دەسترۋكتيۆتى ءدىني اعىمدار: وتباسىلار ويران، تاعدىرلار تالقان بولۋدا

قر ءدىن ىستەرى جانە ازاماتتىق قوعام مينيسترلىگىنىڭ ءدىن ىستەرى كوميتەتى جانىنان قۇرىلعان ءدىن ىستەرى جونىندەگى رەسپۋبليكالىق اقپاراتتىق-ناسيحاتتاۋ توبى اقمولا وبلىسىندا اقپاراتتىق-ناسيحاتتاۋ جۇمىستارىن جۇرگىزدى.

سەمينارلار مەن كەزدەسۋلەردە كۇن تارتىبىنە قويىلعان باستى ماسەلە  ̶  وڭىردەگى ءداستۇرلى ەمەس ءدىني اعىمدارعا قارسى كۇرەس شارالارىن كەشەندى جۇرگىزۋ. دەلەگاتسيا قۇرامىنا اتالعان سالاداعى جەتەكشى ماماندار مەن ساراپشىلار كىرەدى. ولاردىڭ قاتارىندا: ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ تەولوگى – تىشقان كەڭشىلىك،  ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى فيلوسوفيا كافەدراسىنىڭ اعا وقىتۋشىسى، ءدىنتانۋشى – مۇستافينا تولعاناي، قازاقستان مۇسىلماندارى ءدىني باسقارماسىنىڭ جاستار ىستەرى بويىنشا ءبولىم مەڭگەرۋشىسى – التىنبەك ۋتىسحان، ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ تەولوگى-جالعاس اسحات ۇلى، استانا قالاسى. «ءالجان انا» مەشىتىنىڭ نايب يمامى –جاڭاقوۆ بەرىكبول.

بۇگىنگى ۋاقىتتا ءداستۇرلى ەمەس ءدىني اعىمدار اسا وزەكتى تۇيتكىلدى ماسەلەگە اينالىپ وتىر. كوپتەگەن جاستار بۇل ءىستىڭ تولىق اسپەكتىسىنەن حابارسىز بولىپ، جات ەلدىڭ اعىمىنا ەنۋدە. بۇنىڭ سوڭى وتباسىنىڭ ويران، تاعدىرلاردىڭ تالقان بولۋىنا اكەپ سوعاتىندىعىن ايتقان ءدىنتانۋشى تولعاناي مۇستافينا، دەسترۋكتيۆتى ءدىني اعىمدار ادەتتە قاتال يرارحيالىق قۇرىلىمى بار ەرەجە سياقتى ەكەنىن ايتتى. جالپىعا ورتاق قۇقىق پەن ادامداردىڭ جەكە قىزىعۋشىلىعىنا قاۋىپ ءتوندىرىپ، اسىرەسە، جالعان «ءدىني موتيۆ» اتىن جامىلعانداردىڭ ىقپالى  جاستارعا ءبىرىنشى كەزەكتە اسەر ەتەدى.

«دەسترۋكتيۆتى ءدىني ۇيىمىنىڭ ازعىرىپ-كوندىرۋ ءىس-ارەكەتى بارىسىندا جاستاردىڭ بويىندا مىناداي نەگاتيۆ بايقالۋى مۇمكىن:

 تۋعان جەرىنىڭ مادەنيەتىن، سالت-داستۇرلەرىن، اتا-بابالارىنىڭ ارۋاعىن، پاتريوتتىقتى سىيلاماۋ;

–  دىني تەماتيكاعا شامادان تىس قىزىعۋشىلىق تانىتۋ، «مۇعالىم»، «تالىمگەرىنىڭ» تالاپتارىن مۇلتىكسىز ورىنداۋ;

–  ۇيرەنگەن ورتاسىمەن قارىم-قاتىناس ورناتۋدا قىزىعۋشىلىعىن جوعالتۋ، داعدىلانعان قىزىعۋشىلىقتارىنان باس تارتۋ (سپورت، شىعارماشىلىق، قوسىمشا ساباقتار);

– «پىكىرلەستەرىمەن» تەلەفون ارقىلى نەمەسە ينتەرنەت-كەڭىستىكتە شامادان تىس، جاقىن قارىم-قاتىناس ورناتۋ;»، ̶ دەيدى ساراپشى.

ايتا كەتەرلىگى، كەزدەسۋلەر بارىسىندا ءداستۇرلى ەمەس ءدىني اعىمداردىڭ جاقتاۋشىلارىمەن جەكە ءتۇسىندىرۋ جۇمىستارى جۇرگىزىلدى. وسى ساناتتاعى ازاماتتارمەن كوكشەتاۋ قالاسىنداعى «ناۋان حازرەت»، ستەپنوگورسك قالاسىنداعى «پاڭ  نۇرماعامبەت» جانە دە وبلىس اۋداندارىنداعى مەشىتتەردە كەزدەسۋ وتكىزىلدى. سونداي-اق، وسىنداي كەزدەسۋلەر تۇزەتۋ مەكەمەلەرىندەگى سوتتالعاندارمەن، ونىڭ ىشىندە ءداستۇرلى ەمەس ءدىني اعىمداردىڭ جاقتاۋشىلارىمەن دە بولىپ ءوتتى.

جالپى العاندا، حالىقتىڭ ءدىني ساۋاتتىلىعىن ارتتىرۋدى ماقسات ەتكەن ءىس-شارالارعا كوكشەتاۋ، ستەپنوگورسك قالالارىمەن وبلىستاعى اقكول جانە شورتاندى اۋداندارىنىڭ تۇرعىندارى، وڭىردەگى قوعامدىق كەڭەستىڭ مۇشەلەرى، مەملەكەتتىك جانە قۇقىق قورعاۋ ورگاندارى، ءدىن، باق، ەڭبەك ۇجىمدارى، وقىتۋشىلار، مۇعالىمدەر، ستۋدەنتتەر، جانە دە وقۋ ورىندارىنىڭ قىزمەتكەرلەرى قاتىستى.

ب.كادىربايقىزى

 

Back to top button