڭ «تابىس تاريحىن» اقپارات قۇرالدارىندا جان-جاقتى ناسيحاتتاۋ جانە كورسەتۋ اسا ماڭىزدى. سوندا عانا بۇل شارا تاربيەلىك ءارى يدەولوگيالىق تۇرعىدان ءوز جەمىسىن بەرمەك. اقپارات جانە كوممۋنيكاتسيالار مينيسترلىگى مەن قازاقستان حالقى اسسامبلەياسى بۇل باعىتتى ىسكە اسىرۋ بويىنشا جۇيەلى شارالاردى قولعا الۋدا. اتاپ ايتقاندا، 100 جاڭا ەسىم اتانۋعا ۇمىتكەر ازاماتتار تۋرالى قازىردەن دەرەكتى فيلمدەر تسيكلى تۇسىرىلۋدە»، – دەدى مينيستر.

«قازكونتەنت» اق-تىڭ باسقارما توراعاسى ەۆگەني كوچەتوۆ ينتەرنەت ارقىلى داۋىس بەرۋدە «ءبىر ادام – ءبىر داۋىس» قاعيداتى جۇزەگە اسىرىلۋى ءۇشىن ءارى داۋىستاردى جاساندى تۇردە ەسەلەۋگە جول بەرمەۋ ماقساتىندا سايتتا تىركەلۋ قاراستىرىلعانىن جەتكىزدى. تىركەلۋدى «ەلەكتروندىق پوشتا ارقىلى» نەمەسە «الەۋمەتتىك جەلىدەگى اككاۋنتتار ارقىلى اۆتوريزاتسيالانۋ» جولىمەن جۇزەگە اسىرۋعا بولادى. بۇل رەتتە ينتەرنەت پايدالانۋشى كوپ دەگەندە تەك 3 ۇمىتكەردى عانا جاقتاپ، داۋىس بەرە الادى.

 

ۇقساس جاڭالىقتار

Back to top button