قازاقستان شەتەل تاسىمالداۋشىلارىن باقىلاۋدى كۇشەيتتى

قازاقستان شەتەل تاسىمالداۋشىلارىن باقىلاۋدى كۇشەيتتى. «قازاقستان اۋماعىندا شەتەلدىك تاسىمالداۋشىلاردى باقىلاۋ كۇشەيتىلدى» دەپ حابارلادى ورتالىق كوممۋنيكاتسيالار قىزمەتىندە وتكەن بريفينگتە ينۆەستيتسيا جانە دامۋ ءمينيسترى جەڭىس قاسىمبەك.

مينيسترلىك تاراتقان اقپاراتقا قاراعاندا، جەڭىس قاسىمبەك العاشقى جەتى كۇندە شەتەلدىك 2700-دەن استام كولىك تەكسەرىلىپ، 193 زاڭ بۇزۋ فاكتىسى انىقتالعانىن ايتتى.

قاسىمبەكتىڭ سوزىنشە، زاڭ بۇزعانداردىڭ 60 پايىزى (117) قىرعىزستاندىق، 20 پايىزى (38) رەسەيلىك، قالعان 20 پايىزى (38) وزگە ەلدەردىڭ (تۇركيا، تاجىكستان، تۇركىمەنستان جانە باسقالارى) تاسىمالداۋشىلارى.

تەكسەرۋ ناتيجەسىنە بايلانىستى شەكارالى ايماقتارعا، ونىڭ ىشىندە جامبىل وبلىسىنا قوسىمشا جىلجىمالى كولىكتى تەكسەرۋ بەكەتتەرى جىبەرىلگەن. بۇعان قوسا جەرگىلىكتى پوليتسيا، ەكونوميكالىق تەرگەۋ قىزمەتى جانە مەملەكەتتىك كىرىس ورگاندارى شەكارادان وتەتىن كولىكتەردى كۇندىز-ءتۇنى قاداعالاي باستاعان.

مينيستر جىل باسىنان بەرى شەتەلدىك 58 مىڭ 655 كولىك تەكسەرىلىپ، 2538 زاڭ بۇزۋشىلىق تىركەلگەنىن ايتادى. رەسمي مالىمەت بويىنشا، زاڭ بۇزۋشىلاردىڭ باسىم بولىگى (933) – قىرعىز تاسىمالداۋشىلارى.

قازاقستاننىڭ قىرعىزستانمەن شەكاراسىندا 10 قازاننان بەرى تەكسەرۋ كۇشەيتىلىپ، قازاقستانعا وتەتىن ادامدار مەن كولىكتەر كەزەگى پايدا بولعان. شەكارادان ارەڭ وتكەندەرىڭ ءبىرازى مۇنى قىرعىزستان پرەزيدەنتى المازبەك اتامباەۆتىڭ قازاننىڭ باسىندا قازاقستان بيلىگىنىڭ اتىنا سىن ايتقان سىنىمەن بايلانىستىرادى.

Back to top button