قازاقستان قىرعىزدىڭ ءسۇت ونىمدەرىن كىرگىزبەي قويدى

قىرعىزستاننىڭ ءسۇت وڭدەيتىن بەس كاسىپورنىنىڭ ونىمدەرىن «زاڭ بۇزۋشىلىققا بايلانىستى» قازاقستانعا كىرگىزۋگە تىيىم سالىنعان دەپ حابارلادى دۇيسەنبىدە قازاقستاننىڭ اۋىل شارۋاشىلىعى مينيسترلىگى.

رەسمي اقپارات بويىنشا، بۇل تىيىم «كاسىپورىندار جەتكىزەتىن ونىمدەردى تەكسەرۋ كەزىندە زاڭ بۇزۋشىلىق انىقتالعان سوڭ»، 10 قازاننان باستاپ «قازاقستان-قىرعىزستان شەكاراسىنداعى ۆەتەرينارلىق باقىلاۋدى كۇشەيتۋ» اياسىندا ەنگىزىلگەن.

سونىمەن قاتار اۋىل شارۋاشىلىعى مينيسترلىگى قىرعىز كاسىپورىندارىنىڭ جەكەلەگەن ونىمدەرىنە «كۇشەيتىلگەن زەرتحانالىق قاداعالاۋ» ەنگىزىلگەنىن، ياعني، ەلگە كىرگىزىلەتىن ءونىمنىڭ ءار پارتياسىنان سىناما الىنىپ، تەكسەرۋگە جىبەرىلىپ وتىراتىنىن حابارلادى.

«قىرعىز تاۋارلارىنا قاتىستى ۆەتەرينارلىق باقىلاۋ كۇشەيتىلگەن ساتتەن باستاپ ولاردى وتكىزۋ مەن ەلگە كىرگىزۋ ازايعانى بايقالىپ وتىر» دەلىنگەن مينيسترلىك حابارلاماسىندا.

اۋىل شارۋاشىلىعى مينيسترلىگى وتكىزۋ بەكەتتەرىندە فيتوسانيتارلىق قاداعالاۋ كۇشەيتىلگەننەن بەرى 117 جۇك كولىگىندە جالپى سالماعى 821،4 توننادان اساتىن كارانتيندىك ءونىم تەكسەرىلگەنىن ايتادى. بۇل تەكسەرۋ كۇشەيتىلگەننەن بەرى 105 توننا ءونىم كەرى قايتارىلعان.

قازاقستاننىڭ قىرعىزستانمەن شەكاراسىندا 10 قازاننان بەرى تەكسەرۋ كۇشەيتىلىپ، قازاقستانعا وتەتىن ادامدار مەن كولىكتەر كەزەگى پايدا بولعان. شەكارادان ارەڭ وتكەندەرىڭ ءبىرازى مۇنى قىرعىزستان پرەزيدەنتى المازبەك اتامباەۆتىڭ قازاننىڭ باسىندا قازاقستان بيلىگىنىڭ اتىنا سىن ايتقان سىنىمەن بايلانىستىرادى.

قىرعىزستان مەملەكەتىك شەكارا قىزمەتىنىڭ 16 قازانداعى مالىمەتى بويىنشا، شەكاراداعى جاعداي ءالى وڭالماي تۇر.

المازبەك اتامباەۆ 15 قازاندا پرەزيدەنت سايلاۋىندا داۋىس بەرگەن سوڭ «ەگەر شەكاراداعى جاعداي وزگەرمەسە» ەۋرازيا ەكونوميكالىق وداعى ەلدەرى پرەزيدەنتتەرىنىڭ كەزەكتەن تىس جيىنىن شاقىراتىنىن ەسكەرتكەن.

 

ۇقساس جاڭالىقتار

Back to top button