قازاقستان قىرعىزستانداعى سايلاۋدى باقىلاۋدان باس تارتتى

قر ورتالىق سايلاۋ كوميسسياسى قىرعىزستان پرەزيدەنتى المازبەك اتامباەۆتىڭ قازاقستاندى سايلاۋ پروتسەسىنە ارالاسىپ جاتىر دەپ ايىپتاعاننان كەيىن وسىنداي شەشىم قابىلداعان.قازاقستاننىڭ ورتالىق سايلاۋ كوميسسياسى 15 قازاندا وتەتىن قىرعىزستان پرەزيدەنت سايلاۋىن باقىلاۋدان باس تارتتى، دەپ حابارلايدى Sputnik.
قر وسك ءباسپاسوز قىزمەتىنىڭ حابارلاۋىنشا، كوميسسيا پرەزيدەنت المازبەك اتامباەۆتىڭ جۋىرداعى مالىمدەمەسىنەن كەيىن قىرعىزستانداعى پرەزيدەنت سايلاۋىنىڭ بارىسىن باقىلاۋدان باس تارتۋ تۋرالى شەشىم قابىلداعان.

“قر ورتالىق سايلاۋ كوميسسياسى 2012 جىلى 9 تامىزدا قىرعىز رەسپۋبليكاسىنىڭ سايلاۋ جانە رەفەرەندۋم وتكىزۋ جونىندەگى ورتالىق كوميسسياسى مەن قر وسك اراسىندا قول قويىلعان ءوزارا تۇسىنىستىك بويىنشا 2017 جىلعى 15 قازاندا وتەتىن قىرعىز رەسپۋبليكاسىنىڭ پرەزيدەنتىن سايلاۋدى باقىلاۋعا قاتىسۋدان باس تارتۋ تۋرالى قاۋلى ەتەدى”، — دەدى وتىرىستا قر ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆ.

ورتالىق سايلاۋ كوميسسياسىنىڭ بۇل شەشىمىن قىرعىز ەلىنىڭ سايلاۋ جانە رەفەرەندۋم وتكىزۋ جونىندەگى ورتالىق كوميسسياسىنا قازاقستاننىڭ سىرتقى ىستەر مينيسترلىگى جەتكىزەدى.

دەگەنمەن، قر ورتالىق  سايلاۋ كوميسسياسى حالىقارالىق مىندەتتەرىن ورىنداۋ ءۇشىن قازاقستاننىڭ وكىلدەرىن حالىقارالىق ميسسيالاردىڭ قۇرامىندا قىرعىزستانعا جىبەرەدى. 46 قازاقستاندىق باقىلاۋشى سايلاۋ بارىسىن باقىلايتىن بولادى.

وتىرىستا قر ورتالىق سايلاۋ كوميسسياسىنىڭ مۇشەسى مارات سارسەمباەۆ پىكىر ءبىلدىردى.

“7 قازاندا قىرعىزستاننىڭ پرەزيدەنتى ءسوز سويلەپ، قازاقستاندى قىرعىزستاننىڭ ىسىنە، ونىڭ ىشىندە پرەزيدەنت سايلاۋى پروتسەسىنە ورەسكەل ارالاسىپ جاتىر دەپ ايىپتادى. مەن سايلاۋ كوميسسياسىنىڭ مۇشەسى رەتىندە، كوپتەگەن ەلدە سايلاۋ بارىسىن باقىلاۋ بويىنشا تاجىريبەمە سۇيەنە وتىرىپ، قازاقستاننىڭ قىرعىز ەلىنىڭ ىسىنە ورەسكەل ارالاسۋى جونىندەگى سوزدەردى ويدان شىعارىوعان دەپ ەسەپتەيمىن”، — دەدى سارسەمباەۆ.

“قازاقستاندى ايىپتاۋعا سىلتاۋ بولاتىن قانداي دا بىر ارەكەتكە” جول بەرمەۋ ءۇشىن سارسەمباەۆ قىرعىزستانعا پرەزيدەنت سايلاۋىنىڭ بارىسىن باقىلاۋعا بارۋدان باس تارتتى. ول ارىپتەستەرىنەن ونىڭ مالىمدەمەسىن قولداۋدى ءوتىندى.

وتىرىسقا قاتىسۋشىلار قاۋلىنى قابىلداۋعا داۋىس بەردى.

ۇقساس جاڭالىقتار

Back to top button