راسۋل جۇمالى: ەركەك باسىمەن پاكەتكە سارقىت جيناعان دەگەن نە سۇمدىق؟

ساياساتتانۋشى راسۋل جۇمالى سوڭعى كەزدە ءجيى بەلەڭ الىپ بارا جاتقان ەركەكتەردىڭ ەرسىلىگىن جۇرتقا جاريا ەتىپ، ەلدىڭ پىكىرىن سۇرادى.

«بۇرىندارى توي مەن اس كەزىندە سارقىتتى ايەل ادامدار جيناۋشى ەدى. قازىر بايقايتىنىم – كەي ەركەكتەر دە وسىنى داعدىعا اينالدىرعان. ەرسىلەۋ كورىنەدى ەكەن. بۇل نەنىڭ بەلگىسى؟ الدە ءوزىم ومىردەن كەش قالعانىم با؟» دەپ جازدى اۆتور فەيسبۋكتاعى پاراقشاسىندا.

راسۋل جۇمالىنىڭ جازباسىن وقىعاندار جارىسا ءوز پىكىرلەرىن جازىپ، كوبى تويلاردا پاكەت تاسىپ جۇرەتىن ەركەكتەردىڭ ارەكەتىن ۇياتقا تەڭەدى.

«نامىسى بيىك قازاعىمنىڭ ازاماتتارى-اۋ! نەگە سونشا ۇساقتالىپ كەتكەن؟! ۇيات قوي بۇل!.. ەرگە سىن عوي!.. ەركەك باسىمەن اشتان كەلگەندەي پاكەتكە سارقىت تاسىعان دەگەن نە سۇمدىق؟! ءبىز قايدا بارامىز؟ نە كورىندى ەركەكتەرگە؟»، «جالپى ۇيات قانا ەمەس، ماسقارا دۇنيە. ەركەك ادامنىڭ جالماڭ قاعىپ پاكەت كوتەرىپ جۇرگەنى نەسى جاقسى دەيسىز؟» دەپ اشۋعا بۋلىقتى جەلىدەگىەر.

دەگەنمەن پىكىر قالدىرۋشىلار اراسىندا تويدان سارقىت الۋدى قولدايتىندار دا تابىلدى. سەبەبى ىسىراپ بولىپ قالىپ كەتكەنشە، قۋانىشتى كەشكە كەلە الماعانداردىڭ داستارحاننان ءدام تاتۋىندا تۇرعان ەشتەڭە جوق.

Back to top button