بەنزين ساتىلىمىنا قويىلعان شەكتەۋ قاشان الىناتىنى بەلگىلى بولدى

ەلىمىزدە بەنزين ساتىلىمىنا قويىلعان شەكتەۋ بەيسەنبى كۇنى الىنادى.  بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە قر ەنەرگەتيكا ۆيتسە-ءمينيسترى اسەت ماعاۋوۆ ءمالىم ەتتى. 

«كەشە ءبىزدىڭ جۇمىسشىلار جانار-جاعارماي قۇيۋ ستانسالارىن ارالاپ، باعاعا مونيتورينگ جاساپ شىقتى. باعالارعا توقتالسام، «قازمۇنايگاز» اق-نىڭ جانارماي قۇيۋ بەكەتتەرىندە بەنزين 152 تەڭگەدەن ساتىلۋدا. بىراق «قازمۇنايگاز» اق-ىندا  بەنزينگە ليميت قويىلدى. ياعني بەنزين 20 ليتردەن ارتىق بەرىلمەيدى. وسى ايدىڭ بەيسەنبى كۇنىنە دەيىن  جانار-جاعارمايدىڭ جاڭا قورى كەلۋى كەرەك. سودان كەيىن بەنزينگە دەگەن شەكتەۋ الىنادى. سودان باستاپ، تۇتىنۋشىلار قانشا العىسى كەلسە، سونشا السىن»، – دەدى ۆيتسە-مينيستر. كەيىن ۆيتسە-مينيستر باسقا جانار-جاعارماي قۇيۋ بەكەتتەرىندە بەنزيننىڭ قانشا تەڭگەگە ساتىلىپ جاتقانىن دا اتاپ ءوتتى.

«بەنزين Helios-تا – 150 تەڭگە، Nomad-تا – 153 تەڭگە، Sinooil -دا ­- 152- تەڭگەدەن، گازپرومنەفت-دە – 156 تەڭگەدەن ساتىلۋدا. استانادا كەشە ەشقانداي كەزەك بولعان جوق. بەنزين كەزەكسىز ساتالىپ جاتىر»، – دەدى اسەت ماعاۋوۆ. ايتا كەتەيىك، بۇعان دەيىن حابارلاعانىمىزداي، بريفينگ بارىسىندا قر ەنەرگەتيكا ۆيتسە-ءمينيسترى اسەت ماعاۋوۆ قازاقستان رەسەيدەن يمپورتتالاتىن بەنزين كولەمىن ارتتىراتىندىعىن جانە مۇنداي قادام بەنزين تاپشىلىعىنا جول بەرمەۋ ءۇشىن جاسالىپ وتىرعاندىعىن ايتقان ەدى. «شامامەن 20 مىڭ توننانى گازپرومنەفت يمپورتتاۋى ءتيىس. قازمۇنايزگاز 10 مىڭ تونناعا كەلىسىمشارت جاساستى، 20 مىڭ تونناعا ارنالعان قوسىمشا كەلىسىمشارت قول قويۋ كەزەڭىندە تۇر. مەنىڭشە، بۇگىن-ەرتەڭ وعان قول قويىلادى. بۇعان قوسا، گەليوس، سينويل كومپانيالارى ۋفا توبىنا كىرەتىن زاۋىتتاردان 20 مىڭ توننا جەتكىزۋ جايىن تالقىلاۋدا»، – دەگەن ەدى ۆيتسە-مينيستر.

 

ۇقساس جاڭالىقتار

Back to top button