ۋكراينا: سااكاشۆيليگە بوسقىن مارتەبەسى بەرىلمەيدى

ۋكراينانىڭ مەملەكەتتىك كوشى-قون قىزمەتى ودەسسا وبلىسىنىڭ بۇرىنعى باسشىسى ميحايل سااكاشۆيليگە بوسقىن مارتەبەسىن بەرۋدەن باس تارتتى. بۇل جايلى جۋرناليستەرگە ۋكراينانىڭ باس پروكۋرورى يۋري لۋتسەنكو ءمالىم ەتتى، دەپ حابارلايدى قازاقپارات انادولى اگەنتتىگىنە سىلتەمە جاساپ.

«مەنىڭ جاڭالىعىم بار. قازىر مەملەكەتتىك كوشى-قون قىزمەتى سااكاشۆيليگە بوسقىن مارتەبەسىن بەرۋدەن باس تارتتى. ەندى ول اپاتريد (تۇراتىن ەلىندە ازاماتتىعى جوق تۇلعا – رەد.) جانە ونىڭ دەپورتاتسياسىنا مۇمكىندىك بەرمەيتىن جاعداي جوق»، – دەدى لۋتسەنكو.

سااكاشۆيلي 2015 جىلدىڭ 30 مامىرىندا پرەزيدەنت پەتر پوروشەنكونىڭ وكىمىمەن ۋكراينا ازاماتتىعىن العان بولاتىن. ول ودەسسانىڭ گۋبەرناتورى قىزمەتىنە تاعايىندالدى، الايدا 2016 جىلى قىزمەتىنەن كەتىپ، «جاڭا كۇشتەر قوزعالىسى» وپپوزيتسيالىق پارتياسىن قۇردى.

2017 جىلدىڭ شىلدە ايىندا پوروشەنكو سااكاشۆيليدى ۋكراينا ازاماتتىعىنان ايىرۋ تۋرالى جارلىق شىعاردى. قىركۇيەك ايىندا وپپوزيتسيانىڭ قولداۋىمەن سااكاشۆيلي ۋكراينا شەكاراسى ارقىلى پاسپورتتىق باقىلاۋسىز پولشاعا ءوتىپ كەتە الدى. ال ونىڭ جاقتاستارى 17 قىركۇيەك كۇنى ۋكراينا پارلامەنتىنىڭ الدىندا نارازىلىق اكتسيالارىن وتكىزدى.

 

ۇقساس جاڭالىقتار

Back to top button