ەلىمىزدە العاش رەت قان توبى سايكەس كەلمەيتىن ادامداردىڭ اعزاسىن اۋىستىرۋ وتاسى جاسالۋدا

قازاقستان بويىنشا العاش رەت باۋىر الماستىرۋدىڭ جاڭا ءادىسى قولعا الىندى. بۇگىنگى وپەراتسيانىڭ وزگەشەلىگى سول، ەكى ادامنىڭ قان توپتارى ءبىر-بىرىنە سايكەس كەلمەيدى. استاناداعى ۇلتتىق ونكولوگيا مەن ترانسپلانتولوگيا عىلىمي ورتالىعى شەتەلدىك مامانداردىڭ كومەگىمەن اتالعان وتانى جاساۋعا كىرىستى، دەپ xابارلايدى قازاقپارات.

ورتالىقتىڭ باس xيرۋرگى توقان سۇلتاناليەۆتىڭ ايتۋىنشا، ەكى دونور مەن رەتسەپيەنت ءبىر-بىرىنە تۋىس بولىپ كەلەدى. الايدا ەكەۋىنىڭ قانى ەكى بولەك. «بۇرىن قان توپتارىنىڭ سايكەس بولۋىن قاتاڭ باقىلايتىن. سوڭعى جىلدارى جاپونيا مەن كورەيا قان توپتارى سايكەس كەلمەيتىن ادامداردىڭ باۋىرىن الماستىرۋ جاعىنان ءبىراز جەتىستىكتەرگە جەتتى. ءبىز دە وسى تاجىريبەگە ۇيرەنۋىمىز كەرەك. ونداي وتانى جاساۋ ءۇشىن رەتسەپيەنتتىڭ، ياعني باۋىر الماستىرۋدى قاجەت ەتەتىن ادامنىڭ يممۋنيتەتىن بارىنشا السىرەتەدى. سول كەزدە ونىڭ اعزاسى جاڭا ورگاندى جاقسى قابىلدايدى. ارتىنان يممۋنيتەتتى بىرتە-بىرتە كۇشەيتەدى»، – دەيدى سۇلتاناليەۆ.

باس xيرۋرگتىڭ ءوزى بۇگىنگى وپەراتسياعا قاتىسپايدى. ونى سەۋل ۇلتتىق ۋنيۆەرسيتەتى xالىقارالىق دەنساۋلىق ساقتاۋ ورتالىعىنىڭ اتقارۋشى ديرەكتورى كۆانگ ۆۋنگ لي جاسايدى. ورتالىق ماماندارى بولسا، كورەيا تاجىريبەسىن جان-جاقتى مەڭگەرەتىن بولادى. كۆانگ ۆۋنگ ءليدىڭ ءوزى بۇعان دەيىن مىڭنان استام باۋىر الماستىرۋ وتاسىن جاسادى. سونىڭ ىشىندە 80-گە جۋىعى قاننىڭ سايكەس كەلمەۋىنە ارنالدى.

«شىنى كەرەك، ونداي وتالاردى جاساۋ وڭاي ەمەس. دەگەنمەن، ودان كەيىن ادام ءولىمى ءجيى بولادى دەپ ايتا المايمىن. ادەتتەگىدەي، رەتسەپيەنت 1-3 ايدىڭ ىشىندە وڭالىپ كەتەدى. نەگىزى، قازاقستاندا جاڭا ادىسپەن باۋىر الماستىرۋدى جاساۋعا ابدەن بولادى. تەxنيكالىق جاعدايى دا جەتەدى. ەندى، xالىقارالىق xاتتامالار ماسەلەسىن رەتتەپ السا، وسى ساناتتاعى وپەراتسيالاردى ەمىن-ەركىن جاساي الادى»، – دەيدى لي مىرزا.

ايتا كەتەيىك، بۇگىنگى وپەراتسيا 8-9 ساعاتقا سوزىلادى. مامانداردىڭ ايتۋىنشا، ەكى اپتادان كەيىن دونوردىڭ باۋىرى 30 پايىزى ۇلكەيەدى. ال ءبىر ايدان كەيىن قايتا ءوز قالپىنا كەلەدى.

 

ۇقساس جاڭالىقتار

Back to top button