بەلگىلى جۋرناليست اۋدارماداعى قاتەلەرمەن كۇرەسۋدىڭ جولىن ايتتى

تانىمال جۋرناليست، Qazaqstan رترك باسقارما توراعاسىنىڭ ءوندىرىس جونىندەگى ورىنباسارى قاينار ولجاي دۇكەن سورەلەرىندەگى تاۋار قاپتامالارىنىڭ قازاقشا ماتىنىندە ءورىپ جۇرگەن قاتەلەردى سىنعا الدى، دەپ حابارلايدى قازاقپارات.

«90 جىلداردىڭ ورتاسىندا ەكونوميكا مينيسترلىگى شەشىم قابىلداپ، كەز كەلگەن زاتتىڭ، تاۋاردىڭ قازاقشا اۋدارماسى، تۇسىنىكتەمەسى بولۋى كەرەك دەگەن جاقسى ەرەجە قالىپتاستىردى. بۇل ۇلتقا پايدالى ەدى، بىراق زيان بولىپ شىقتى. كاسىپورىندار قازاقشا اۋدارماعا نەمكەتتى قارايدى. دۇكەننەن كەز كەلگەن زاتتى الىپ قاراڭىز، ءارىپ قاتەسىن، سويلەمنىڭ قۇرىلىمدىق قاتەسىن ايتپاعاندا، قازاقتىڭ ۇعىمىندا جوق سوزدەردى تابۋعا بولادى. بۇدان قۇتىلۋدىڭ جولى بار»، – دەدى جۋرناليست استانادا وتكەن «جاڭعىرۋ 3.0: رۋحاني جاڭعىرۋ» كونفەرەنتسياسىندا.

«ەستەرىڭىزدە بولسا، 90 جىلدارى ەمشىلەر كوبەيىپ كەتتى. سوندا «رەسپۋبليكالىق ەمشىلەر قاۋىمداستىعىنىڭ» كۋالىگى بار ادامدار عانا ەمدەۋگە قاقىلى دەگەن ەرەجە شىعاردىق. دەمەك، تاۋار قاپتامالارىنداعى ءماتىندى اۋدارۋعا ۇلتتىق اۋدارما بيۋروسىنا مۇشە بولعان، كۋالىگى بار ادامدار عانا قاقىلى دەسەڭىزدەر، مىنا بىلىقتان شىعار ەدىك»، – دەيدى ول.

جۋرناليست قۇرىلعانىنا كوپ بولا قويماعان ۇلتتىق اۋدارما بيۋروسىنىڭ الدىندا ۇلكەن مايدان، ۇلكەن تولقىندار تۇرعانىن اتاپ ءوتتى جانە «جاڭا گۋمانيتارلىق ءبىلىم: قازاق تىلىندەگى 100 وقۋلىق» جوباسىنا زەينەتكە شىققان جۋرناليستەردى تارتۋدى ۇسىندى.

«قازىرگى اقپارات قۇرالدارى باسشىلارىنىڭ وقۋلىقتى ادەبي رەداكتسيالاۋعا ۋاقىتى بولمايدى. قىزمەتتەگى جۋرناليستەردىڭ دە قولى تيمەيدى. سوندىقتان وقۋلىقتاردى عىلىمي رەداكتسيالاۋدا عىلىمعا قازاقى ۇعىمدار اكەلگەن انتروپولوگ ورازاق سماعۇل، ابدىمالىك نىسانباەۆتاي اقساقالداردىڭ مۇمكىندىكتەرىن پايدالانۋ كەرەك. ادەبي رەداكتسيالاۋعا جارىلقاپ بەيسەنباي، ەرجۇمان سمايىل، جانبولات اۋپباەۆ سىندى ءبىر كەزدەرى رەداكتور بولعان اعالاردى تارتۋ كەرەك. ولاردىڭ بىرىنشىدەن قولدارى بوس، ەكىنشىدەن – ىجداھاتتارى بار، ۇشىنشىدەن – تاجىريبەلەرى جەتكىلىكتى»، – دەيدى ق.ولجاي.

 

ۇقساس جاڭالىقتار

Back to top button