اۋەلەگەن «ءاليا» ەكىنشى اتىنا اينالعان

ونى ارىپتەستەرى دە، تىڭدارماندارى دا «قازاق ەستراداسىنىڭ پريمادونناسى» دەپ اتايدى. ەل بەرگەن بۇل اتاققا ونى اۋەلى تالانتى، ودان كەيىن تاباندىلىعى جەتكىزدى. اۋەلەگەن «الياسىمەن» حالىق جۇرەگىن جاۋلاعان ءانشىنىڭ ساحنادا جۇرگەنىنە بيىل 40 جىل. ونەرگە ادالدىقتىڭ، مۋزىكاعا ىڭكارلىكتىڭ ۇلگىسىن كورسەتكەن 40 جىل. قاجىرلى ەڭبەكتىڭ ارقاسىندا حالىقتىڭ شەتسىز، شەكسىز ىقىلاسىنا بولەنگەن 40 جىل. قاتار قۇربىعا، وكشە باسقان سىڭلىگە ونەردەگى ولشەم بولعان 40 جىل. ول ءالى دە قازاق ەستراداسىنا ءتاي-ءتاي باسىپ كەلەتىن تالاي تالانتتىڭ  ۇمتىلار بيىگى بولاتىنى انىق. ويتكەنى ميلليونداردىڭ اراسىنان جازباي تانيتىن ونىڭ عاجاپ داۋىسى ءوز بابىندا، سىرى مەن سىمباتى سول قالپىندا. تىڭدارماننىڭ وعان دەگەن سۇيىسپەنشىلىگى دە كەمىگەن جوق، كەرىسىنشە حالىقتىڭ دارا قىزىنا دەگەن قۇرمەتى جىلدار وتكەن سايىن ەسەلەنە ءتۇستى. قازاقستاننىڭ حالىق ءارتىسى، حالىقارالىق بايقاۋلاردىڭ لاۋرەاتى، قازاقتىڭ اتىن الەمگە تانىتقان دارا دارىن، كۇمىس كومەي ءانشى، ۇلاعاتتى ۇستاز روزا رىمباەۆا كۇنى ەرتەڭ 60 جاسقا تولماق. بىراق ومىردەگى الپىس تا، ونەردەگى قىرىق تا  شىن تالانتقا مەجە ەمەس. جاڭعىزتوبەدەن شىققان جامپوز قازاقتىڭ بايتاق دالاسىن ءالى تالاي ادەمى اندەرىمەن تەربەيتىنى انىق. ونەردەگى ارىپتەستەرى دە روزا قۋانىشقىزىنىڭ ۇلت ونەرىنە ادال قىزمەتىنەن تانبايتىنىنا سەنىمدى.

نۇرعالي ءنۇسىپجانوۆ،

قازاقستاننىڭ حالىق ءارتىسى:

‒ قازاق ەستراداسىنىڭ جاڭا زامانداعى ءوسىپ-وركەندەۋىنە ولشەۋسىز ۇلەس قوسىپ، قازاق قىزدارىنىڭ الەمدىك مۋزىكا ونەرىندە بيىككە كوتەرىلۋىنە باستاماشىل بولعان روزا قارىنداسىمىز – ەلىمىزدىڭ ماڭدايىنا بىتكەن جارىق جۇلدىزى. جىلدار وتسە دە داۋىسىنىڭ بابى بۇزىلمايتىن، سىرى مەن سىمباتى وزگەرمەيتىن بىرەگەي ونەر يەسى. وسىدان 40 جىل بۇرىن قازاق ساحناسىنا قۇبىلىس بولىپ كەلىپ، عاجاپ ۇنىمەن باۋراعان روزا قىز قانداي بولسا، ءالى دە سول قالپىنان تانباعان. داۋىسىنىڭ بوياۋىن، قازاق قىزىنا ءتان سۇلۋلىعىن جوعالتپاي، حالقىنا ادال قىزمەت ەتىپ كەلەدى. ءبىر وكىنىشتىسى، تاسقىننىڭ ومىردەن ەرتە وتكەنى. ەكەۋى قوس قارلىعاشتاي كوز ءسۇيسىنتىپ شىعىپ ەدى. روزانىڭ تۇعىرىنىڭ مىقتى بولۋىنا تاسقىن كوپ ەڭبەك ءسىڭىردى. ونىڭ ءبارىن روزا اقتادى، ونەردىڭ شىڭىنا كوتەرىلىپ، قازاقتىڭ ماقتانىشىنا اينالدى. ۇلتتىڭ ونەرى وسىنداي تالانتتارىمىزدىڭ قاجىرلى ەڭبەگى، مۋزىكاعا دەگەن شەكسىز سۇيىسپەنشىلىگىنىڭ ارقاسىندا جاساي بەرمەك. سوندىقتان قازاق ەستراداسىنىڭ بەتكە ۇستار ءانشىسى روزا رىمباەۆاعا مىقتى دەنساۋلىق، سارقىلماس قايرات تىلەيمىن. توبەسىنە كوتەرىپ قۇرمەتتەيتىن ەلىنىڭ قوشەمەتىنە، التىن اسىقتاي ۇلدارىنىڭ قامقورلىعىنا بولەنىپ جۇرە بەرسىن دەگىم كەلەدى.

 

باعدات سامەدينوۆا،

قازاقستان رەسپۋبليكاسىنىڭ

ەڭبەك سىڭىرگەن ءارتىسى:

‒ قازاق ەستراداسىندا روزا رىمباەۆانىڭ الاتىن ورنى ەرەك. ول – قازاق قىزدارىنىڭ ىشىندە قازاقستاننان تىس جەرلەرگە شىعىپ، ەلدىڭ اتىن تانىتقان العاشقى قارلىعاشىمىز. قازىر رەسەيدىڭ قاي قالاسىنا بارساڭىز دا، مەيلى ماسكەۋ، مەيلى سانكت-پەتەربوردا بولسىن، روزانى جاقسى تانيدى، اندەرىن بىلەدى.  رەسەيلىكتەر ونى قالاي قۇرمەتتەيتىنىن ءوز كوزىممەن كورگەنمىن. بىردە سانكت-پەتەربورعا گاسترولدىك ساپارمەن باردىق. ءبىز باسقا مادەنيەت وشاعىندا ءان ايتتىق، ول اتاقتى مارينسك تەاترىندا ونەر كورسەتتى. جۇمىسىم ەرتەرەك اياقتالعان سوڭ، روزاعا قولداۋ كورسەتۋ ءۇشىن سول تەاترعا باردىم. كونتسەرتتەن سوڭ ورىس اجەيلەردىڭ: «پومنيش ەە ۆ مولودوستي؟ ني چۋت نە يزمەنيلاس، تاكايا جە حرۋپكايا، يزياششنايا» دەپ روزاعا ءسۇيسىنىپ بارا جاتقاندارىن ەستىپ، وسىنداي ءانشى ءوزىمنىڭ زامانداسىم، قۇربىم، ارىپتەسىم ەكەنىنە شىن قۋاندىم. روزانى ساحنادان جىبەرگىلەرى كەلمەي، تۇرەگەپ تۇرىپ ۇزاق قول سوققان كورەرمەندى كورىپ، كەۋدەمدى ماقتانىش كەرنەدى.

قازىر زامان وزگەردى. ەسترادانىڭ باعىت-باعدارىندا جاڭالىق كوپ. زاماناۋي مۋزىكانىڭ قىر-سىرىن جەتىك مەڭگەرگەن، الەمدىك ءان ونەرىنىڭ مىقتىلارىمەن باسەكەگە تۇسە الاتىن جاستارىمىز كوپ. دەسە دە سولاردىڭ كوش باسىندا ەتالون بولىپ روزا تۇراتىنى انىق. ءالى دە حالىققا بەرەرى كوپ. ءالى دە داۋسىنىڭ قۋاتى تايعان جوق. كونتسەرتتەرىنىڭ ءبارىن تەك قانا وركەستردىڭ سۇيەمەلدەۋىمەن وتكىزىپ كەلەدى. كەيدە وزگەلەر فونوگراممامەن شىرقايتىن ءان كەشتەرىندە دايىن جازبانى وشىرتكىزىپ تاستاپ، ءوز ۇنىمەن اندەتىپ كەتەدى. ۇيرەنبەگەن ادامعا فونوگراممامەن ءان سالۋ قيىن. ءان ايتۋ دا سپورتپەن اينالىسۋ سياقتى تۇراقتى جاتتىعۋدى قاجەت ەتەتىن ءىس قوي. ءۇنىڭدى ۇنەمى بابىندا ۇستاماساڭ، بوياۋىن جوعالتادى. بۇل تۇرعىدان العاندا روزانى مىقتى باپكەر دەۋگە بولادى. قاي ساحناعا شىقسا دا، قاي كەزدە ءان سالسا دا – داۋىسى وزگەرمەيدى. ونىڭ ءۇنىن ميلليونداردىڭ اراسىنان اجىراتىپ الۋعا بولادى، روزانىڭ دارا داۋىسىن ەشكىممەن شاتاستىرۋ مۇمكىن ەمەس. ءجۇزىن كورمەسەڭ، داۋىسىن ايىرىپ بولمايتىن بۇگىنگى انشىلەر سونداي دارالىققا ۇمتىلسا ەكەن دەيسىڭ.

روزا ەكەۋمىزدىڭ ەكى دۋەتتىك ءانىمىز بار. داۋسىمىز جاقسى ۇيلەسىم تاباتىندىقتان بولار، ونىمەن بىرگە ءان ايتۋ جاننىڭ راقاتى. «سەن ءاندى جۇرەگىڭمەن ايتاسىڭ، سول قاسيەتىڭ ۇنايدى»، – دەيدى ماعان. ال مەن ونىڭ ءاندى ءتۇسىنىپ ايتاتىنىنا، سول ءاننىڭ كەيىپكەرىنە اينالىپ كەتەتىنىنە ءتانتىمىن. اللا قۋات بەرسە، ءالى تالاي ءان جازىپ، ساحناعا بىرگە شىعارمىز.

داۋىسىنىڭ مۇمكىندىگى كەڭ بولعاندىقتان، روزاعا جانردىڭ دا، ءاننىڭ دە جاتتىعى جوق. حالىق اندەرىن قالاي قۇلپىرتىپ جىبەرەدى دەسەڭشى. كەزىندە «بالاپان قازدى»، «بيپىلدى» قالاي تۇلەتتى، «كەرىم-اۋ ايدايدى» قالاي قۇبىلتتى. بۇگىنگى انشىلەر حالىق ءانىن ايتسا، جاڭا بوياۋ قوسامىن دەيدى دە، ءاننىڭ بەرەكەسىن كەتىرەدى. ال روزا، كەرىسىنشە، ءبارىمىزدىڭ قۇلاعىمىزعا سىڭگەن ءاندى بۇرىنعىدان بەتەر بايىتىپ، جاڭعىرتا تۇسەدى.

ساحنادا جۇرگەنىنە 40 جىلدان اسسا دا، روزا سول باياعى قىز كۇنىندەگىدەي ادەمى. سىرت سىمباتى قاز-قالپىندا. ونىڭ ءبارى ۇلكەن ەڭبەكتىڭ، مىقتى ەرىك-جىگەردىڭ ارقاسى. ساحنانىڭ ادامى بولعاننان كەيىن حالىقتىڭ قۇلاق قۇرىشىن قاندىرىپ قانا قويماي،  كوزىن دە تويدىراتىنداي سىر مەن سىمباتتىڭ بولۋى ماڭىزدى. قاي قىرىنان قاراساڭ دا، روزادان ءمىن تاپپايسىڭ. ناعىز تالانت، ساحنانىڭ حاس شەبەرى سونداي بولۋى كەرەك.

 

اقجول مەيىربەكوۆ،

قازاقستان رەسپۋبليكاسىنىڭ

ەڭبەك سىڭىرگەن ءارتىسى:

‒ روزا رىمباەۆا – ەسترادا جانرىندا جارق ەتىپ شىققان جۇلدىزداردىڭ ءبىرى. شىعىس قازاقستان وبلىسىندا تۋىپ، قاراپايىم تەمىرجولشىلار وتباسىندا تاربيەلەنگەن تالانتتى قىزدىڭ ونەرگە دەگەن ماحابباتى قاسيەتتى سەمەي توپىراعىنان باستاۋ العان. سەمەيدەگى مۋزىكالىق ۋچيليششەنى بىتىرگەن سوڭ ارمان قۋىپ الماتىعا كەلگەن بويجەتكەن تەاترالدىق-كوركەم ونەر ينستيتۋتىندا ونەردىڭ قىر-سىرىن مەڭگەرەدى. ساحناداعى العاشقى قادامىن رەسپۋبليكالىق «گۇلدەر» جاستار ەسترادالىق ءانسامبلىنىڭ ءسوليسى بوپ باستاعان روزا ءا دەگەننەن-اق كوزگە ءتۇسىپ، 1977 جىلى «التىن ورفەيدى» جەڭىپ الادى. ودان كەيىن «قازاقكونتسەرت» بىرلەستىگى جانىنان قۇرىلعان «اراي» ەسترادالىق ءانسامبلىنىڭ قۇرامىندا ونەر كورسەتتى.

ءانشىنىڭ باعىن اشاتىن – ءان. ەسىمى قازاق دالاسىنا تەگىس تانىلعان روزانىڭ حالىقارالىق دارەجەدە بەلگىلى بولۋىنا س.بايتەرەكوۆتىڭ «ءاليا» ءانى سەبەپكەر بولدى. قازاقتىڭ باتىر قىزى ءاليا مولداعۇلوۆانىڭ ارۋاعى قولداعان بولار، وسى اننەن كەيىن روزا رىمباەۆانىڭ ونەرى ورلەۋ جولىنا ءتۇستى. قازاق ءانشىسىنىڭ ەسىمى پوستكەڭەستىك ەلدەرگە، ەۋروپاعا تانىلدى. «ءاليا» روزانىڭ ەكىنشى اتىنا اينالدى دەسەك، ارتىق ايتقانىمىز ەمەس.

روزا رىمباەۆا 29 جاسىندا قازاقستاننىڭ حالىق ءارتىسى اتاندى. مۇنداي دارەجەگە ەكىنىڭ ءبىرى قول جەتكىزە المايدى. ويتكەنى بۇل – سايىستا جەڭىپ الاتىن جۇلدە ەمەس، بۇل اتاق – حالىقتىڭ بەرگەن باعاسى. روزانىڭ ەل اراسىندا «قازاق ەستراداسىنىڭ پريمادونناسى» اتانۋى دا – كوپتىڭ سۇيىسپەنشىلىگى، ەلدىڭ ەشتەڭەگە ساتىلمايتىن ىقىلاسى.

روزا بارشامىزدى ونەرىمەن عانا ەمەس، قاراپايىمدىلىعىمەن دە باۋراعان جان. اتاعى التى الاشتى بىلاي قويعاندا، الەمگە جەتىپ تۇرسا دا، كوكىرەك كەرگەنىن كورگەن ەمەسپىز. ۇنەمى ۇستامدى، كىشىپەيىل قالپىنان تانبايدى. دۋەت بوپ ءان ايتايىق دەپ ۇسىنىس جاساعان جاستاردىڭ بەتىن قايتارمايدى. اقىل سۇراعان ءىنى-سىڭلىلەرىن دەمەۋگە، قولداۋ كورسەتۋگە قاشان دا ءازىر. سوندىقتان ونەردەگى  جاس  تا، جاسامىس تا ونى سىيلايدى. ارىپتەستەرىنىڭ اراسىندا وعان دەگەن قىزعانىش، يا بولماسا كورە الماۋشىلىق جوق. ويتكەنى روزا – جانى تازا، جۇرەگى اق ادام. ەشكىمنىڭ  الا ءجىبىن اتتامايدى. ادامگەرشىلىكتى، اردىڭ تازالىعىن بارىنەن بيىك قويادى. سونىسى ءۇشىن قادىرلى.

 

ۇقساس جاڭالىقتار

Back to top button