«مەكتەپكە جول» – داستۇرگە اينالعان شارا

«مەكتەپكە جول» قايىرىمدىلىق اكتسياسى ون جىلدان بەرى تۇرمىس جاعدايى تومەن وتباسىلار مەن اتا-انالارىنىڭ قامقورلىعىنسىز قالعان وتباسى بالالارىنا كومەك بەرىپ كەلەدى. بيىلعى اكتسيا 1 تامىزدان 30 قىركۇيەككە دەيىن  «مەنiڭ تاڭداۋىم – بالالارعا كومەك كورسەتۋ!» ۇرانىمەن وتۋدە. ەكى اي بويى جۇرگىزىلەتىن اۋقىمدى شارانىڭ ماقساتى – الەۋمەتتىك جاعدايى تومەن وتباسىلار مەن قاراۋسىز قالعان بالالاردى مەكتەپكە دايىنداپ، قاجەتتى قۇرال-جابدىقتارىن الىپ بەرۋ. 

ءبىلىم جانە عىلىم مينيسترلىگى بالالاردىڭ قۇقىن قورعاۋ كوميتەتى توراعاسىنىڭ ورىنباسارى مانشۇك ابدىكارىم جىلدان جىلعا اكتسيانىڭ اۋقىمى كەڭەيىپ، تۇراقتى دەمەۋشىلەر مەن مەتسەناتتاردىڭ قاتارى ارتقانىن جەتكىزدى. بىلتىر 320 مىڭ بالاعا جالپى سوماسى 2 ملرد 468 ملن تەڭگەنىڭ كومەگى كورسەتىلىپتى. كومەككە مۇقتاج بالالارعا كومەكتەسۋ جاعىنان جامبىل، قاراعاندى، قىزىلوردا، اقتوبە وبلىستارى كوش باستاعان. بۇل وڭiرلەردە 30 مىڭنان استام بالا «مەكتەپكە جول» اكتسياسىنا قاتىسىپ، مەكتەپكە قاجەتتى كەرەك-جاراقتارمەن قامتاماسىز ەتىلدى. ال اكتسيا اياسىندا قارجى تارتۋ جاعىنان الماتى، قاراعاندى، جامبىل، وڭتۇستiك قازاقستان وبلىستارى الدىڭعى لەكتەن كورىنگەن. ءار ءوڭىر شامامەن 500 ملن تەڭگەدەن استام قاراجات تارتىپ، كومەككە ءزارۋ جەتكىنشەكتەرگە مەكتەپ قۇرالدارىن الىپ بەرگەن.

بيىل اكتسيا بارىسىندا وقۋشىلاردىڭ جاپپاي مەكتەپكە بارۋىنا ايرىقشا كوڭىل بولىنبەك. بىلتىر كورىنگەن جەردە تۇنەپ، قاراۋسىز قالعان 280 بالا انىقتالعان ەكەن. بيىل وسىنداي الەۋمەتتىك سەبەپكە بايلانىستى ساباقتان قالۋ جاعدايلارىن بولدىرماۋ ءۇشىن رەيدتىك شارالار ۇيىمداستىرىلاتىن بولادى. ءتيىستى ماماندار پاتەرلەردى، ساياجايلاردى ارالاپ، اتا-اناسىنىڭ باقىلاۋىنسىز قالعان بالالاردى ىزدەستىرەدى.

«مەكتەپكە جول» اكتسياسى الماتى قالاسى، مەدەۋ اۋدانىنا قاراستى كوممۋنالدى مەملەكەتتىك مەكەمە №100 جالپى ءبىلىم بەرەتىن مەكتەپتە دە جالعاسىن تاپتى. شارا اياسىندا مەكتەپ ۇستازدارى مەن بەلسەندى وقۋشىلاردىڭ ۇيىمداستىرۋىمەن «جۇرەكتەن جۇرەككە» اتپەن مەرەكەلىك شارا ءوتتى. بارلىعى 22 وتباسىنان كەلگەن 32 ءجاسوسپىرىم ءبىلىم الۋعا قاجەتتى قۇرالدارىمەن، سونداي-اق، مەكتەپ فورماسىمەن قامتاماسىز ەتىلدى. №100 جالپى ءبىلىم بەرەتىن مەكتەپ ديرەكتورى ءاليا بەرديارقىزىنىڭ ايتۋىنشا، بۇل شارانى وتكىزۋ داستۇرگە اينالعان. «جۇمىلا كوتەرگەن جۇك جەڭىل» دەمەكشى، ادام بالاسى ءبىر-بىرىنە كومەك بەرۋدەن ايانىپ قالماۋ كەرەك. شارانى ۇيىمداستىرۋعا قول ۇشىن سوزعان اۋدان اكىمشىلىگى مەن اتا-اناعا العىستان باسقا ايتارىمىز جوق. بالانىڭ قۋانىشتى ءجۇزىن كورۋ – ءبىز ءۇشىن باقىت. قۇربان ايت مەرەكەسى قارساڭىندا باستالاتىن جاڭا وقۋ جىلى ءاربىر بالانىڭ زەيىنىن اشىپ، ءبىلىم الۋعا دەگەن قۇشتارلىعىن ارتتىرسىن دەمەكپىن»، – دەدى وقۋشىلارعا اق جول تىلەپ.

ۇقساس جاڭالىقتار

Back to top button