ءسۇت بەزى قاتەرلى ىسىگى ءورشىپ تۇر

الماتىدا تەكسەرىلگەن ايەلدەردىڭ 39 %-ىنان ءسۇت بەزى قاتەرلى ىسىگىنىڭ بەلگىلەرى انىقتالدى، دەپ حابارلايدى قازاقپارات ءتىلشىسى. بۇل تۋرالى قالالىق №11 ەمحانانىڭ ءباسپاسوز قىزمەتى حابارلادى.

الماتىدا 1 قاراشاعا دەيىن ايەلدەردىڭ ءسۇت بەزىن تەكسەرۋ بويىنشا سكرينينگتىك باقىلاۋ مەن پروفيلاكتيكالىق تەكسەرۋ شارالارى جالعاساتىن بولادى. مامانداردىڭ ايتۋىنشا، ايەل قاۋىمى اراسىندا ءسۇت بەزى قاتەرلى ىسىگى بارلىق كورسەتكىشتەر بويىنشا الدا تۇر. «جىل باسىنان بەرى 1544 ايەل سكرينينگتىك تەكسەرۋدەن وتكەن. ونىڭ ىشىندە 600 ايەلدە ءسۇت بەزىنىڭ  قاتەرلى ىسىك الدىنداعى بەلگىلەرى انىقتالعان. بۇل بارلىق قارالعانداردىڭ شامامەن 39 پايىزىن قۇرايدى. 4 ايەلدىڭ ءسۇت بەزى قاتەرلى ىسىگىنە شالدىققانى راستالدى. بۇل كەلىنشەكتەر قازىر ماممولوگ مامانداردىڭ ەمىن قابىلداپ جاتىر. قازىر ولاردىڭ جاعدايى بىرقالىپتى. مۇنداي كورسەتكىشتەر ايەلدەردىڭ دەنساۋلىعىن ءجيى تەكسەرىپ تۇرۋ قاجەتتىگىن كورسەتەدى»، – دەدى №11  قالالىق ەمحانانىڭ پروفيلاكتيكا ءبولىمىنىڭ مەڭگەرۋشىسى جيعاگۇل سۇلتانوۆا. ايتا كەتۋ كەرەك، پروفيلاكتيكالىق تەكسەرۋ 2011 جىلدان باستاپ تىركەۋ  ورنى بويىنشا تەگىن وتكىزىلەدى. «بۇل تەكسەرىلۋگە 52، 54، 56، 58 جانە 60 جاستاعى ايەلدەر كەلۋگە مىندەتتى. ءسۇت بەزىنىڭ مامموگرافياسى جاسالادى. وزگەرىستەر انىقتالعان جاعدايدا ماممولوگ تەكسەرەدى. ءبىز تىركەۋدەگى ايەلدەرگە قوڭىراۋ شالامىز، شاقىرامىز. الايدا ايەلدەردىڭ بەلسەندىلىگى تومەن»، – دەدى ەمحانادان.

ۇقساس جاڭالىقتار

Back to top button