«دەنساۋلىق جولى» اكتسياسى باستالدى

الماتىدا «ءبىز – سالاۋاتى ءومىر سالتى ءۇشىن!» ۇرانىمەن جىل سايىن ۇيىمداستىرىلاتىن «دەنساۋلىق جولى – 2017» اكتسياسى بيىل دا جالعاسىن تاپتى. شارانىڭ اياسىندا دەنساۋلىعىنا كوڭىل بولۋگە ۋاقىت تاپپايتىن قارا بازارداعى ساۋداگەرلەر ارنايى تەكسەرۋدەن وتۋدە. 

اكتسيا  1 ماۋسىمنان 31 تامىزعا دەيىن ۇيىمداستىرىلادى. بۇل كۇندەرى قالا مەكەمەلەرى مەن ۇيىمدارىندا، بازارلاردا   پروفيلاكتيكالىق تەكسەرۋلەر، اشىق ەسىك كۇندەرى، ماماندار كەڭەستەرى سالاۋاتتى ءومىر سالتى اقپاراتتىق ناۋقانى ءوتىپ، حالىقتىڭ دەنساۋلىعىنا بايلانىستى ارنايى ستاتيستيكالىق دەرەكتەر سارالانادى. سوڭعى جىلدارى ۆيچ دەرتىنە شالدىققانداردىڭ قاراسى باسىم. اسىرەسە، بۇل سان ءتۇرلى ۇلت پەن ۇلىس وكىلدەرى شوعىرلانعان بازارداعى ساۋداگەرلەر اراسىندا ءجيى تىركەلەدى. ال ولاردىڭ تەكسەرۋدەن ءوتىپ، دەنساۋلىعىنىڭ سىرىن ءبىلىپ جاتقانى كەمدە-كەم.

الماتى قالاسى جيتس  الدىن الۋ جانە وعان قارسى كۇرەس ورتالىعى  قىزمەتكەرلەرى دە  «دەنساۋلىق جولى – 2017» اياسىنداعى  كەڭ كولەمدى اكتسياعا  قاتىسىپ، قالا بازارلارىندا ايتۆ-ينفەكتسياسىنا ەكسپرەسس-تەستىلەۋ وتكىزۋدى قولعا الدى. اكتسيانىڭ العاشقى كۇندەرىندە موبيلدىك زەرتحانا «ياليان»، «راحات» بازارلارىنا بارىپ قايتتى. مەديكتەر تەكسەرىلۋگە كەلگەندەردى تەستتەن وتكىزىپ، كەڭەستەر بەرىپ، سۇراقتارىنا جاۋاپ بەردى. ەكسپرەسس-تەستىلەۋ ءادىسى 15 مينۋت ارالىعىندا ادامنىڭ ايتۆ-ستاتۋسىن بىلۋگە مۇمكىندىك بەرەدى. تەستىلەۋ تەگىن، جاسىرىن  جانە قۇپيا وتەدى. ءتىپتى، اكتسياعا بازارداعى ساتۋشىلاردان بولەك،  كەلۋشىلەر دە قاتىسا الادى.

قازىردىڭ وزىندە دارىگەرلەر 100 ادامدى قابىلدادى. ولاردىڭ ىشىندە بازارداعى ورىن يەلەرى، ساۋداگەرلەر، جۇك تاسۋشىلار دا بار. اتاپ ايتقاندا، جەتىسۋ اۋدانىنداعى №11 ەمحانا قىزمەتكەرلەرى ەكسپرەسس-زەرتحانا ارقىلى كەلۋشىلەردىڭ حولەستەرين مەن قانت دەڭگەيىن تەكسەرۋدە. سونداي-اق، فليۋرا قۇرىلعىسى دا جۇمىس ىستەيدى. «بيىلعى اكتسيا 2 ايعا سوزىلادى. جۇمىس ورنىنان كەتە المايتىن جۇمىسكەرلەردى، بازار قىزمەتكەرلەرىن تەكسەرىپ جاتىرمىز. ولاردىڭ اراسىنان دەنساۋلىعى ناشار ادامداردى ارى قاراي باقىلاۋعا الاتىن بولامىز»، – دەدى الماتى سالاۋاتتى ءومىر سالتىن قالىپتاستىرۋ ورتالىعىنىڭ ءبولىم باسشىسى گۇلسارا ەسماعامبەتوۆا. مامانداردىڭ ايتۋىنشا، كەلۋشىلەردىڭ اراسىندا مىندەتتى مەديتسينالىق ساقتاندىرۋ جايىندا ساۋال قويعاندار وتە كوپ بولعان. «پاتسيەنتتەر تاراپىنان ساۋال كوپ. اسىرەسە، ءوزىنىڭ مەديتسينالىق الەۋمەتتىك ساقتاندىرۋ اياسىنداعى ستاتۋسىن بىلمەيتىندەرگە سول جەردە انىقتاپ، ءتۇسىندىرىپ جاتىرمىز»، – دەيدى №11 ەمحانانىڭ پروفيلاكتيكا ءبولىمىنىڭ باسشىسى سۇلتانوۆا جيگاگۇل.

تەستىلەۋدىڭ تاعى ءبىر پايداسى – بۇل  دياگنوزدىڭ ناتيجەسى وڭ بولعان جاعدايدا، قاجەتتى  كومەك الۋعا بولادى جانە ءوز دەنساۋلىعىڭدى ساقتاپ قالۋعا كومەك بەرەدى. جيتس  الدىن الۋ جانە وعان قارسى كۇرەس ورتالىعىنىڭ باس دارىگەرى تالعات باپيەۆتىڭ پىكىرىنشە، ايتۆ-ينفەكتسياسىن الدىن الۋ بارىسىندا ايتۆ-مەن ءومىر سۇرەتىن ادامداردى كەمسىتۋگە جول بەرمەۋ كەرەك جانە ول ءۇشىن كەز كەلگەن كومەك بەرىلەدى.

 

 

ۇقساس جاڭالىقتار

Back to top button