پارلامەنتارالىق بايلانىستار كۇشەيتىلمەك

 

پارلامەنت سەناتىنىڭ توراعاسى قاسىم-جومارت توقاەۆ وزبەكستان رەسپۋبليكاسىندا رەسمي ساپارمەن بارىپ قايتتى. ساپار بارىسىندا وزبەكستان رەسپۋبليكاسىنىڭ پرەزيدەنتى شاۆكات ميرزياەۆتىڭ قابىلداۋىندا بولدى جانە وزبەك پارلامەنتى قوس پالاتاسىنىڭ باسشىلارىمەن كەلىسسوز جۇرگىزدى.

وزبەكستان باسشىسىمەن كەزدەسۋ بارىسىندا ق.توقاەۆ ورتالىق ازياداعى  جانە ودان سىرت جەرلەردە قاۋىپسىزدىك پەن تۇراقتىلىقتى قامتاماسىز ەتۋدە قازاقستان مەن وزبەكستان بايلانىستارىنىڭ ەرەكشە ءرولىن اتاپ ءوتىپ، ەكى ەلدىڭ جان-جاقتى بايلانىستارىنىڭ قازىرگى دامۋ قارقىنىنا جوعارى باعا بەردى.

قازاقستان پرەزيدەنتى ن.نازارباەۆتىڭ تاياۋداعى مەملەكەتتىك ساپارى اياسىندا قۇجاتتاردىڭ اۋقىمدى توپتاماسىنا قول قويىلدى، ەكىجاقتى قاتىناستاردىڭ جاڭا ساپالىق دەڭگەيى ايقىندالدى، – دەپ اتاپ ءوتتى سەنات باسشىسى.

ول جوعارى دەڭگەيدەگى كەزدەسۋلەردىڭ ەكى ەل حالىقتارىنىڭ عاسىرلار بويعى دوستىعى مەن ىنتىماقتاستىعىن نىعايتا تۇسەتىنىن ايتتى. سەنات باسشىسى كورشى ەلدەگى ۇلتى قازاق ازاماتتاردىڭ رۋحاني مۇقتاجىنا لايىقتى نازار اۋدارىلىپ وتىرعانىنا ريزاشىلىق ءبىلدىردى. تەك قازاق تىلىندە ءبىلىم بەرەتىن 164 مەكتەپتىڭ بولۋى – وسىنىڭ ناقتى كورسەتكىشى. ق.توقاەۆتىڭ پىكىرىنشە، پرەزيدەنتتەردىڭ، اتاپ ايتقاندا، ارال ايدىنىنداعى سۋ رەسۋرستارىن بىرلەسىپ، ءتيىمدى پايدالانۋعا قاتىستى باستامالارىن ىسكە اسىرۋ بويىنشا ەكى ەل پارلامەنتشىلەرىنىڭ تىزە قوسا جۇمىس ىستەۋگە مۇمكىندىگى بار.

قازاقستان پارلامەنتى جوعارعى پالاتاسىنىڭ باسشىسى «قازاقستان – 2050» ستراتەگياسىن، «100 ناقتى قادام» ۇلت جوسپارى مەن «رۋحاني جاڭعىرۋ» جانە قازاقستاندى تسيفرلاندىرۋ باعدارلامالارىن ىسكە اسىرۋ بارىسى تۋرالى پرەزيدەنت ش.ميرزياەۆتى حاباردار ەتتى.

قازاقستان سەناتىنىڭ باسشىسى وزبەكستان ولي ءماجىلىسى سەناتىنىڭ توراعاسى نيگماتيللا يۋلداشەۆپەن جانە ولي ءماجىلىسى زاڭناما پالاتاسىنىڭ توراعاسى نۋردينجون يسمويلوۆپەن دە كەزدەستى. پارلامەنتارالىق ۇنقاتىسۋدى دامىتۋ مەن زاڭ شىعارۋ جۇمىستارى سالاسىنداعى ىنتىماقتاستىق وزبەك ارىپتەستەرمەن كەزدەسۋ تاقىرىبى بولدى. ەكىجاقتى نەگىزدە دە، پارلامەنتارالىق ۇيىمدار اياسىندا دا بايلانىستاردى ۇدەتۋ تۋرالى كەلىسىمدەرگە قول جەتكىزىلدى.

ۇقساس جاڭالىقتار

Back to top button