ۇكىمەت باسشىسى اۋەتاسىمالداۋشىلارعا تالاپتى كۇشەيتۋدى تاپسىردى

ان-28 ۇشاعىنىڭ الماتى ماڭىندا اپاتقا ۇشىراۋىنا بايلانىستى پرەمەر-مينيستر باقىتجان ساعىنتاەۆ ۇكىمەت وتىرىسى كەزىندە بىرقاتار تاپسىرما بەردى.
«جاقىندا قايعىلى وقيعا بولدى، ەكيپاج وكىلدەرى مەن دارىگەرلەر قازا بولدى. بۇل قايعىلى وقيعا سانيتارلىق اۆياتسيا سالاسىندا ۇلكەن قيىندىقتار بارىن كورسەتىپ وتىر. ەسكى ۇشاقتار ۇشىرىلىپ، ۇشۋ قاۋىپسىزدىگى ساقتالماي وتىر، ال ايماقتاردا اۋە كەمەلەرىن تاۋلىك بويى قابىلداۋعا جاعداي جوق. وسىنىڭ سالدارىنان جوعارى بىلىكتى ماماندار مەن اۋىر حالدەگى ناۋقاستاردىڭ ءومىرى قاۋىپتە قالىپ وتىر»، – دەيدى ساعىنتاەۆ.

ۇكىمەت باسشىسى دەنساۋلىق ساقتاۋ، ينۆەستيتسيالار جانە دامۋ، ىشكى ىستەر مينيسترلىكتەرىنە جانە باسقا دا مۇددەلى مەملەكەتتىك ورگاندارعا ۇشاق اپاتىنا قاتىستى ەگجەي-تەگجەيلى تەرگەۋ جۇرگىزىپ، اۋەتاسىمالداۋشىلارعا تالاپتاردى كۇشەيتىپ جانە وسى سياقتى جوسپاردان تىس ۇشۋلاردى جۇزەگە اسىرۋ ءۇشىن بارلىق جاعداي جاساۋدى تاپسىردى.

ەسكە سالايىق، 3 قازاندا East Wing اۋەكومپانياسىنىڭ ان-28 ۇشاعى ۇشىپ شىققاننان كەيىن 12 مينۋت وتكەندە راداردان جوعالىپ كەتكەن ەدى. كەيىن ۇشاق الماتى تۇبىندە ورتەنىپ جاتقان جەرىنەن تابىلعان. بورتتا بولعان بەس ادام قازا تاپقان.

ۇقساس جاڭالىقتار

Back to top button