شۆەتسيا ەلشىسى قازاقستانداعى ديپلوماتيالىق ميسسياسىن اياقتادى

شۆەتسيا ەلشىسى قازاقستانداعى ديپلوماتيالىق ميسسياسىن اياقتادى. قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى رومان ۆاسيلەنكو شۆەتسيا كورولدىگىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى حريستيان كاميللگە ونىڭ ديپلوماتيالىق ميسسياسىنىڭ اياقتالۋىنا بايلانىستى «قازاقستان رەسپۋبليكاسىنىڭ قۇرمەت گراموتاسى» مەملەكەتتىك ناگراداسىن تابىستادى.

بۇل تۋرالى قر ءسىم ءباسپاسوز قىزمەتى حابارلادى. قر پرەزيدەنتى ن.ءا.نازارباەۆتىڭ ءتيىستى جارلىعىندا ح.كاميلل قازاقستان رەسپۋبليكاسى مەن شۆەتسيا كورولدىگى اراسىنداعى تابىستى ىنتىماقتاستىقتى دامىتۋعا سىڭىرگەن ەڭبەگى ءۇشىن قۇرمەت گراموتاسى بەرىلىپ وتىرعانى اتاپ وتىلەدى. ر.ۆاسيلەنكو ەلشى ح.كاميللدىڭ ەكى ەل اراسىنداعى ساياسي ديالوگ، ەكونوميكالىق ءوزارا ءىس-قيمىل جانە مادەني بايلانىستاردى دامىتۋعا باعىتتالعان ءتيىمدى قىزمەتىن باسا ايتتى. ەلشى ح.كاميلل جۇمىس اتقارعان جىلدارى ريكسداگ (شۆەد پارلامەنتى) سپيكەرى ۋ.الين جانە شۆەتسيا كورولدىگىنىڭ اۋىل شارۋاشىلىعى ءمينيسترى س.بۋحتىڭ قازاقستانعا رەسمي ساپارلارى وتكىزىلدى. ەكى ەلدىڭ سىرتقى ىستەر مينيسترلەرى ق.ءابدىراحمانوۆ جانە م.ۆالستريوم ۇستىمىزدەگى جىلى حالىقارالىق فورۋمدار اياسىندا ءۇش رەت كەزدەستى. 2017 جىلعى قاڭتاردا قازاقستان رەسپۋبليكاسى مەن شۆەتسيا كورولدىگى بۇۇ قاۋىپسىزدىك كەڭەسىندە بىرلەسكەن جۇمىسىن باستادى جانە بۇگىنگى كۇنى ۇيىمنىڭ كۇن ءتارتىبى بويىنشا قارۋدى تاراتپاۋ جانە قارۋسىزداندىرۋ ماسەلەلەرى بويىنشا تىعىز ىنتىماقتاسۋدا. Business Sweden – شۆەد ساۋدا جانە ينۆەستيتسيالىق كەڭەسىنىڭ قولداۋىمەن ءوزىنىڭ جوعارى تەحنولوگيالىق جانە يننوۆاتسيالىق ازىرلەمەلەرىمەن تانىمال ءىرى شۆەد كومپانيالارىنىڭ ساپارى ءوتتى. قازاقستاندىقتار شۆەد سۋرەتشىسى ت.كرابونىڭ يادرولىق قارۋدى تاراتپاۋ جانە قارۋسىزداندىرۋ تاقىرىبى بويىنشا استانا، الماتى، كۋرچاتوۆ قالالارىندا قويىلعان كورمەلەرىنە ايرىقشا قىزىعۋشىلىق ءبىلدىردى. «استانا وپەرا» مەملەكەتتىك وپەرا جانە بالەت تەاترىنىڭ وركەسترى جانە شۆەتسيا كورولدىگى كامەرالىق وركەسترىنىڭ نەگىزگى ديريجەرلەرىنىڭ ءبىرى م.ليلەفورستىڭ جەتەكشىلىگىمەن بىرلەسىپ ۇيىمداستىرىلعان كونتسەرت تابىستى ءوتتى. ح.كاميلل ەكىجاقتى ىنتىماقتاستىقتى نىعايتۋعا قوسقان ۇلەسىن جوعارى باعالاعانى ءۇشىن قازاقستان رەسپۋبليكاسىنىڭ باسشىلىعىنا جانە بىرقاتار ورتاق ءىس-شارالاردى وتكىزۋگە ىقپال ەتىپ، شۆەتسيا كورولدىگىنىڭ ەلشىلىگىمەن ناتيجەلى ءوزارا ءىس-قيمىلى ءۇشىن سىرتقى ساياسي ۆەدومستۆوعا العىس ءبىلدىردى.

Back to top button