"بالا داۋىسى" بايقاۋىنىڭ سۋپەر فينالى اياقتالدى

الماتىدا «بالا داۋىسى – 2017» بايقاۋىنىڭ سۋپەر فينالى اياقتالىپ، جەڭىمپازدار مەن گران-پري يگەرى انىقتالدى دەپ حابارلايدى NUR.KZ تىلشىسى.

ءاليا نازارباەۆانىڭ «جاندانۋ الەمى» قورىنىڭ قولداۋىمەن وتەتىن بايقاۋ ەلىمىزدىڭ ءار تۇكپىرىندەگى تالانتتى بۇلدىرشىندەردىڭ توماعاسىن سىپىردى. مامىر ايىندا باستاۋ العان ىرىكتەۋ سىندارى قازاقستاننىڭ ءار ايماعىندا ءوتىپ، ەسترادا جۇلدىزدارى ەلىمىزدىڭ 14 وبلىسى مەن ەكى قالاسىنان جاس ۇمىتكەرلەردى تاڭداعان بولاتىن.

ناتيجەسىندە، جۇزدەن جۇيرىك، مىڭنان تۇلپار شىققان 18 ءبۇلدىرشىن رەسپۋبليكالىق بايقاۋدىڭ اقتىق كەزەڭىنە جولداما الدى. فينال باستالاردان ءبىر اي بۇرىن الماتىداعى «جۇلدىزدار ۇيىنە» ورنالاسىپ، ەسترادا مەن ۆوكال، سحانادا ءوزىن-ءوزى ۇستاۋ مادەنيەتى مەن بيلەۋدى ۇيرەنگەن بۇلدىرشىندەر قالىڭ كورەرمەن الدىندا وزدەرىنىڭ ناعىز جۇلدىز ەكەنىن دالەلدەگەنى ءسوزسىز.

بايقاۋدىڭ العاشقى كۇنىندە جاس ونەرپازدار وزىنە تالىمگەر رەتىندە بەكىتىلگەن وتاندىق شوۋ-بيزنەس جۇلدىزدارىمەن بىرگە ءان سالدى. تالىمگەرلەردىڭ اراسىندا ءمادينا سادۋاقاسوۆا، مارجان اراپباەۆا، تولقىن زابيروۆا، اقەركە بۇركىتباي سىندى حالىقتىڭ سۇيىكتى انشىلەرى بار. سايىستىڭ ەكىنشى كۇنىندە قاتىسۋشىلار ءوزارا دۋەت ورىنداپ، ءادىل-قازىلارعا بار ونەرىن پاش ەتتى.

مايرا مۇحامەدقىزى، كارينا ابدۋللينا، پارۆيز نازاروۆ پەن جەڭىس سەيدوللا ۇلى باستاعان قازىلار القاسى ءۇشىن جەڭىمپازدار مەن جۇلدەگەردەردى انىقتاۋ وڭايعا سوققان جوق. ۇزاق ۋاقىت بويى اقىلداسقان ءادىل-قازىلاردىڭ شەشىمىمەن «بالا داۋىسى – 2017» بايقاۋىنىڭ گران-پري يەگەرى اتاعىن قىزىلوردالىق نازەركە شامبيلوۆا جەڭىپ الدى.

نازەركەگە قازاق ۇلتتىق ونەر اكادەمياسىندا گرانتپەن وقۋ مۇمكىندىگى ۇسىنىلدى. سونداي-اق، ول پاريجدەگى ايگىلى ديسنەيلەندكە ساياحاتتاۋ باقىتىنا يە بولدى.

ءبىرىنشى ورىندى الماتىلىق نۇرلىبەك ساپارباي، ەكىنشى ورىندى پاۆلودارلىق اناستاسيا ميحايليۋك، ءۇشىنشى ورىندى باتىس قازاقستان وبلىسىنىڭ وكىلى ءاليحان بەكبولاتوۆ يەلەندى. شىمكەنتتىك زارينا نۇرجانوۆا «كورەرمەن كوزايىمى» اتاعىن جەڭىپ الدى.

كونتسەرت سوڭىندا جاس بۇلدىرشىندەردى قۇتتىقتاعان ءاليا نازارباەۆا تالانتتى بۇلدىرشىندەردى تاربيەلەگەن اتا-انالارعا العىسىن ايتىپ، جاس ونەرپازدارعا اق جول تىلەدى.

ۇقساس جاڭالىقتار

Back to top button