ت.مۇساباەۆ: اۆياتسيا قاۋىپسىزدىگىن قامتاماسىز ەتەتىن مەملەكەتتىك ورگان قۇرۋ كەرەك

اۋە ساپارلارىنىڭ قاۋىپسىزدىگىن قامتاماسىز ەتۋ ءۇشىن بىرىڭعاي مەملەكەتتىك ورگاندى قۇرۋ كەرەك. وسى جايىندا پارلامەنت سەناتىنىڭ دەپۋتاتى تالعات مۇساباەۆ ءمالىم ەتتى، دەپ حابارلايدى قازاقپارات.

«اۆياتسيا وتە كۇردەلى قۇرىلىم. وزدەرىڭىز بىلەسىزدەر، العان ءبىلىمىم بويىنشا اۆياتسيالىق ينجەنەرمىن، جوعارى دارەجەلى ۇشقىشپىن. وسىدان كەيىن سىناۋشى عارىشكەر بىلىكتىلىگىن الدىم. بۇل رەتتە بارلىعى كابينادا وتىرعان ۇشقىش پەن ەكيپاجعا  عانا قاتىستى ەمەس، ياعني مۇنىڭ بارلىعى جەردەگى قۇرىلىمداردىڭ، تەحنيكالىق جاساقتاۋ جانە باسقا دا اۋقىمدى كەشەننىڭ جۇمىسىن قامتيدى»،- دەدى تالعات مۇساباەۆ تىلشىلەرگە بەرگەن سۇحباتىندا.

وسى ورايدا دەپۋتات قر يدم ازاماتتىق اۆياتسيا كومتەتىنە كوبىرەك نازار اۋدارۋ كەرەكتىگىن اتاپ ءوتتى.

«مەنىڭ ويىمشا، ەلىمىزدە اۋە ساپارلارى قاۋىپسىزدىگىن قامتاماسىز ەتۋدى باقىلايتىن بىرىڭعاي مەملەكەتتىك ورگاندى قۇرۋ كەرەك. باسقا مەملەكەتتەردە وسىنداي ورگاندار بار. اتالعان ورگان اۆياتسيانىڭ بارلىق تۇرلەرىندەگى اۋە تەحنيكانىڭ، ۇشقىشتار قۇرامىن، ديسپەتچەرلىك ۇجىمنىڭ، ينجەنەرلىك قۇرامنىڭ جاعدايىن تەكسەرۋ بويىنشا باقىلاۋشى قىزمەتتى ىسكە اسىرا الادى. وسى ورايدا ەلىمىزدىڭ اۆياتسياسىندا مۇنداي ورگاندى قۇرۋ قاجەت جانە وعان قانداي دا ءبىر مينيسترلىكتىڭ باقىلاۋىندا بولمايتىنداي قۇقىق بەرۋ كەرەك»، – دەدى مۇساباەۆ.

ونىڭ سوزىنە قاراعاندا، بۇل باقىلاۋشى ورگان قازاقستاننىڭ بارلىق اۆياتسياسىن تەكسەرۋگە قاۋقارلى بولۋى ءتيىس. «اۆياتسيادا قاۋىپسىزدىكتى قامتاماسىز ەتۋ ماسەلەسى ۇنەمى وزەكتى تاقىرىپتاردىڭ ءبىرى بولدى. كەڭەستىك كەزەڭدە سالاداعى بارلىق قىزمەتتەردىڭ ءوزارا ءىس-قيمىلى بولعاندىقتان، ۇشاق اپاتتارى ءجيى قايتالانبايتىن. ال وسىنداي اپاتتاردىڭ جيىلەۋى كوڭىل كونشىتپەيتىن جاعداي. بۇل ءوز كەزەگىندە اۋە ساپارلارى قاۋىپسىزدىگىنە نازار اۋدارۋ قاجەتتىگىن اڭعارتادى»، – دەيدى دەپۋتات.

ءسوز سوڭىندا سەناتور الداعى ۋاقىتتا اتالعان ورگاندى قۇرۋ بويىنشا ۇسىنىستار ەسكەرىلىپ وتىرعانىن اتاپ ءوتتى. ەسكە سالايىق، 3 قازان كۇنى الماتى-شىمكەنت باعىتىندا سانيتارلىق اۆيارەيسىن ورىنداعان «ان-28» ۇشاعى ساعات 18:47-دە الماتىدان 28 شاقىرىم قاشىقتىقتا روداردان جوعالىپ كەتتى.  سوسىن ساعات 19.15-تە ۇشاق الماتى وبلىسى ىلە اۋدانىنىڭ مەجدۋرەچينسك اۋىلى ماڭىندا اپاتقا ۇشىراپ، ورتەنگەنى حابارلاندى. بورتتا بولعان 5 ادام قازا بولدى.

 

ۇقساس جاڭالىقتار

Back to top button