قىرعىز پارلامەنتى قازاقستانمەن شەكاراداعى جاعدايدى جابىق تالقىلايدى

قىرعىزستان پارلامەنتىنىڭ 1 قاراشاداعى وتىرىسىندا قازاق-قىرعىز شەكاراسىنداعى جاعدايدى تالقىلاۋ ۇسىنىلدى. بۇل تۋرالى باستامانى كوتەرگەن بيلىكتەگى سوتسيال-دەموكراتيالىق پارتياسى (سدپ) فراكتسياسىنىڭ دەپۋتاتى ۋلان پريموۆ وتىرىسقا ۇكىمەت مۇشەلەرىن دە شاقىرۋ قاجەتىن ايتتى.

– ءبىز سوڭعى 20 كۇندە جاعداي وزگەرمەگەنىن كورىپ وتىرمىز. ۇكىمەت بارلىق قولدان كەلەر نارسەنى جاساپ جاتىر، استانا مەن ەرەۆاندا كەزدەسۋلەر ءوتتى، بىراق ەشنارسە وزگەرمەدى. پرەمەر-ءمينيستردى، ءتيىستى مينيسترلىكتەر مەن ۆەدومستۆو باسشىلارىن شاقىرعان دۇرىس بولار ەدى. دەپۋتاتتار ءوز يدەيا، ۇسىنىستارىمىزدى ايتۋىمىز كەرەك. ۇكىمەتكە جاعدايدان شىعۋعا قالاي كومەكتەسۋدى تالقىلايىق. بۇل قاۋىپسىزدىككە دە قاتىستى نارسە عوي. قاجەت بولسا، جابىق تۇردە تالقىلايىق. قىس تا تاياپ كەلەدى، ال ءۇش-ءتورت ايدان سوڭ كوكتەمگى ەگىس جۇمىستارى باستالادى، – دەدى ۋلان پريموۆ.

بۇعان جاۋاپ بەرگەن پارلامەنت سپيكەرى داستانبەك جۋمابەكوۆ 2 قاراشاعا ۇكىمەت ساعاتى بەلگىلەنگەنىن ايتىپ، بۇل ماسەلەنى سول وتىرىس اياسىندا تالقىلاۋدى ۇسىندى.

بىراق داۋىس بەرۋدەن سوڭ ءپريموۆتىڭ ۇسىنىسى كوپشىلىك داۋىسپەن قابىلداندى.

10 قازاننان باستاپ ەكى ەل شەكاراسىندا تەكسەرۋ كۇشەيتىلىپ، قازاقستانعا وتەتىن ادامدار مەن كولىكتەر كەزەگى پايدا بولعان. تەكسەرۋدىڭ كۇشەيتىلۋىنەن ەڭ الدىمەن تەز بۇزىلاتىن ازىق-ت ۇلىك تاسيتىن ۇلكەن جۇك كولىكتەرىنىڭ جۇرگىزۋشىلەرى زارداپ شەگىپ جاتىر.

18 قازاندا استانادا وتكەن كەلىسسوزدەر بارىسىندا ەكى ەلدىڭ ۇكىمەت جەتەكشىلەرى كەلەسى كۇننەن باستاپ جولاۋشى كولىكتەرى مەن جۇگى بار ادامداردى شەكارادان وتكىزۋدى جەڭىلدەتۋ تۋرالى ۋاعدالاسقان. بىراق جۇك كولىكتەرىنىڭ جۇرگىزۋشىلەرى جاعداي ءالى وزگەرمەگەنىن، قازاقستان جاعىنىڭ تەكسەرۋ مەن وتكىزۋدى كىدىرتىپ، بۇرىنعىداي شەكارادا تاۋلىكتەپ كەزەك كۇتىپ جاتقانىن ايتادى. رەسمي استانا شەكاراداعى تەكسەرۋ قىرعىزستان ارقىلى وتەتىن كونتراباندانىڭ الدىن الۋ دەپ تۇسىندىرەدى.

26 قازاندا قىرعىزستان ەكونوميكا ءمينيسترى مينيستر ارتەم نوۆيكوۆ قازاقستان شەكارا ماسەلەسىن رەتتەۋ جونىندەگى جول كارتاسىنا قول قويۋدان باس تارتقانىن مالىمدەگەن.

Back to top button