استانا «اقىلدى قالاعا» اينالماق

ەلوردادا جول-كولىك وقيعالارىنىڭ سانى تومەندەگەن. بۇگىندە قالا كوشەلەرىنەن الاقۇيىنداتىپ جۇرگەن كولىكتەردى كەزدەستىرۋ قيىن. جولداعى كىسى ءولىمى دە وتكەن جىلمەن سالىستىرعاندا ەداۋىر ازايعان. بۇل  – استانادا 15 قىركۇيەكتەن باستاپ ىسكە قوسىلعان «سەرگەك»  جۇيەسىنىڭ ناتيجەسى. قىراعى كامەرالار ورناتىلعالى بەرى جۇرگىزۋشىلەر جول ەرەجەسىن مۇقيات ورىندايتىن بولدى. جاڭا جۇيە بۇزاقىلىق پەن قاراقشىلىقتى دا ايتارلىقتاي ازايتتى.

«سەرگەك» سەرتيفيكاتتالعان سۋرەت جانە بەينەجازۋ قۇرىلعىسى جىلدامدىق رەجيمىن اسىرعان، قوعامدىق كولىكتىڭ جولاعىمەن جۇرگەنى (Bus Lane اۆتوبۋستىق جولىمەن) جانە ستوپ-سىزىعىن كەسىپ وتكەن جۇرگىزۋشىلەردىڭ زاڭبۇزۋشىلىعىن تىركەيدى. جىل سوڭىنا دەيىن كوشە قيىلىستارى مەن قالانىڭ سىزىقتىق ايماقتارىندا، سونىمەن قاتار ويىن-ساۋىق ورتالىقتارى، تەاتر، سپورت الاڭدارى، مۋزەي سىندى كوپشىلىك جينالاتىن جەرلەردە وسىنداي 13 مىڭ كامەرا ىسكە قوسىلماق. بۇل كامەرالار تاۋلىك بويى ۇزدىكسىز جۇمىس ىستەپ، تۇسىرىلگەن بەينەماتەريالدار تىرشىلىكتى كەشەندى قامتاماسىز ەتۋ جۇيەسى (تكقج) مەن استانا قالالىق ءىىد جەدەل باسقارۋ ورتالىعى كىرەتىن احۋالدىق ورتالىقتىڭ باقىلاۋىنا الىنادى.

15 قىركۇيەكتەن بەرى «سەرگەك» قۇرىلعىلارى ارقىلى قالادا 1371 اكىمشىلىك قۇقىقبۇزۋشىلىق انىقتالعان. ونىڭ ىشىندە 20 فاكتى – ۇساق بۇزاقىلىق، 135 فاكتى – قوعامدىق ورىنداردا الكوگولدى سۋسىندار ءىشۋ، 145 فاكتى – قوعامدىق ورىنداردا ادامداردى مازالاۋ، 300-دەن استام فاكتى – جول ءجۇرىسى قاعيداسىن بۇزۋ جانە شامامەن 700 فاكتىگە جۋىق باسقا دا قۇقىقبۇزۋشىلىقتار انىقتالدى. سونداي-اق، «سەرگەك» 7 قىلمىستىق قۇقىق بۇزۋشىلىقتىڭ – بۇزاقىلىق، بوتەننىڭ مۇلكىن ۇرلاۋ مەن توناۋدىڭ بەتىن اشتى.

جاڭا وقۋ جىلى باستالعالى استانا قالاسىنىڭ اكىمدىگى بالالاردىڭ قاۋىپسىزدىگىنە دە ەرەكشە كوڭىل بولۋدە. قازىرگى تاڭدا بالاباقشالار مەن مەكتەپتەرگە جاقىن جەردەگى كولىك قوزعالىسىنىڭ جىلدامدىعى ساعاتىنا 40 شاقىرىمعا دەيىن شەكتەلگەن. سوندىقتان دا ونداي ورىندار سۋرەت جانە بەينەجازۋ جۇيەلەرىنىڭ نازارىنا ەرەكشە الىنىپ وتىر.

جالپى، وسى جىلدىڭ سوڭىنا دەيىن استانا قالاسىنىڭ اۋماعىنداعى 13 مىڭ سۋرەت جانە بەينەجازۋ كامەرالارى ءبىرتۇتاس جۇيەگە بىرىكتىرىلەتىن بولادى. استانانىڭ ساۋدا-ويىن-ساۋىق ورتالىقتارى مەن تەاترلارىندا، سپورت ارەنالارى مەن مۇراجايلارىندا جانە باسقا دا جۇرتشىلىق كوپ جينالاتىن ورىنداردا ورناتىلعان 3 مىڭ بەينەكامەرا دا وسى جۇيەگە ەنەدى. سونداي-اق جىل سوڭىنا دەيىن ادامدار كوپ شوعىرلاناتىن ورىنداردا – 4 000، جول بويلارى مەن قيىلىستارىندا 6 000 «سەرگەكتىڭ» فوتوبەينەكامەرالارى قويىلماق. دەمەك قالانىڭ قاي بۇرىشى بولسىن باقىلاۋدا بولادى دەگەن ءسوز.

ارناۋلى جازبا كامەرالارى ورناتىلاتىن ورىندار استانا قالاسى ىشكى ىستەر دەپارتامەنتىنىڭ اكىمشىلىك پوليتسياسى باسقارماسى جانە جەرگىلىكتى پوليتسيا قىزمەتى ماماندارىنىڭ قاتىسۋىمەن الدىن الا كەڭىنەن تالقىلانعان. سونداي-اق، قازاقستان رەسپۋبليكاسى باس پروكۋراتۋراسىنىڭ قۇقىقتىق ستاتيستيكا جانە ارناۋلى ەسەپ كوميتەتىنىڭ جول-كولىك وقيعاسى مەن قىلمىسقا بايلانىستى ەلەكتروندى كارتاسىنداعى مالىمەتتەر دە ەسكەرىلگەن.

«تسيفرلى قازاقستان» باعدارلاماسىن جۇزەگە اسىرۋ ماقساتىندا قولعا الىنعان كەشەندى جۇمىس ارقىلى استانا «اقىلدى قالاعا» اينالادى. ەلوردانىڭ كوشەلەرى قالا تۇرعىندارى مەن قوناقتارى ءۇشىن قاۋىپسىز بولادى دەگەن ۇلكەن ءۇمىت بار. جاسىراتىنى جوق، «سەرگەك» ءىس-شاراسى قولعا الىنعانعا دەيىن استانا كوشەلەرىندە جول-كولىك وقيعالارى جيىلەپ كەتكەن بولاتىن. اسىرەسە جاياۋ جۇرگىنشىلەردىڭ كولىك جۇرگىزۋشىلەرىنىڭ كىناسىنەن جاپا شەگىپ، ءتىپتى مەرت بولعاندارى دا از ەمەس. بالالاردىڭ دا جول-كولىك وقيعالارىنىڭ سالدارىنان زارداپ شەگۋى كوبەيگەن ەدى. قازىر استاناداعى وقۋ-ءبىلىم ورىندارىنىڭ ماڭىندا جىلدامدىقتى ساعاتىنا 40 شاقىرىمنان اسىرماۋ كەرەكتىگىن ەسكەرتەتىن بەلگىلەر جاسالدى. سونىمەن بىرگە بەينەباقىلاۋ كامەرالارىنىڭ دا قاتارى ارتتى. وسىنىڭ ءبارى استانا كوشەلەرىندە قۇقىق بۇزۋشىلىقتى ازايتۋعا سەپ بولماق.

قالا كوشەلەرىن جارىقتاندىرۋدى جاقسارتۋ ماقساتىنداعى جۇمىس تا وسى «تسيفرلى استانا» باعدارلاماسىنىڭ اياسىندا، «CISCO»، «PHILIPS» جانە «LEDSolutions» كومپانيالارىنىڭ قاتىسۋىمەن جۇزەگە اسىپ وتىر. بۇل باعىتتا ەكى قاناتقاقتى جوبا قولعا الىندى. بۇل «اقىلدى كوشە جارىقتاندىرۋ» جوباسى. وسى جوبا ارقىلى قالا كوشەلەرىن جارىقتاندىرۋعا جۇمسالاتىن ەلەكتر ەنەرگياسىنىڭ مولشەرىن 60 پايىزعا دەيىن ازايتۋعا، شامداردى ۇستاۋعا كەتەتىن شىعىندى 30 پايىزعا دەيىن كەمىتۋگە، ونىڭ قىزمەت كورسەتۋ مەرزىمىن التى ايدان 15 جىلعا دەيىن ۇزارتۋعا مۇمكىندىك بولادى. جوسپارعا سايكەس شامامەن 25000 نىسانداعى شامدار اۋىستىرىلادى.

«تسيفرلى استانانىڭ» الەۋەتىن ارتتىرۋ بويىنشا قاراستىرىلعان تۇجىرىمداما «اقىلدى قالالاردىڭ» ەۋروپالىق ۇلگىسى بويىنشا جاسالعان. قازىرگى ۋاقىتتا قالادا ينفراقۇرىلىم مەن باسقارۋ ادىستەرىن جەتىلدىرۋ باعىتىندا جۇزەگە اسىپ جاتقان جۇمىستار استانانى «اقىلدى قالاعا» اينالدىراتىن بولادى. بۇل رەتتە «اقىلدى ەكونوميكا»، «اقىلدى قوعام»، «اقىلدى باسقارۋ»، «اقىلدى ءومىر سالتى»، «اقىلدى كولىك»، «اقىلدى قورشاعان ورتا» سەكىلدى جوبانى ىسكە اسىرۋدىڭ نەگىزگى باعىتتارى بەلگىلەندى. كەشەندى باعدارلاما وسى باعىتتاردىڭ بارلىعىن قامتىپ، استانا قالاسىنىڭ اكىمدىگىمەن بىرلەسە وتىرىپ، كەزەڭ-كەزەڭ بويىنشا جۇزەگە اسپاق.

 

 

ۇقساس جاڭالىقتار

Back to top button