ەلىمىزدە بالالار ءۇيى ازايىپ كەلەدى

بۇگىندە اتا-اناسىنىڭ قامقورلىعىنسىز قالعان بالالار ازايىپ، 27 مىڭدى قۇراپ وتىر. بۇل – ەلىمىزدەگى جالپى بالا سانىنىڭ 0،5%-ى. ونىڭ ىشىندە 21 مىڭ بالانى قازاقستاندىق ازاماتتار اسىراپ السا، قالعانى جەتىمدەر ۇيىندە تاربيەلەنىپ جاتىر. بۇل تۋرالى ءبىلىم جانە عىلىم مينيسترلىگىنىڭ وكىلدەرى حابارلادى.

بالالار قۇقىقتارىن قورعاۋ كوميتەتى توراعاسىنىڭ مىندەتىن اتقارۋشى ەرجان ەرسايىنوۆتىڭ ايتۋىنشا، اتا-انا قامقورلىعىنسىز قالعان ورەندەر ءۇشىن وتباسىلىق قۇرىلىمدى جەتىلدىرۋ قاجەت. بالا اسىراپ الۋعا بەل بايلاعان اتا-انالاردى ارنايى دايىندىقتان وتكىزۋ كەرەك. بۇل تۋرالى 24.kz ارناسىنىڭ رەپورتاجىندا كەڭىنەن كورسەتىلدى.

ەرجان ەرسايىنوۆ، قر بعم بالالاردىڭ قۇقىقتارىن قورعاۋ كوميتەتى توراعاسىنىڭ م.ا.:

– جەتىم بالالار ماسەلەسىن شەشۋ ءۇشىن مەملەكەتتىك بيۋدجەتتەن جىل سايىن 6 ملرد تەڭگە ءبولىنىپ كەلەدى. سوڭعى ەكى جىل ىشىندە بالالار ءۇيىنىڭ سانى 48-گە قىسقاردى. 4 مىڭنان استام تاربيەلەنۋشى تۇراقتى وتباسىن تاپتى. ال اسىراپ الۋدان باس تارتقاننان كەيىن بۇلدىرشىندەردىڭ بالالار ۇيىنە قايتا ورالۋ جاعدايلارى 200-گە جۋىقتايدى. الەۋمەتتىك جەتىمدىك ماسەلەسىن شەشۋ ماقساتىندا قوعامدىق ۇيىم وكىلدەرى جەتىم بالانى اسىراپ الۋشى اتا-اناسىنا تاپسىرماس بۇرىن وعان ارنايى تالىمگەر بەكىتۋ جوباسىن دامىتىپ كەلەدى. بۇگىندە استانا، الماتى، قاراعاندى جانە پاۆلودار قالالارىندا 81 بالا ءوز تالىمگەرىن تاپتى.

بۇگىندە بالاعا تالىمگەر بولۋعا نيەت بىلدىرگەن 842 ۇمىتكەردىڭ ىشىنەن تەك 96-سى ىرىكتەلدى. وتپەلى كەزەڭگە تاياعان بالانىڭ تاربيەسىن قاداعالايتىن تالىمگەردىڭ جاسى 25-تەن اسۋى قاجەت. ونىڭ نەگىزگى مىندەتى – بالانىڭ جان جولداسىنا اينالا ءبىلۋ. بالا دايىن بولعاندا اسىراپ الۋشى اتا-اناسىنا تاپسىرىلادى. تالىمگەرىمەن دە بايلانىسىن ۇزبەيدى.

ۇقساس جاڭالىقتار

Back to top button