كارتوپ باعاسى 300 تەڭگەگە دەيىن قىمباتتاۋى مۇمكىن

ەلىمىزدە كارتوپتىڭ قۇنى 300 تەڭگەگە جەتۋى مۇمكىن. ءىرى ساۋدا جەلىلەرىندەگى باعالارعا زەرتتەۋ جاساعان ساراپشىلار وسىلاي دەيدى. بۇل تۋرالى كتك ارناسى حابارلايدى.

 قالا بازارلارىندا بىلايعى جۇرت ساراپشىلاردىڭ قىمباتشىلىق تۋرالى بولجامىنان بەيحابار. ادەتتە باعا وسەدى دەگەندى ەستىسە توبە شاشى تىك تۇراتىن جۇرت بىزدەن ەستىگەن جاڭالىقتى دا جاقتىرا قويمادى.

«مەندە ءۇش بالام بار. مەن ءۇشىن اۋىر بولادى. ءبىر كەلىنىڭ ءوزى ەكى كۇنگە جەتپەيدى»، – دەيدى قالا تۇرعىنى گۇلزيا اشىرباەۆا.

ماسەلەن، مىنا كارتوپتىڭ باعاسى بۇل جەردە 120 تەڭگە، كەي جەرلەردە ءتىپتى 110 تەڭگە تۇرادى. ال ءىرى ساۋدا دۇكەندەرىندە ول ودان دا قىمبات بولۋى مۇمكىن. قاراپايىم حالىق كارتوپتىڭ وسى باعادا قالا بەرگەنىن قالايدى.

ەلىمىزدە كارتوپتىڭ ورتاشا كوتەرمە باعاسى قازىر 35-تەن 55-كە كوتەرىلگەن. ازدان سوڭ 90 مەن 130 تەڭگە ارالىعىندا بولادى دەپ جاتىر. ويتكەنى، شارۋالار كوكتەمگى قىرۋار شىعىنىن وتەۋ كەرەك. كوكونىستەر ىشىندە قىمباتشىلىققا قاتتى ۇرىنعانداردىڭ تاعى ءبىرى قيار بولىپ وتىر. ونىڭ سەبەبى، قازىر ەگىستىكتەگى قياردىڭ ءبارى جينالىپ بولدى. پياز باعاسى دا شارىقتاي باستادى. ال ءسابىز 15 پايىزعا، ورامجاپىراق پەن قىزىلشا شامامەن جەتى جارىم پايىزعا، قىزاناق جەتى پايىزعا قىمباتتادى.

ال اۋىل شارۋاشىلىعى مينيسترلىگى ساراپشىلار بولجامىنا كەرەعار پىكىر ايتىپ وتىر. مينيسترلىك وكىلدەرىنىڭ دەرەكتەرىنە قاراساق، بيىل ءونىم جىلداعى ادەت بويىنشا ارتىعىمەن جيىلماق.

«بيىلعى كوكونىستەردىڭ ەگىستىك القابىنىڭ جالپى كولەمى 144 مىڭ گەكتاردى قۇرايدى. ودان 3 ميلليون 700 مىڭ توننا ءونىم جيناۋ كوزدەلىپ وتىر. ال ەلدىڭ سۇرانىسى ەكى ميلليون 400 مىڭ توننانى قۇرايدى. ياعني، جالپى ءونىم كولەمى سۇرانىستى 154 پايىزعا ارتىعىمەن قامتاماسىز ەتە الادى دەپ وتىرمىز»، – دەيدى اۋىل شارۋاشىلىعى مينيسترلىگى جەر ءبولىنىسى دەپارتامەنتىنىڭ باسشىسى المات قوناقوۆ.

مينيسترلىكتىڭ ءوز ەسەبى بويىنشا، كارتوپ ءونىمى دە بيىل ەلدىڭ سۇرانىسىنان ارتىعىمەن جينالايىن دەپ وتىر. سوندىقتان، قاراپايىم حالىق ءۇشىن الاڭداۋعا نەگىز جوق دەگەنگە سەندىرگىلەرى كەلەدى.

ۇقساس جاڭالىقتار

Back to top button