قىتايدا وتاندىق بالمۇزداققا سۇرانىس ارتۋدا

23-قازاندا قىتايدا Ice Cream Industry Exhibition 2017 كورمەسى ءوتتى. اتالمىش كورمەگە حالىقارالىق دەڭگەيدەگى سالقىن ءونىم ءوندىرۋشى كومپانيالار قاتىستى. قازاقستان اتىنان دا بالمۇزداق ءوندىرۋشى كومپانيا ءوز ونىمدەرىن شىعاردى.

بالمۇزداق شىعاراتىن «شين-لاين» كومپانياسى ۇسىنعان ءونىمدى 60 مىڭ ادام تاماشالاعان. اسپاناستى ەلىندە وتاندىق ديستريبيۋتور بىرنەشە ءونىمدى كورسەتىپتى. اسىرەسە، باحروما – شىعىس ءدامى قىتاي حالقىنا ۇناعان. ەندى وتاندىق ءوندىرۋشى قىتاي نارىعىنا شىعۋدى كوزدەپ وتىر. الايدا بۇل باعىتتا بىرنەشە قيىندىق بار كورىنەدى.

قىتايعا قازاقستاندىق ءسۇت ونىمدەرى مەن بالمۇزداقتى كىرگىزۋ ءۇشىن ۆەتەرينارلىق رۇقسات الۋ كەرەك، ونى قازىر الۋ مۇمكىن ەمەس. ەكى ەل اراسىندا ارنايى كەلىسىم بولعاندا عانا جۇزەگە اسادى. كۋالىكتى راسىمدەۋ ءۇشىن قر اۋىلشارۋاشىلىق مينيسترلىگى مەن ۆەتەرينارلىق باقىلاۋ كوميتەتى جانە قىتايدىڭ وسى ۆەدومستۆولارى ءوزارا كەلىسىم جاساۋى ءتيىس.

قازىرگى تاڭدا «اتامەكەن» ۇلتتىق كاسىپكەرلىك پالاتاسىنىڭ قولداۋىمەن وسى ماسەلە بويىنشا ءتيىستى مەملەكەتتىك ورگاندارمەن كەلىسسوزدەر جۇرگىزىلۋدە. ەڭ باستىسى، بۇل ماسەلە كوكتەمگە دەيىن، ياعني جاڭا ماۋسىمنىڭ اشىلۋىنا دەيىن شەشىلۋى ءتيىس. ەلىمىزدە قازاقستاندىق ءونىمنىڭ ەكسپورتتىق پوتەنتسيالىن ارتتىرۋ تۋرالى ءجيى ايتىلعانىمەن، ازىرگە قانداي دا ءبىر ارتىقشىلىق جوق.  

وتاندىق ءوندىرۋشىنىڭ العا قويىپ وتىرعان ماقساتتارىنىڭ ءبىرى – قىتايلىق نارىققا شىعۋ.

 

 

 

 

 

 

 

 

 

ۇقساس جاڭالىقتار

Back to top button