مۇنايشىلاردىڭ  ايتۋلى مەرەكەسى

اباي اتىنداعى مادەني دەمالىس كەشەنىندە قر مۇناي جəنە گاز كەشەنى قىزمەتكەرلەرىنىڭ كۇنىنە ارنالعان سالتاناتتى جيىن ءوتتى. وعان ماڭعىستاۋ وبلىسىنىڭ اكىمى، مەملەكەتتىك ورگان مەن كاسىپورىن باسشىلارى، وبلىستىق ءماسليحات دەپۋتاتتارى، ءوڭىردىڭ قۇرمەتتى ازاماتتارى، ارداگەر-مۇنايشىلار، وبلىس جۇرتشىلىعى قاتىستى.

قازىرگى تاڭدا ماڭعىستاۋدا قازاقستان مۇنايىنىڭ 25 پايىزى ءوندىرىلىپ وتىر. بۇل 18 ملن-نان استام مۇناي جانە 3 ملرد تەكشە مەتر تابيعي گاز. ەلباسىنىڭ تاپسىرماسىنا سايكەس، بۇگىندە قازاقستاننىڭ مۇناي-گاز كەشەنى قارقىندى دامىپ، ەلىمىزدىڭ الەۋمەتتىك-ەكونوميكالىق وركەندەۋىنىڭ ىرگەتاسىنا، قوزعاۋشى كۇشىنە اينالدى.

سالتاناتتى جيىندا ءوڭىر باسشىسى ەرالى توعجانوۆ وبلىس تۇرعىندارىن مەرەكەمەن قۇتتىقتاپ، ەلىمىزدىڭ مۇناي-گاز سالاسىنا ەلەۋلى ۇلەس قوسقانى ءۇشىن بىرقاتار ازاماتتاردى وبلىس اكىمدىگىنىڭ قۇرمەت گراموتالارى جانە العىس حاتتارىمەن ماراپاتتادى.

سونىمەن قاتار، «قازمۇنايگاز» ۇلتتىق كومپانياسى» اكتسيونەرلىك قوعامىنىڭ باسقارما توراعاسى ساۋات مىڭباەۆ قارا التىن يگەرۋشىلەردى ءتول مەرەكەلەرىمەن قۇتتىقتاپ، «مۇناي-گاز كەشەنىن دامىتۋعا قوسقان ۇلەسى ءۇشىن» قازاقستان رەسپۋبليكاسى ەنەرگەتيكا مينيسترلىگىنىڭ مەدالىمەن جانە العىس حاتىمەن ماراپاتتادى. ەلىمىزدىڭ مۇناي-گاز سالاسىنا ەلەۋلى ۇلەس قوسقانى ءۇشىن بىرقاتار ازاماتتار «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامىنىڭ قۇرمەت گراموتاسىنا يە بولدى.

ەلباسىنىڭ «بولاشاققا باعدار: رۋحاني جاڭعىرۋ» باستاماسى دا قوعامدىق سانانى سىلكىندىرىپ، حالقىمىزعا رۋحاني سەرپىلىس اكەلگەن تۇستا ءبىزدىڭ مۇنايشىلارىمىز دا ەل دامۋىنا  ەلەۋلى  ۇلەس  قوسىپ كەلەدى. تاۋەلسىزدىكتىڭ 26 جىلى ىشىندە قازاقستاندىق مۇنايشىلار قىرۋار جۇمىستار اتقاردى. الايدا الدا تۇرعان مىندەتتەر ودان دا زور. سالاعا تىڭ تەحنولوگيالار اكەلىپ، جاڭا كەن ورىندارىن يگەرۋ قاجەت. مۇنايدى سىرتقا شىعارۋ جولدارىن كەڭەيتۋ مەن ونى وڭدەۋ مىندەتى دە ءبىز ءۇشىن وزەكتى. ەلىمىزدىڭ مۇناي-گاز سالاسىندا ەڭبەك ەتەتىن ازاماتتار الدا تۇرعان مىندەتتەردى ابىرويمەن اتقارىپ، يندۋستريالىق-يننوۆاتسيالىق دامۋىمىزعا ۇلەس قوساتىنىنا سەنىمىم مول، – دەدى ءوزىنىڭ قۇتتىقتاۋ سوزىندە ماڭعىستاۋ وبلىسىنىڭ اكىمى ەرالى توعجانوۆ.

قازاقستان رەسپۋبليكاسىنىڭ مۇناي-گاز سالاسى قىزمەتكەرلەرى كۇنىنە ارنالعان سالتاناتتى جيىن سوڭى مەرەكەلىك كونتسەرتكە ۇلاستى.

 

ج.باققوندى ۇلى

ۇقساس جاڭالىقتار

Back to top button