«اباي وقۋلارىنىڭ» تاعىلىمى

تاياۋدا الماتى قالالىق ءبىرىنشى «اباي وقۋلارى» فەستيۆالى ءوتتى. فەستيۆالدى زاعيپ جانە ناشار كورەتىن ازاماتتارعا ارنالعان رەسپۋبليكالىق كىتاپحانا مەن «كومەكتەس» كوز مۇگەدەكتەرى قوعامدىق قايىرىمدىلىق قورى بىرلەسە وتىرىپ ۇيىمداستىردى.

«اباي وقۋلارى» فەستيۆالىنىڭ ماقساتى – كىتاپحانا وقىرماندارى اراسىندا اباي قۇنانباەۆ شىعارمالارىن ناسيحاتتاۋ ارقىلى قازاق ءتىلىنىڭ مارتەبەسىن كوتەرۋ. فەستيۆالگە الماتى قالاسى مەن وبلىسىنداعى زاعيپتاردىڭ ۇيىمدارى مەن رەسپۋبليكالىق كىتاپحانانىڭ مۇمكىندىگى شەكتەۋلى وقىرماندارى قاتىستى. بايقاۋ ەرەجەسى بويىنشا، قاتىسۋشىلاردىڭ جاسىنا جانە ۇلتىنا ەش شەكتەۋ قويىلماعان.

العاش رەت ۇيىمداستىرىلعان بايقاۋعا قاتىسۋشىلار 5 نوميناتسيا بويىنشا باق سىنادى. سىنعا تۇسكەندەر ۇلى اقىن شىعارمالارىن جانە ابايدىڭ قارا سوزدەرىنەن ۇزىندىلەر وقىدى. سونىمەن قاتار، مۇحتار اۋەزوۆتىڭ «اباي جولى» رومان-ەپوپەياسىنان ۇزىندىلەر وقىلىپ، الەم حالىقتارى تىلىنە اۋدارىلعان اباي شىعارمالارى جينالعانداردىڭ جۇرەگىن تەربەدى. ال قاتىسۋشىلاردىڭ تاعى ءبىر توبى ابايدىڭ ءومىرى مەن شىعارماشىلىعىنا ارنالعان وزدەرىنىڭ اۆتورلىق شىعارمالارىن تەبىرەنە وقىپ، كوپشىلىكتىڭ ىقىلاسىنا بولەندى.

فەستيۆال جەڭىمپازدارى العىسحاتتار مەن اقشالاي سىيلىقتارعا يە بولىپ، ءتۇرلى ۇيىمداردىڭ ارناۋلى جۇلدەلەرىمەن ماراپاتتالدى.

 

 

 

ۇقساس جاڭالىقتار

Back to top button