ەلىمىزدە بازالىق زەينەتاقى تاعايىنداۋدىڭ جاڭا جۇيەسى ەنگىزىلەدى

ەلىمىزدە كەلەسى جىلدان باستاپ  بازالىق زەينەتاقى ازاماتتاردىڭ جيناقتاۋ جۇيەسىنە قاتىسۋ وتىلىنە قاراي بەرىلەدى. بۇل ءادىستىڭ ناتيجەسىندە 30-40 جىل ەڭبەك ءوتىلى بولسا دا، تومەن زەينەتاقى الىپ وتىرعان ادامدارعا قاتىستى ادىلدىك ورنايدى، دەپ حابارلادى ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى سۆەتلانا جاقىپوۆا. 

ۆيتسە-ءمينيسترىڭ اتاپ وتۋىنشە، ەڭبەك جانە حالىقتى الەۋمەتتىك قورعاۋ مينيسترلىگى 2018 جىلدىڭ 1 شىلدەسىنەن باستاپ ەنگىزىلەتىن بازالىق زەينەتاقىنى تاعايىنداۋدىڭ جاڭا ءتاسىلىن ءتۇسىندىرۋ بويىنشا بەلسەندى جۇمىس اتقارىپ جاتىر.

«قازىرگى ۋاقىتتا بازالىق زەينەتاقى زەينەت جاسىنا جەتكەندەرگە بارىنە بىردەي ەڭبەك ءوتىلىن جانە زەينەتاقى جيناعىن قالىپتاستىرۋعا قاتىسۋدى ەسكەرۋسىز تاعايىندالادى. كەلەسى جىلدان بازالىق زەينەتاقى جۇيەگە قاتىسۋ وتىلىنە قاراي بەرىلەتىنى كوزدەلۋدە. وسى ورايدا 1998 جىلدان كەيىنگى جيناقتاۋشى زەينەتاقى جۇيەسىنە زەينەتاقى جارنالارىنىڭ ءتۇسۋ ارالىعى عانا ەسەپتىلىنىپ قويماي، 1998 جىلعا دەيىنگى دە ەڭبەك ءوتىلى نازارعا الىناتىنى بولجانۋدا»، — دەپ ءتۇسىندىردى سۆەتلانا جاقىپوۆا ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتى بارىسىندا.

ايتۋىنشا، مۇنداي ءادىس 30-40 جىل ەڭبەك ءوتىلى بولسا دا، تومەن زەينەتاقى الىپ وتىرعان ادامدارعا قاتىستى ادىلدىك ورناتادى. 1998 جىلعا دەيىن جانە ودان كەيىن دە 33 جىلدان اساتىن ەڭبەك ءوتىلى بار ادامدارعا بازالىق زەينەتاقى قازىرگى مولشەرمەن سالىستىرعاندا ەكى ەسەگە كوبەيەدى. ەگەر بۇل سوما قازىر 14 مىڭ تەڭگەنى كورسەتسە، 2018 جىلدىڭ 1 شىلدەسىنەن زەينەتكەرلەردىڭ اتالعان توبى ىنتىماقتى جانە جيناقتاۋشى زەينەتاقىنى قوسا العاندا 28 مىڭ تەڭگە الادى.

ءار جىل سايىن بازالىق زەينەتاقى 2 پايىزعا وسپەك. ماسەلەن، 20 جىلدىق ەڭبەك وتىلىندە بازالىق زەينەتاقى ەڭ تومەنگى كۇنكورىس دەڭگەيىنىڭ 74%-ىن قۇراسا، 30 جىلدا 94%-دى مەجەلەمەك. زاڭدا ايقىندالعانداي، 33 جىلدى ەڭسەرگەن ءوتىل بەلەسىندە بازالىق زەينەتاقى كۇنكورىس دەڭگەيىنىڭ تولىق 100% كولەمىن قامتىماق.

سۆەتلانا جاقىپوۆانىڭ ايتۋىنشا، ۇكىمەتتىڭ الەۋمەتتىك سالا بويىنشا جۇرگىزىپ جاتقان جۇمىسى مەملەكەت كومەگىن الۋشى بارلىق تاراپتار ءۇشىن مىندەتتەر اۋقىمىن جۇزەگە اسىرۋدا كەشەندى ءارى جۇيەلى كوزقاراستى قاجەت ەتەدى.

«ماسەلەن، بۇگىندە ەكى ميلليون قازاقستاندىق زەينەتكەر وتكەن جىلمەن سالىستىرعاندا 20 پايىزعا وسكەن زەينەتاقى الىپ ۇلگەردى. ناتيجەسىندە 2017 جىلدىڭ 1 شىلدەسىنەن باستاپ بازالىق زەينەتاقى مولشەرى 14 466 تەڭگەنى، ەڭ تومەنگى زەينەتاقى 31 245 تەڭگەنى قۇرادى. كەلەسى جىلى ىنتىماقتى زەينەتاقىنى بولجامدى ينفلياتسيا دەڭگەيىنەن 2 پايىزعا جوعارى كوتەرۋ جوسپارلانۋدا»، — دەپ اتاپ ءوتتى ول.

«سونىمەن بىرگە، ەڭ تومەنگى كۇنكورىس دەڭگەيى قۇرىلىمىن قايتا قاراستىرۋ مەن ونى كەلەسى جىلى 16 پايىزعا وسىرۋمەن قاتار، مۇگەدەكتىك پەن اسىراۋشىسىنان ايىرىلۋ جاعدايى بويىنشا دا جاردەماقى مولشەرى كوبەيتىلەتىن بولادى. بۇل اتالعان جاردەماقى تۇرلەرىن الۋشى 570 مىڭ ادامعا قاتىستى دۇنيە»، — دەپ تۇيىندەدى ۆيتسە-مينيستر.

 

ۇقساس جاڭالىقتار

Back to top button