استاناعا "لا سكالا" كەلدى

ەكسپو-2017 حالىقارالىق كورمەسىنىڭ قوناقتارى ءۇشىن تاعى ءبىر جاعىمدى جاڭالىق بار: 1-9 قىركۇيەك ارالىعىندا قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن «استانا وپەرا» ساحناسىندا اتاقتى ميلاندىق لا سكالا تەاترىنىڭ وپەرا ترۋپپاسى، حورى مەن سيمفونيالىق وركەسترىنىڭ العاشقى گاسترولدەرى  ۇيىمداستىرىلادى. بۇل شاراعا يتالياندىق ەنەرگەتيكالىق «Eni» كومپانياسى جانە «استانا وپەرانىڭ» əالەۋمەتتىك سەرىكتەسى «Samruk-Kazyna Trust» قولداۋ كورسەتتى.

لا سكالا تەاترىنىڭ ترۋپپاسى الىپ كەلگەن دجۋزەپپە ۆەرديدىڭ «فالستاف» وپەراسى 1، 4، 6 جانە 8 قىركۇيەك كۇندەرىنە جوسپارلانعان. «استانا وپەرا» ءباسپاسوز قىزمەتىنىڭ دەرەگىنە جۇگىنسەك، وپەرا بيلەتتەرى جارتى جىل بۇرىن تۇگەل ساتىلىپ كەتكەن.

«فالستاف» – ايگىلى كومپوزيتوردىڭ ەگدە تارتقان شاعىندا جازعان كومەديالىق شىعارماسى. كۇلكىنى قارۋ ەتە وتىرىپ، ءومىردىڭ شىندىعىن، ادامنىڭ ءتۇرلى مىنەزدەرىن اشۋعا ۇمتىلادى. اسىرەسە، وپەرا مۋزىكاسى – كومپوزيتور شىعارماشىلىعىنداعى جەمىستى تۋىندىلاردىڭ ءبىرى. اۋەنى وتە كۇردەلى بولعاندىقتان، بۇل قويىلىمدى ساحنالاۋعا كەز كەلگەن ترۋپپانىڭ باتىلى جەتپەيدى. «فالستافتىڭ» قويۋشى رەجيسسەرى قازاقستانعا وپەرانىڭ كلاسسيكالىق نۇسقاسىن ەمەس، وڭدەلگەن، جاڭاشا نۇسقاسىن اكەلىپ وتىر. وندا رەجيسسەر داميانو ميكەلەتتو قارت مۋزىكانتتاردىڭ ءۇيىن كورسەتە وتىرىپ، ال كومپوزيتوردىڭ جازۋىنداعى نۇسقاسىن فالستافتىڭ ۇيقىداعى ءتۇسى ارقىلى بەرۋگە تىرىسقان. لا سكالا تەاترىنىڭ سوليستەرى امبرودجو ماەستري، كارمەن دجانناتتازيو، يۆونن ناف كورەرمەندەردى ءوز شەبەرلىكتەرىمەن ءتانتى ەتتى.

بۇدان باسقا، 3 قىركۇيەك كۇنى «استانا ارەنا» ستاديونىندا لا سكالا، «استانا وپەرا» تەاترلارى مەن قر مادەنيەت جانە سپورت مينيسترلىگىنىڭ قۇرامالارى اراسىندا فۋتبولدان جولداستىق كەزدەسۋ ءوتتى. ويىن قورىتىندىسى بويىنشا، ءبىرىنشى ورىندى مادەنيەت جانە سپورت مينيسترلىگى جەڭىپ الدى. ەكىنشى ورىندى «استانا وپەرا» تەاترى، ءۇشىنشى ورىندى «Samruk-Kazyna Trust»، ءتورتىنشى ورىندى لا سكالا تەاترى، بەسىنشى ورىندى يتالياندىق ەنەرگەتيكالىق «Eni» كومپانياسى يەلەندى.

 

 

 

ۇقساس جاڭالىقتار

Back to top button