ەركىنباي اكىمقۇلوۆ: مەنىڭ ميسسيام – كومپوزيتوردىڭ كوركەم بەينەسىن جاساۋ

ەركىنباي اكىمقۇلوۆ ەسىمى ادەبيەتتى قۇلاي سۇيەتىن كوزى قاراقتى وقىرمانعا جاقسى تانىس. جاستاردىڭ ءومىرىن، تاعدىرىن شىعارمالارىنا ارقاۋ قىلعان قالامگەر ادەبيەت الەمىنە كەش كەلدى. ويتكەنى ول جۋرناليستيكا سالاسىندا ۇزاق بوگەلدى. بىراق قالام قاشان دا ونىڭ سەرىگى بولدى، ءوزىنىڭ بويىنداعى تالانتىن باعامداي ءبىلدى. ادەبيەتتىڭ، قازاق ءتىلىنىڭ الدىنداعى جاۋاپكەرشىلىگىن سەزىنە الدى. اۋەلى ءومىردىڭ، سودان كەيىن ادەبيەتتىڭ قادىر-قاسيەتىن ۇعىنىپ بارىپ، كوركەم دۇنيە جازۋعا كىرىستى. ول ادەبيەت الەمىنە جولدان قوسىلعانداردىڭ قاتارىنان ەمەس. قايتا ادەبيەتتىڭ قىر-سىرىن ۇعىنىپ، تۇڭعيىق الەمنىڭ ەسىگىن يمەنە اشقان تالانتتاردىڭ قاتارىنان. ونىڭ قازاق اراسىندا «ءان-اعا» اتانعان كومپوزيتور ءشامشى قالداياقوۆتى اسقاقتاتا جازعان شىعارمالارى وقىرماننىڭ جۇرەگىنە توتە جول تاپتى.

– شىعارمالارىڭىزعا ارقاۋ بولعان وقيعالاردىڭ كوپشىلىگى ومىردەن الىنعان ەكەن. جالپى، تۋىندىلارىڭىزعا تاقىرىپتى، كەيىپكەردى قالاي تاباسىز؟ ارنايى ىزدەيسىز بە؟

– ويدا جۇرگەن دۇنيەنى شىعارۋ ءۇشىن اۋەلى شىعارمانىڭ كومپوزيتسياسىن ويلاستىرىپ الاسىڭ. سودان كەيىن  شىعارمانىڭ اتىن قالاي قويۋ كەرەك، قايسىسى تارتىمدى بولادى دەگەندى ويلايمىن. بۇل بارلىق جازۋشىلاردا بولاتىن جاعداي شىعار. نەگىزىنەن، تۋىندىنىڭ اتاۋى وقىرماندى شاقىرىپ تۇرۋى كەرەك، سەلت ەتكىزۋى كەرەك. سول جاعىنا ءمان بەرەمىن.

مەنىڭ نەگىزگى قوزعايتىن تاقىرىبىم – جاستار ءومىرى. شىعارمالارىم نەگىزىنەن جاستارعا، ستۋدەنتتەر مەن وقۋشىلارعا ارنالادى. ال كەيىپكەرلەر ومىردەن الىنادى. مەنىڭ قالامگەرلىك اتىمدى العاش شىعارعان «قوش بول، البوم!» پوۆەسىن جازۋ تاريحىمدى ايتىپ بەرەيىن. ىسساپارمەن وڭتۇستىك قازاقستان وبلىسىنىڭ ماقتارال اۋدانىنا بارعانمىن. اۋىل ارالاپ ءجۇرىپ، بولىمشە مەڭگەرۋشىسىنىڭ ۇيىندە (قاي اۋىل ەكەنى ناقتى ەسىمدە جوق)  بولدىم. سوندا شكافتىڭ ۇستىندە تۇرعان ءبىر داپتەرگە كوزىم ءتۇسىپ، ءىشىن اشىپ قارادىم. داپتەردى اشسام، «قوش بول، البوم!» دەپ جازىلىپ تۇر. ءارى قاراي پاراقتاپ ەدىم، مەكتەپ ءبىتىرۋشى وقۋشىلاردىڭ تىلەكتەرى جازىلىپتى. ارقايسىسى ءوزىنىڭ ارمان-ماقساتىن، دۇنيەگە كوزقاراسىن، بولاشاققا دەگەن جوسپارلارىن تىزبەلەپتى. داپتەرگە قاراپ تۇرىپ، «مىناۋ ءبىر جاقسى دۇنيە ەكەن-اۋ» دەپ ويلادىم. «قوش بول، البوم!» دەگەن تاقىرىپ قاتتى ۇنادى. ءسويتىپ، وسى تاقىرىپتى كەڭەيتىپ، ءبىر شىعارما جازۋدى ۇيعاردىم. ءوز ومىرىمىزدەگى وقيعالاردى قوسىپ، كەڭىنەن تارقاتىپ، جازىپ شىقتىم.  بۇل تۋىندى جامان شىقپاعان سەكىلدى. وقىرمانداردىڭ دا، سىنشىلاردىڭ دا باعاسى وڭ بولدى. وسى شىعارمام جارىققا شىققاننان كەيىن ەلدىڭ تۇكپىر-تۇكپىرىنەن تولاسسىز حاتتار كەلە باستادى. ءبىر وكىنىشتىسى، سول حاتتاردى جيناقتاپ، ساقتاپ قويماعان ەكەنمىن. كوشىپ-قونىپ جۇرگەندە، سول حاتتاردىڭ ءبىرى دە قالمادى. ال حاتتاردى جيناقتاۋدا ازەكەڭ – ءازىلحان نۇرشايىقوۆ مىقتى بولاتىن. جۇبايى ءوزىنىڭ حاتشىسىنداي بولىپ، كەلگەن حاتتىڭ ءبارىن رەتتەپ قويادى ەكەن.

– شوقتىعى بيىك شىعارمالارىڭىزدىڭ ءبىرى – «ءشامشى قالداياقوۆ – ءان پاتشاسى» رومانى. بۇل تۋىندىنى جازۋ سىزگە قيىندىق تۋعىزباعان بولار. ءسىزدىڭ «لەنينشىل جاسقا» جاريالاعان العاشقى ماقالاڭىز دا ءشامشى تۋرالى بولعانىن بىلەمىز.

– شاكەڭ – ءشامشى قالداياقوۆ قازاق حالقىنىڭ ۇلى كومپوزيتورى عوي. بىراق اۋەلدە ونى جۇرت بىلە قويعان جوق. ءان ايتاتىنىن، مۋزىكا شىعاراتىنىن ستۋدەنتتەر عانا ءبىلدى-اۋ سول كەزدە. ال شاكەڭ ەكەۋمىزدىڭ جولىمىزدى تاعدىر توعىستىردى. ول كونسەرۆاتوريادا وقىپ جۇرگەندە 3-4 جىگىت بولىپ پاتەردە بىرگە تۇردىق. 1958 جىلدىڭ اياعى بولاتىن. 1967 جىلى شامشىگە قازاقستان كومسومول سىيلىعىنىڭ لاۋرەاتى اتاعى بەرىلدى. سول كەزدە «قازاق ادەبيەتى» گازەتىنە شاكەڭنىڭ شىعارماشىلىق ءومىرى جايىندا ماتەريالىم شىقتى. بىراق بۇل ءشامشى قالداياقوۆ تۋرالى جازعان العاشقى ماقالام ەمەس. وعان دەيىن، 1959 جىلدىڭ تامىز ايىندا «لەنينشىل جاس» گازەتىنە جۇمىسقا قابىلداندىم. سول كەزدە شاكەڭدى كونسەرۆاتوريادان وقۋدان شىعارىپ جىبەرگەن ەدى. بۇل حاباردى ەستىگەننەن كەيىن گازەتكە «اكىمشىلىكتەن ءارى اسپاي» دەگەن تاقىرىپپەن ماقالا جازدىم. ماقالا جارىق كورگەننەن كەيىن قازاقستان كومسومولىنىڭ ورتالىق كوميتەتىندەگىلەرى ارالاسىپ، ءشامشى قالداياقوۆ وقۋىنا قايتا ورالدى.  بۇرىن وقىماي كەتكەن ءابىلاحات ەسپاەۆ، اسەت بەيسەۋوۆتى دە وقۋعا قايتادان قابىلدادى. سودان باستاپ ارالاسىپ كەتتىك. ءبىر ايتا كەتەتىنى، سول كەزدە ورتالىق كوميتەت «ۇشەۋىنە دە جاعداي جاسايمىز، ءۇي-جاي الىپ بەرەمىز، ارنايى ستيپەنديا تاعايىندايمىز» دەپ ۋادەنى ءۇيىپ-توككەن بولاتىن. بىراق سونىڭ ءبارى ءسوز كۇيىندە قالدى.

ءبىر وكىنىشتىسى، شاكەڭ كونسەرۆاتوريانى بىتىرە العان جوق. شىعارماشىلىق جۇمىسقا ارالاسىپ كەتتى. الايدا كوپ جەردە قىزمەت ەتپەدى. تەك قانا قازاق راديوسىنىڭ مۋزىكا رەداكتسياسىندا ازداعان ۋاقىت ىستەدى. كوبىنە اندەرىن جازىپ، حالىققا تاماشا شىعارمالارىن تارتۋ ەتىپ ءجۇردى. حالىق دارىندى ۇلىن سول كەزدە ىستىق ىقىلاسىنا بولەپ، قۇرمەتىن اياماي كورسەتتى. نۇرسۇلتان الىمقۇلوۆ ەكەۋى «مويىنقۇمدا» دەگەن ءاندى جازعاندا، جامبىل وبلىسى، مويىنقۇم اۋداندىق پارتيا كوميتەتى سىي-قۇرمەت كورسەتىپ، ءشامشى قالداياقوۆقا «جيگۋلي» كولىگىن، نۇرسۇلتان الىمقۇلوۆقا ات مىنگىزدى دەپ ەستىگەنبىز.

«كەيدە عىلىمعا شىنداپ باس قويىپ، بارلىق دۇنيەنى ۇمىتىپ كەتسە، ودان ەشتەڭە شىقپايدى. ال ونىڭ ءنارىن، نەگىزىن العاندار عانا ومىردە دە، عىلىمدا دا جول تاۋىپ كەتەدى» دەيدى عوي. سول سەكىلدى شاكەڭ ءوزىنىڭ تالانتىن، شىعارمالارىنىڭ حالىققا قاجەت ەكەنىن ءبىلدى عوي دەپ ويلايمىن. «مەنىڭ قازاقستانىم» دەگەن مارش تۇرىندەگى ءاندى جازدى. بۇل ءاننىڭ جازىلۋ تاريحىن جاقسى بىلەمىن.  شاكەڭ ءدال وسى ءان ءوزىنىڭ اتىن الەمگە تانىتاتىنىن بىلگەن سەكىلدەنەدى.

جالپى، ءشامشىنىڭ ءومىرى وسى تۋىندىمدا تولىق قامتىلدى-اۋ دەپ ويلايمىن. ارينە، ءشامشى قالداياقوۆ تۋرالى كەلەشەكتە ءالى تالاي جازۋشى قالام تەربەر. ەستەلىك جازامىن دەۋشىلەر دە تابىلار. بىراق سونىڭ ءبارى مەنىڭ شىعارماما كوز سالاتىن شىعار. ال وقىرماندار «كوپكە بەلگىلى كومپوزيتوردىڭ ءومىر جولى قانداي بولدى ەكەن» دەگەن ويمەن قولعا الادى دەپ ۇمىتتەنەمىن. بۇل – ناقتى ومىرباياندىق شىعارما ەمەس، ءبىراز كوركەمدەلگەن تۇستارى دا بار.

– روماندا ءشامشىنىڭ شىعارماشىلىعىنان گورى ومىرىنە كوبىرەك باسىمدىق بەرۋىڭىزدىڭ سىرى نەدە؟

– دۇرىس ايتاسىڭ، ومىرىنە باسىمدىق بەردىم. حالىق ونىڭ ءومىرى تۋرالى شىندىقتى تولىق بىلمەۋى مۇمكىن. ونىڭ ۇستىنە شاكەڭ تۋرالى تارالعان بوس سوزدەر، ارتىق اڭگىمەلەر كوپ. جازۋشى ورازبەك بودىقوۆ شاكەڭنىڭ ءومىرىنىڭ كەيبىر ساتتەرىن «ءشامشى قالداياقوۆ تۋرالى حيكاياتتار» اتتى ەڭبەگىندە جاريالادى. ءسويتىپ، ورازبەك بودىقوۆ ماعان: «ەركىنباي، ءشامشىنىڭ كوركەم ادەبيەتتەگى بەينەسىن جاساۋ سەنىڭ پارىزىڭ»، – دەپ تاپسىردى. ال مەن ۇلتىن سۇيگەن، ەلىن سۇيگەن ءشامشى قالداياقوۆپەن ستۋدەنتتىك كەزدەن تانىس بولدىم، 30 جىلداي ارالاسىپ تۇردىق. ول تۋرالى كوپ نارسەنى بىلەمىن، تالاي اقپاراتقا قانىقپىن. بىراق ونىڭ ءبارىن قاعازعا تۇسىرە بەرۋگە بولماس. دەگەنمەن مەنىڭ ميسسيام – ۇلى كومپوزيتوردى كوركەم تۇردە بەينەلەۋ بولدى. ءشامشى قالداياقوۆتىڭ شىعارمالارىمەن جۇرت جاقسى تانىس. ال ومىرىندە ورىن العان جاعدايلاردى، ارالاسقان ورتاسىن كوپ ادام بىلە بەرمەيدى. وسىنى جۇرتشىلىققا جەتكىزسەم دەگەن وي بولدى. مۇنى اۆتور رەتىندە ءۇشىنشى جاقپەن ەمەس، ءبىرىنشى جاقپەن بەرگەندى ءجون سانادىم. ياعني، شاكەڭ ءوزى بايانداپ تۇرعانداي ءبىرىنشى جاقپەن جازىپ شىقتىم. بۇل ويىم قاتە بولماعان ءتارىزدى. سەبەبى سىنشىلاردىڭ ءبارى تاڭداعان جولىمنىڭ دۇرىستىعىن ايتتى.

جازۋشىلار وداعى وسى ەڭبەكتى مەملەكەتتىك سىيلىققا ۇسىنىپ ەدى. بىراق بۇيىرمادى. باستىسى، تۋىندىم حالىققا ۇناسا، حالىق كەرەك ەتسە بولدى. كەيدە «ءشامشىنى ورىستار بىلمەيدى-اۋ» دەپ ويلايمىن. وسى كىتاپتىڭ ورىسشا نۇسقاسىن شىعارسا دەيمىن. ءبارىن اۋدارۋ شارت ەمەس، ونىڭ تاعدىرىن كورسەتەتىن ماڭىزدى جەرلەرىن اۋدارىپ، ورىس ءتىلدى وقىرمانعا ۇسىنسا، قانداي عاجاپ بولار ەدى. قازاقتا ورىسشا جازاتىن جازۋشىلار بارشىلىق. مەملەكەتتىك تاپسىرىس بولسا، دۇرىس بولار ەدى. بۇل – كەلەشەكتىڭ ءىسى. امان بولساق، كورەرمىز.

– ءسىز كوركەم دۇنيە جازۋعا كەشتەۋ كەلدىڭىز. بۇل ورالحان بوكەي ايتقانداي، ءسوز ونەرىن قۇرمەت تۇتقاندىعىڭىزدان، جاۋاپكەرشىلىكتى سەزىنگەندىگىڭىزدەن بولار. الدە باسقا سەبەبى بولدى ما؟

– كەش كەلگەنىم راس. 1959 جىلدىڭ تامىز ايىندا «لەنينشىل جاس» گازەتىنە قازگۋ-ءدىڭ جۋرناليستيكا فاكۋلتەتىن بىتىرگەن 4 ۇل، 1 قىزدى قاتارىنان قىزمەتكە الدى. بىراق مەنىڭ بالا كۇنگى ارمانىم – جۋرناليست بولۋ ەمەس، اقىن بولۋ ەدى. مەكتەپتە وقىپ جۇرگەندە، گازەت-جۋرنالدار اقتارامىز، ولەڭدەر وقيمىز. ءسويتىپ ءجۇرىپ، ولەڭ جازۋدى، اقىن بولۋدى ارماندادىم. اۋداندىق، وبلىستىق گازەتتەردە ولەڭدەرىم شىعىپ تۇراتىن. ول كەزدە جۋرناليست بولسام دەگەن وي مۇلدەم جوق.

الماتىعا كەلىپ، ستۋدەنت اتانعان جىلدارى دا ونەرىمىزدى كورسەتۋگە  تىرىستىق. قۇندى ءبىر دۇنيە جازدىم دەي المايمىن. بىراق قالامىم قولىمنان تۇسكەن جوق. ءسويتىپ، گازەتكە جۇمىسقا ورنالاسىپ، اۋەلى ناسيحات بولىمىندە ىستەدىم. ءارتۇرلى بولىمدەردە ىستەپ ءجۇرىپ، سوڭىندا ادەبيەت بولىمىنە كەلدىم. ودان قالالىق پارتيا كوميتەتى جۇمىسقا شاقىرىپ، 1968 جىلى سوندا كەتتىم. كوميتەتتە 6 جىل قىزمەت ەتتىم. 1974 جىلى «جازۋشى» باسپاسىنىڭ جاستار، جاس­وسپىرىمدەر رەداكتسياسىنا مەڭگەرۋشى بولىپ باردىم. «جالىن» باسپاسى اشىلعان كەزدە پروزا ءبولىمىنىڭ رەداكتسيا مەڭگەرۋشىسى بولدىم. ال «جالىن» ءوز الدىنا بولەك باسپا بولعان كەزدە باس رەداكتوردىڭ ورىنباسارلىعىنا دەيىن جوعارىلادىم. سوندىقتان ءوزىمدى اۋەلى ءجۋرناليسپىن دەپ ەسەپتەيمىن.

جۋرناليستىك جولىم كەيىنىرەك جازۋشىلىققا ۇلاستى. اللا ماڭدايعا نە جازسا، سول بولادى ەكەن. بالا كۇنىمدە اقىن بولۋدى ارماندادىم دەپ ەدىم عوي. تۇبىندە اقىن بولماسام دا، جازۋشى رەتىندە بىرقاتار دۇنيەلەرىمدى وقىرمان قاۋىمعا ۇسىندىم. ءوزىمدى اقىنمىن دەمەسەم دە، جازۋشىمىن دەپ ايتا الامىن. كەمەڭگەر جازۋشىمىن دەمەسەم دە، قاتارداعى جازۋشىلاردان كەم ەمەسپىن. ءبىر وكىنىشتىسى، قازىر جازۋشىلارعا دەگەن سىي-قۇرمەت تە ازايدى. نە ىستەپ جاتقانىمەن ەشكىمنىڭ جۇمىسى جوق. قالام­اقى دا جوق بۇرىنعىداي.

– زامانداستارىڭىزدان دۋلات يسابەكوۆ پەن بەكسۇلتان نۇرجەكەنى جوعارى باعالايتىنىڭىزدى بىلەمىز. قازاق ادەبيەتىنەن تاعى كىمدەردى وقيسىز؟

– قازاقتىڭ ماڭدايىنا بىتكەن دارىندى جازۋشىلارى بار. ءابدىجامىل نۇرپەيىسوۆ، ورالحان بوكەي، ءابىش كەكىلباەۆ، تولەن ابدىكوۆ، بەكسۇلتان نۇرجەكەەۆ، دۋلات يسابەكوۆ سىندى ءبىرتۋار قالامگەرلەرىمىزدىڭ تۋىندىلارىن وقىرماندار ىزدەپ ءجۇرىپ وقيدى.

«لەنينشىل جاس» گازەتىندە ادەبيەت ءبولىمىنىڭ مەڭگەرۋشىسى بوپ جۇرگەنىمدە شىعىس قازاقستاننىڭ قاتونقاراعاي اۋدانىنداعى اۋداندىق گازەتتە ىستەپ جۇرگەن ورالحان بوكەيدى «لەنينشىل جاسقا» شاقىرتتىق. ول كەزدە باس رەداكتورىمىز – شەرحان مۇرتازا. شەراعاڭ: «وسى جىگىت بىزگە كەلەر مە ەكەن، حات جازىپ كورسەڭشى» دەگەن سوڭ، ورالحانعا حات جازدىم. ودان بۇرىن «لەنينشىل جاسقا» ورالحاننىڭ سۇلتانماحمۇت تورايعىروۆ جونىندە جازعان  «سارىارقانىڭ كۇزى» دەگەن كولەمدى ماقالاسى شىققان بولاتىن. سوندا بايقادىق ول جىگىتتى. «جازۋى قانداي، تالانتتى جازۋشى ەكەن-اۋ» دەپ تاڭداي قاقتىق. حات جىبەرگەن سوڭ، ورالحان بوكەي شاقىرۋىمىزدى قابىل الىپ، 1967 جىلدىڭ اياعىندا، جاڭا جىل قارساڭىندا «لەنينشىل جاس» گازەتىنە كەلدى. كەيىنىرەك مەنى الماتى قالالىق پارتيا كوميتەتى شاقىرىپ، سوندا كەتەتىن بولدىم دا، ادەبيەت بولىمىندە ورالحان قالدى. سودان ورالحان ءوزىنىڭ تاماشا جازۋشى ەكەنىن، تۇلا بويى تۇنىپ تۇرعان دارىن ەكەنىن كورسەتتى. ءوزىنىڭ اڭگىمەلەرىن، پوۆەستەرىن جاريالاي باستادى. ءوزىنىڭ بويىندا تالانت بارىن ادام سەزەدى عوي. ورالحان سونى جاقسى سەزگەن بولۋى كەرەك، بويىنداعى بار دارىنىن كورسەتتى. شىققان دۇنيەلەرىن وقىرماندار قولدان قولعا تيگىزبەي وقىپ جاتتى.

تولەن ابدىكوۆ تە وتە تالانتتى جازۋشى.  وزىندىك وي-پىكىرى بار ادام. ونىڭ «پاراسات مايدانى» قولىمنان تۇسپەيدى. دۋلات يسابەكوۆ تە سونداي. ادەبيەتتە «ىزدەنۋ» دەگەن تۇسىنىك بار. توقىراپ قالماي، ءوز قازانىندا عانا قايناماي، سىرتتان وزىنە ۇلگى الۋ قاجەت. مۇنداي ىزدەنىس جازۋشىعا وي سالادى. شەتەلدىك ادەبيەتتى وقىسا، كوشىرىپ الادى دەگەن ءسوز ەمەس. كوشىرمەسە دە، وزگەلەردىڭ شىعارمالارىنان وقىعاندارى جازۋشىعا وي سالادى.

ال بەكسۇلتان نۇرجەكە سەزىمتال جازۋشى. جازعاندارى دا نازىك. شىعارمالارى وقىرمانداردى تارتادى، تاڭ قالدىرادى. ءابىش كەكىلباەۆ جارىق دۇنيەدەن ەرتەرەك كەتىپ قالدى. ايتپەسە، ول وقىرمان كۇتكەن تالاي دۇنيەلەردى ءالى جازاتىن ەدى. بارىنە ورتاق ءبىر قاسيەت – بويىنداعى اللا بەرگەن تالانت قوي.

– سانالى عۇمىرىڭىزدا تالاي يگى جاقسىلارمەن ارالاستىڭىز، جولداس بولدىڭىز. قازاقتىڭ ماڭدايىنا بىتكەن ءبىرتۋار ازاماتتاردىڭ ءبىرى وزبەكالى جانىبەكوۆپەن جاقسى ارالاسقانىڭىزدى بىلەمىز.

– وزبەكالى جانىبەكوۆ قازاقتىڭ ارداقتى ازاماتى. ول تۋرالى دەرەكتى حيكايات جازدىم. ول تۋىندى «قازاقستان» باسپا ۇيىندە باسىلدى. وزەكەڭ حالقىمىزدىڭ ماڭدايىنا بىتكەن، قازاق ۇلتىنا ءوزىنىڭ بار قابىلەتىن، جان-دۇنيەسىن، ءومىرىن ارناعان، ەل ءۇشىن قىزمەت ەتكەن قازاقتىڭ پەرزەنتى. تاريحتا، قازاق ومىرىندە ونىڭ ەسىمى ەشقاشان وشپەيدى. وزەكەڭنىڭ قايراتكەرلىگى، ەلگە سىڭىرگەن ەڭبەگى ولشەۋسىز. كىتاپتا سونى كورسەتۋگە تىرىستىم. بۇل كىتاپتى ىزدەپ ءجۇرىپ وقيتىندار بار. سول قۋانتادى. وسىنداي ازاماتتاردى وقىرمانداردىڭ مەنىڭ كىتابىم ارقىلى جاقىن تانىعانىنا قۋانامىن.

– سەكسەننىڭ سەڭگىرىنە شىقتىڭىز. وتكەن كۇندەرگە كوز تاستاپ، سارالاعان بولارسىز. وكىنگەن ساتتەرىڭىز كوپ بولدى ما؟

– وكىنگەن ساتتەرىم كوپ بولعان جوق. جالپى، مەنىڭ وكىنىشىم بىرەۋ. جۋرناليستيكاعا بەكەر باردىم-اۋ. ودان گورى فيلولوگياعا بەت بۇرىپ، ادەبيەتكە بەرىلۋىم كەرەك ەدى. بەيسەنباي كەنجەباەۆ جۋرناليستيكانى بىتىرگەنىمە قاراماستان، فيلولوگيانىڭ اسپيرانتۋراسىنا شاقىرعان. سوعان بارماي قالعانمىن. كەيىن سول ءۇشىن قاتتى وكىندىم. بەكەر باس تارتتىم. «سەن جۋرناليستيكانى قوي، عىلىمعا تەرەڭدەپ بار، سوندا ەلىڭە تيگىزەر پايداڭ كوپ بولادى» دەگەن ەدى بەيسەكەڭ. بىراق بارمادىم، قۇلاق اسپادىم. وسى ءىسىم اعاتتىق بولدى-اۋ دەپ ويلايمىن.

– سۇحباتىڭىزعا راحمەت! امان بولىڭىز!

 

سۇحباتتاسقان

اسەل انۋاربەك

 

ۇقساس جاڭالىقتار

Back to top button