ءاپايتوس بالۋانداردىڭ الەمدىك الامان

ەرتەڭ استاناداعى «بارىس ارەنادا» قازاق كۇرەسىنەن «الەم بارىسى» تۇيە بالۋاندار اراسىنداعى الەم چەمپيوناتى وتەدى. ەكسپو-2017 حالىقارالىق كورمەسى وتكەلى وتىرعان بەدەلدى باسەكەگە 40 ەلدىڭ بالۋانى قاتىسادى.

قازاقستان اتىنان ءتورت بالۋان كۇش سىناسپاق. جيىن قورىتىندىسى بويىنشا باس جاتتىقتىرۋشى ەرلان ەستەك باستاعان باپكەرلىك كەڭەس «الەم بارىسىندا» ەل نامىسىن قورعايتىن بالۋانداردى ىرىكتەدى. ولار: ءتورت دۇركىن الەم چەمپيونى جانە قازاقستان بارىسى جەڭىمپازى ايبەك نۇعىماروۆ، الەم چەمپيونى جانە قازاقستان بارىسى ءتۋرنيرىنىڭ جەڭىمپازى مۇحيت تۇرسىنوۆ، ايبات سەيتەن جانە داۋرەن نۇرالينوۆ. سونىمەن قاتار، بيىلعى قازاقستان بارىسى جەڭىمپازى ەلامان ەرعاليەۆ، تانىمال تۇيە بالۋان ەرجان شىنكەەۆتىڭ قاتىسۋى دا مۇمكىن.

«الەم بارىسى» وسىمەن ەكىنشى رەت وتكەلى تۇر. 2014 جىلى العاشقى تۋرنيرگە 35 ەلدىڭ ءاپايتوس بالۋاندارى قاتىسقان. ءۇش جىل بۇرىن xالىقارالىق تۋرنير رەتىندە تۇساۋى كەسىلگەن «الەم بارىسى» بۇگىندە قازاق كۇرەسىنەن الەمنىڭ ابسوليۋتتىك چەمپيوناتى دەڭگەيىنە دەيىن ءوستى. بىرىنشىلىكتىڭ جالپى جۇلدە قورى – 30 ميلليون تەڭگە. ونىڭ 15 ميلليونى جەڭىمپازعا تيەسىلى. ءداستۇر بويىنشا، التىن، كۇمىس جانە قولا بەلبەۋلەر دە قاراستىرىلعان.

جانكۇيەرلەر دە جۇلدەسىز قالمايدى. كورەرمەندەر اراسىندا Renault Logan اۆتوكولىگى ويناتىلادى. بۇگىندە اۆستراليا، جاڭا زەلانديا، قىتاي جانە گانا بالۋاندارى ەلورداعا كەلىپ ۇلگەردى. جارىس شارتى بويىنشا، بارلىق قاتىسۋشىلارعا قازاق كۇرەسىنەن ارنالعان سپورتتىق كۇرتەشە مەن اياق كيىم بەرىلۋدە. بالۋاندارعا فوتوسەسسيا ۇيىمداستىرىلىپ، شەتەلدىك تورەشىلەرگە قازاق كۇرەسىنىڭ ەرەجەلەرى بويىنشا سەمينار وتكىزىلەدى.

 

 

ۇقساس جاڭالىقتار

Back to top button